‘Sta vota nun ve faccio perdere tiempo, niente ppaggelle
2nd, apr, 2012
Che disgrazzia, che sbentura! Chello ca nn’êva maje succedere, succedette! Mannaggia a cchello ca nun se po’ ddicere, guagliú! Ajeressera ‘o Napule e Mazzarri fujeno cacchie ‘e mme ‘ntussecà ‘a dummeneca d’ ‘e Ppalme e ‘o primmo d’abbrile!
So’ ‘nu bbuonu crestiano (o me sforzo d’esserlo…), ma ajeressera quanno fernette ‘a rencontra nun me sentette ‘e stà ‘mpace cu nnisciuno e mme ‘ncazzaje talmente ca si avesse dato ‘nu muorzo a coccheduno ll’êsse avvelenato e si me fósse capitato Mazzarri p’ ‘e mmane, cu ttutto ca stongo ‘ncopp’a ‘na seggia a rrutelle, ll’êsse fatto agliottere tutt’ ‘e riente! E che saciccio! Piglià tre purpette ‘a ‘na scuatra ‘e femmenielle delinquente è ‘na cosa murtificante…. Jí a Ttorino e arrennerse senza cumbattere è ‘na cosa ca nun sta nè ‘ncielo nè ‘nterra! Eppure proprio chesto succedette e â fine d’ ‘a rencontra putette annutà ‘ncopp’ô fuglietto ‘a miseria ‘e ‘nu tiro ‘mporta…. E cche sanco d’ ‘a brasciola! Ajeressera ‘o Napule aveva apprufittà d’ ‘e ccarocchie ca avevano pigliate ‘a Lazzio e ll’ Udinese; fósse avastato ca ‘e cuane avessero cunquistato pure sulo ‘nu punto pe metterce a dduje passe dâ Lazzio e ghircela a gghiucà ssàpato ca vene a Rroma… e ‘mmece ajeressera ‘o Napule resistette sulo ‘nu tiempo e ppo sbracaje facennose paccarià malamente dê piamuntese ca jucajeno cu ‘o sanco a ll’uocchie e ce mannajeno â casa scummate ‘e sanco! Mamma mia ajeressera fuje comme quanno chiove a zzeffunno e uno nun tène manco ‘a fetenzia ‘e ‘nu ‘mbrello decente… ‘O fatt’è ca oramaje cu Mazzarri nun se va a nnisciuna parte, manco a Muntevergene o a Pumpeje. Pussibbile ca nun s’accurgette ca aveva miso ‘ncampo ‘na scuatra molla e stanca senza cegna e senza ggenio? Pussibbile ca nun s’addunaje ca êva miso ‘ncampo ‘na difesa cucassa (ridicola), ‘nu centrocampo ‘nnatequato (inadatto) mentre annante ‘e tre tenure stevano sfiatate e assumigliavano cchiú assaje a ttre suprane o a ttre crastate d’ ‘o setticiento?Mo vulesse overamente sapé quala scusa s‘ammenta pe ggiustificà ‘nu campiunato ca mo comme a mmo è overamente sprecato e rijalato. E pe salvà ‘a tempurata mo nun lle rummane ca vencere ‘a rencontra cu ‘a Lazzio a Rroma e ‘a finale ‘e Coppa Italia. Ma ‘a veco tosta pe tutt’ ‘e ddoje cose,pure si nun me manca ‘a speranza ca â fine se passano tutte ‘na mano p’ ‘a cuscienza e riesceno a salvà chellu poco ‘e dignità ca nc’è rummasa. Ea pproposito penso ca, tutto summato,fuje ‘struttivo perdere ajeressera. Po’ essere ca a mmaggio, p’ ‘a finale ‘e Coppa, Mazzarri capisce coccosa e ‘a scuatra scenne ‘ncampo misa meglio cu cchiù ccegna, cazzimma e risulutezza.
Ora mo solitamente mecco ‘e ppaggelle; ma ‘sta vota nun ve faccio perdere tiempo guagliú e senza stà a pelià mecco quatto a tutte quante, arbitro Orsato cumpreso ca cunvalidaje ‘a primma rredda juventina signata ‘a Bonucci ‘nn’urzo ‘e cose (in fuorigioco) e ca jettaje ‘ngiustamente fora a Zuniga pe ‘na guvetata ‘nvolontaria ca ‘o napulitano êva data ‘nfaccia a Chiellini tentanno ‘e libberarse d’ ‘o delinquente juventino ca ‘o steva abbrazzanno e strattunanno…
A Mazzarri però ll’aggi’ ‘a mettere a fforza tre
pecché sbagliaje tutto e doppo d’ ‘a scunfitta murtificante d’ajeressera se nn’à dda jí assulutamente!
E basta accussí: è mmeglio ca nun me faccio ati diebbete ‘e vocca e mme fermo cca!
Si dDi’ vo’ ce sentimmo dummeneca ca vène speranno ca sàpato succedesse ‘o miraculo a Rroma!
Staveti bbe’!
R.Bracale Brak
‘On Rafè, vuje nun facite ‘e ppaggelle? E i’ ’sta vota nun tengo parole ‘a spennere.. pe ’sti quatto papùte.
Nun me va cchiù e me ‘ntussecà. Vedimmo comme va a fernì e ppo si è ‘o caso rinnuvammo ‘abbunamento a Merdaset Premium.
Statemi bene.
E.C.
Nun me va cchiù ‘e me ‘ntussecà.
‘Nu pare ‘e suspiche ca vulesse esser schiarefecato.
«Nce vedimmo â vija d’ ‘e cquatto.»
É corretta la prep. art. “â” ?
«’a firnimme. (la←finiamo=finiamo→la).
Ma leggo e sopratutto sento pronunciare: «’a firnimmole/finnimmole» — come va scritta se è forma corretta e nel qual caso come va interpretata?
Grazzie p’ ‘o responzo.
@GIUSEPPE
«Nce vedimmo â vija d’ ‘e cquatto.» Sì è correttamente scritta con la â !
Finiamola si può rendere con “fernìmmola” oppure con “‘a fernimmo”!
@GIUSEPPE 2
Complimenti per l’uso dell’agg.vo/sostantivo papùto (“vecchio sciocco e senza forze”dallo spagnolo papudo) che non usa più nessuno.
@GIUSEPPE 3
Precisazione: Si deve scrivere “â via d’ ‘e cquatto.» e non “vija»
Non mi avete convinto del tutto perchè ad es.: “vie” di: «per la vie di Napoli» suona diverso da «’e vvije ‘e Napule.» La “i” suona lunga. Come quando pronunciamo «’e mmije..».
E.C.
mi accorgo solo ora che non si dice «’e mmije» ma «’e mmeje», in ogni caso rimane la questione della “i” lunga che io reputo esserci in «’a vija/’e vvije».
È probabile che ci sia qualcosa che o mi sfugge o non conosco.. datemi lumi come solo voi sapete fare.
E.C.
Mi accorgo solo ora che si scrive «’e mmeje» e no «’e mmije». Ma resta la questione della “i” lunga.
E probabile che ci sia qualcosa che mi sfugge o di cui non so (forse questione di dittongo ia/ie ?)
Datemi lumi voi che sapete.
Grazzie
@GIUSEPPE post 6
Se mi telefonate vi chiarisco a voce la faccenda; per iscritto è troppo lungo e mi stanco a scrivere, visto che – purtroppo – posso usare una sola mano!
‘On Rafè, pe mme fosse n’ annore granne ‘e parlà cu vvuje.
Se per voi va bene potreste utilizzare la mia mail (l’ admin ha facoltà di darvela) per comunicarmi il vostro tel. O se preferite un’ altra soluzione ditemi voi.
Don Peppì, ci siete su F.B.? La vs. mail nn sono riuscito ad averla! Chiedete voi la mia all’admn e ci contattiamo!
‘On Rafè, mo ci provo e vi faccio sapere.
P.s. no, su facebook non ci sono!