ilNapolista

Festa granna ô san Paolo

Festa granna ajeressera ô san Paolo, guagliú! Tricchi-tracche, trezziole e bbotte a mmuro pe ‘na serata ‘mpurtante ca, ‘mpresenza ‘e Maradona assettato ‘ncopp’â tribbuna ‘mmiez’ê tifuse, ce assicuraje ‘e jí a gghiucà ‘a finale ‘e coppa itaglia a mmaggio contr’â Fiorentina a ll’Ulimpico ‘e Roma. Chesto vulevemo e cchesto ‘e guagliune cuane ce detteno ribaldanno ‘o risultato ‘e ll’annata e cunzignanno â scuatra d’’o Pupone e de monzú Garcià (ca – si è ppossibbile – me sta cchiú antipatico ‘e parrucchino conte)tre sfugliatelle ricce caude caude ‘ncartate senza guantiera, â faccia ‘e chi ce vo’ male e de chilli scieme d’’e telecroniste RAI ca cummentajeno ‘o fullé facenno ‘nu tifo sfecatato p’’a roma e ca êsseno vulute murí primma ‘e cummentà ‘nu tre a zzero d’’o Napule e ‘mmece êtten’’a nchiudere ‘e microfone cu ‘o tuosseco ca lle scurreva pe bbocca, pecché chello proprio succedette i ‘e rumanise perdetteno senza remissione! Passammo ê ppaggelle:
REINA 8 ‘O guardiano cuano se dimustraje sempe sicuro quanno ascette a ttutto campo e ‘mparticulare quanno, ô siconno minuto,salvaje súbbeto ‘o risultato ascenno ‘ncopp’ê piere ‘e Destro dint’â camma ‘e porta. P’’o riesto d’’o fullé se facette sempe valé bluccanno cchiú ‘e ‘nu pallone periculuso e dimustrannose padrone d’’a camma ‘e ricore!
MAGGIO 6,5 Durante ô primmo ajone quanno ‘e cumpagne appressurajeno(spinsero), fove isso ca muntaje ‘a guardia ‘ncuollo a gGervigno e ‘o mettette ‘nsuggezziona. Fiunalmente ‘ncarraje ‘nu cruzzo (cross) e ne nascette ‘a rredda ‘e Cagliecònno ca sbluccaje ‘o fullé
FERNANDEZ 6,5 Cca e lla quacche ‘ndecisiona, ma senza cunsequenzie; ‘ncumpenso ‘ncopp’ô juoco aveto se facette sempe rispettà e nchiudette cu mmestiere e ccegna (grinta) senza paura e ssenza cassura (pausa)!!!
ALBIOL 6,5 Nun ce scurdammo ca Raúllo joca senza arrepusarse ‘a troppu tiempo, pe ccuje fove nurmale ca ô finale fósse ‘nu poco stanco. Ma nun venette meno dint’ê mmecce e alluntanaje ògne minaccia senza stà a ppelià dimustrannose jucatore ca nun se ne po’ ffà a mmeno!
GHOULAM 6,5 ‘O ggiuvinotto cunfermaje ‘e tené granni cqualità ‘int’a ttutte ‘e ddoje ‘e ffasi ‘e juoco.Nun se facette spaventà ‘a Gervigno e ‘nfase ‘e disancamiento (disimpegno) nun ghittaje maje ‘o pallone a la sanfasònne.
Inler 7 ‘A fatica ‘e don Rafele cu ‘o turco-napulitano se sta vedenno tutta; ‘o ggiuvinotto cunfermaje ‘a bbella atalossa fatta contr’ô Milànno; ajeressera se pigliaje p’’a mana ‘a scuatra dint’ê mumente cchiú dellicate e nun se tiraje arreto quanno êtt’’a tentà ‘a jucata cchiú cumplicata.
JORGINHO 7,5 Jucatore ‘e sustanza e raggiunatore nato nun perdette maje ‘a calma; pure quanno ‘a Roma mettette tutt’’e suoje arret’ â linia d’’a palla, ‘o bbrasiliano nun se scumpunette e ccuntinuaje a ffà ggirà palla cu vvelocità e cqualità truvanno sempe ‘a chésema justa (il varco giusto).Se prupunette spisso annante e mmettette dinto ‘a rredda d’’o tre a zzero cu ‘nu carizzo ceniero (morbido) ‘nsotto, tutto brasiliano. (da ll’ 85° HENRIQUE sv)
MERTENS 7 Se sacrificaje p’assicurà ‘a nicessaria cupertura; ‘nfase uffenziva facette vedé tutt’’a qualità soja comme quanno pennellaje ‘na straurdinaria ajuda (assist) p’ ’o tre a zzero ‘e gGiorgigno.
HAMSIK 7 Nun è ancòra cumpletamente isso, ma sta turnanno, sta turnanno a esserlo! Ajeressera facette n’atalossa ‘e spessore dinto a ttutte ‘e ddoje fase ‘e juoco: quann’isso ggiraje ‘o Napule s’affacciaje puntualmente dint’â camma ‘e ricore avverzaria. Poco mancaje ca dâ trecquarte nun signasse ‘na rredda spettaculare!(dô 77° BHERAMI sv)
CALLEJÒN 7,5 Che gghiucatore! ‘Ncopp’ô tre a zzero cuntinuaje a correre comme a ddannato p’assicurà isurrupío (equilibrio) â scuatra. Sbluccaje ‘o risultato cu ‘na cabbasèra (colpo di testa) pricisa, ‘mpezzannose ê spalle ‘e Benatia e ffove sempe isso ca se facette ‘nquatto p’assicurà ‘e rrepartite (ripartenze).
HIGUAIN 8 Pe tutt’’o fullé se dètte da fà pruteggenno palla e lanzanno ê cumpagne;ajeressera signaje ‘a diciuttesima rredda d’’a tempurata (stagione), ma pe ffarlo aspettaje ca Maradona trasesse ô san Paolo e isso poco doppo sfruttaje ‘a cabbasèra (testata) d’Albiòllo pe mmettere dinto ’o pallone d’’o doje a zzero, arrubbano ‘o tiempo a tTorosidísso.. (da ll’ 82° INSIGNE sv)
BENITEZ 8 ‘O Napule scennette ‘ncampo cu ggenio e cumminziona e ggià doppo d’’e prime vinte minute fove padrone d’’o fullé mantenenno n’atteggiamento prupusitivo e ssicuro ‘e sé dô pprincipio ô prazzo (fine) dimustranno ‘e stà facenno ‘e prucresse ca vo’ don Rafele;Nun sultanto p’’a cunquista d’’a finale ‘e coppa itaglia, ma pe ll’atalossa d’ajeressera, p’’a nichessa (vittoria) e ppe ccomme è stata uttenuta, i’ spero ca mo tutte chilli quatte zappielle ca teneno ‘a dicere ‘coccosa ‘ncopp’ô pruggetto tecnico ‘e don Rafele, spero ca se metteno ‘a lengua ‘mprozo e nun parlano cchiú cunvincennose e rendennose cunto ca si tutte ‘e unnece stanno a ll’arriba (al top) ‘e risultate arriuvano e ca cumpletanno ‘a rónna (la rosa) comme decide don Rafele, ‘o Napule po’ ppuntà a vvencere pure a bbreve.P’’o mumento accuntentammoce ‘e chello ca passa ‘o cunvento e sperammo ca a mmaggio a ll’Ulimpico ‘e Roma capitan Marekiaro po’ sullevà ‘a coppa itaglia.
ll’arbitro ROCCHI 5,5 M’aspettavo ‘e peggio ‘a ‘sta meza cazetta fiurentina ca p’’o ppassato ce facette cchiú ‘e ‘na fetenzia…, ma ajeressera s’ammesuraje ‘a palla e nun se macchiaje ‘e ggrossi ppurcarie pure si doppo appena doppo duje minute me facette jí ‘o llatte arreto nun siscanno n’urzo‘ecose (fuorigioco) ‘eLjajiccio ca mettette a dDestro ‘nnante a rReina.
E ccu cchesto ve saluto. E si vo’ dDio ce sentimmo lunnerí doppo d’’a traferta contr’ô Sassuolo ‘e culo’echiummo!
Staveti bbe’!
R Bracale Brak

ilnapolista © riproduzione riservata