Aggiu capíto ca visto e cunziderato ca Mazzarri vo’ poca ggente e ppochi spicializzate…,aggiu capíto ch’ è assaje ‘mpurtante pure ‘a verzatilità (la duttilità), e allora Criscito è cratisto (ottimo) pure pe cchesto, cu ttutto ca pe ‘nu periodo se ‘nchiaccaje d’ossazza janca e nnera, ma po à fatto ‘a quarantena cu Genoa e s’ è lampïato (ripulito). Passammo a Donadel(lo) ca è sempe stato ‘nfravulato (sottovalutato) dâ Fiorentina ma quanno ll’aggiu visto ‘e jucà m’è ssempe piaciuto: mazzeja (picchia), tène piere bbuone pe plantïà (impostare) e ‘na bbella castagna forte e precisa ‘a fora. Si overamente finalmente fernesse ‘a jacuvella d’‘o vengo e nun vengo e finalmente arrivasse Inler(ro) putenziale fenomeno, già uno d’ ‘e meglie d’ ‘o munno dint’ô rollo suĵo (nel suo ruolo), oltre ô purtiere ‘e riserva (ca i’ però facesse ‘o ppussibbile e ll’impussibbile pe cunfermà a Iezzo lassanno perdere a Berni e senza jí a scavà dint’ô sicchio d’ ‘a mmunnezza d’ ‘a juventussa pe piglià a Manninger(ro), pe mme a cchillu punto mancasse sulo uno ‘mprimma linia, uno ‘e nivella arribba (di livello “top”) e ppo fósse ‘na bbona campagna acquisti ca ce aspettammo.’Mprimma linia a mme me piacesse Giaccherini,chisto sí ‘na bbona pulca (pulce) ato ca Giovinco pur’isso ‘nchiaccato d’ossazza juventina…, ma tenenno presente ‘a facenna d’‘a verzatilità, ll’autenticu tarro ‘e masto (il vero colpo da maestro) fósse Vucinic(cio), pecché po’ essere ‘o sostituto o ‘e Lavezzi o ‘e Cavani e ô san Paolo contro ê ppiccerelle putessero pure starce tutt’ ‘e ttre arretranno a Marekiaro, e ppo ce facessemo ‘o trave ‘e fuoco â juventussa ca ‘o va truvanno e ce levassemo ‘e pprete ‘a dint’â scarpe…p’ ‘o ‘mpiccio ca ce sta dànno cu Inler(ro). Comme grajo d’emergenza (torre di emergenza),po si nun se po’ arrivà a Forlan(no) me tenesse sempe a Lucarelli ‘mmece ‘e jí a scavà dint’ô sicchio d’ ‘a mmunnezza d’ ‘a juventussa pe piglià a Trezeguet(to): costa meno e so’ ccerto ca cu ‘na priparazione adecuata, ‘a listonga soja (il suo rendimento) fósse a ll’aldezza (sarebbe al livello) ‘e quanto ce facette vedé cu Juve-Napoli: ‘na saggena primmarosa (un gol magnifico),’nu travesagno (una traversa) e n’aiúda (un assist…). E mmo diciteme vuje che ne penzate.
Cu ‘na bbona salute!
R.Bracale Brak
