Missione compiuta! ‘a Juventús (grazzie Catania!) è stata surpassata! Ajere ce penzajeno Denís e ‘o ‘Pocho’ a recalà ô Napule e ê napulitane tifuse ‘a vittoria contro ô Chievo e ll’Europa League senza preliminare. ‘Na vittoria sudata, arrivata â fine ‘e ‘na partita assaje combattuta e cu ‘nu pizzico ‘e nevrastenia, cu ttutto ca ‘o Chievo se fosse ggià salvato vincennoâ dummeneca primma a Firenze. Ma se sape ca contro ô Napule, ‘e veronese jocano sempe cu ‘o sanco a ll’uocchie!
Mazzarri aveva dimannato ‘o mmassimo ô Napule: nove punte dinto a ll’urdeme tre partite,e ‘e guagliune ànno accumminciato cu sette parme vincenno cu ‘o Chievo pure si è stata tosta e assaje cchiú ttosta sarrà ll’urdema tappa, a Genova, contro ‘a Sampedoria ‘mpignata a centrà l’ubbiettivo d’ ‘a Champions League. Vincenno, doppo chella d’ajere pure ‘a partita a Marassi,’e napulitane eguagliassero ‘o nummero d’ ‘e vvittorie esterne: 7, quante ne songo state conquistate dint’ê campiunate 1933-’34 (terzo posto), 1986-’87 ( ‘a staggione d’ ‘o primmo scutetto) e 1988-’89 (siconno posto doppo ‘nu granne chi-sî-ttu-e-chi-songo-io cu l’Intèr). Cu chella d’ajere ‘o Napoli à vinciuto seje partite fora casa, ‘ncopp’ ê campe ‘e Fiorentina (1-0), Juventus (3-2), Atalanta (2-0), Livorno (2-0), Bari (2-1),Chievo (2-1); ‘a penurdema vittoria fuje firmata ‘a Lavezzi cu dduje golle! Ajere è stata ‘a jurnata ‘e Denís e ancòra ‘e Lavezzi ca adderezzaje ‘a varca cu ‘na granda punizzione, doppo ca Cannavaro e ‘o pirata Morgan De Sanctis avevano fatto mettere ‘e mmane dint’ ê capille a Mazzarri pe bbia ca avevano fatto cumunella (‘o primmo sbaglianno ‘a capata, ‘o purtiere sbaglianno ‘a respinta….) pe ppiglià ‘nu golle overo fesso ca aveva pariggiato ‘o bbellissimo golle ‘e Denìs ca aveva purtato ‘nvantaggio ‘o Napule. Inzomma alla fine d’ ‘a jurnata d’ajere s’appurajeno ddoje cose certe: mezzeca e una: ‘o ciuccio napulitano era zumpato ‘ncuollo â zepera culastrisce janche e nnere, piazzannose ô sesto posto d’ ‘a classifica e si nun succedono ‘mpicce a ll’urdeme ddoje jurnate (… e nun avessero ‘a succedere!…) ‘o ciuccio se va a ffà l’ecchese Coppa Uefa, scanzannose ‘e preliminare e abbarrucannole â juventús. Ll’ata cosa certa ca s’è appurata, fermo restanno ca Giulietta era e rummane ‘na zoccola, s’è appurato ca ‘e jucature d’ ‘o Chievo erano tutte ‘nnammurate arricchiunate comme a Romeo; difatti s’appennevano ê magliette e ê mutanne d’ ‘e napulitane cercanno ‘e levarcele ‘a cuollo… Turnanno â partita arricordo ca l’ autrjere l’allenatore aveva sprunato Hamsík, ggià arrivato a dudece golle, ma ‘o guaglione proprio nun ce l’ à fatto a arrivà a tridece, anze nun ce à quase tentato; del resto tridece golle è ‘na cifra ca nun è nurmale pe ‘nu centrocampista. Po, p’ ‘a verità ‘o campo d’ ‘o Chievo nun ll’arricurdavano bbelli cose: dint’ ô campionato passato Marekiaro era stato jettato â via ‘e fora e ppo squalificato pe ddoje jurnate. Marek s’ aveva levà ‘e pacchere ‘a faccia e aveva deciso d’essere prutagonista ‘e chistu finale, primma ‘e firmà ll’alluncamento d’ ‘o cuntratto e ppo vulà ‘n Slovacchia, pe priparà ‘a missione mundiale. E allora ce se mettette cu ‘a panza e cu ‘o penziero,ma – a pparere mio – nun facette ‘na bbella partita; pe furtuna d’ ‘o ciuccio cu ‘a panza e cu ‘o penziero ce se mettette pure Denís ca teneva ‘o vveleno ‘mpont’ ô musso pe bbia d’ ‘e critiche ca spisso spisso ‘o fanno, e cu ‘na granna capata purtaje ‘nvantaggio ‘o ciuccio!Cannavaro e De Sanctis po cercajeno ‘e arruvinarce ‘a festa, ma ce penzaje ‘o Pocho a risolvere ‘a facenna! E basta accussí; parlammo d’ ‘e prutaguniste: De Sanctis: 4,5 ‘na meza bbotta: pochi chiene e ‘na mala vacante. Se dimustraje bastantamente sicuro quanno se trattaje ‘e anticipà a Pellissier e fuje ‘na sicurezza pure ‘ncopp’ ê mmazzate ‘e Marcolini; ma ll’asciute, se sape, nun songo ‘o fforte sujo e spisso dorme cu ‘a zizza ‘mmocca… E cumminfatte facette ‘na papera grossa assaje cu ‘na respinta ‘a curtellate ‘ncopp’ a " n’assisto" muollo muollo ‘e Bentivoglio, e Granoche n’approfittaje!
Grava: 5. Beneditt’ ommo!Jette bbuono fino a quanno nun cercaje ‘e struppià a Marcolini e s’abbuscaje ‘o cartellino ggiallo ca ‘o faciarrà zumpà ‘a partita cu ll’Atalanta.Dich’i’: ″Ma che stisse ascenno mo ‘a sott’ ô mantesino?’E ttiene o no cchiú ‘e trent’anne?Nun ‘o ssaje ca ll’arbitro De Marco tene signate tutt’ ‘e jucature d’ ‘o Napule ca so’ diffidatee sta aspettanno ‘a mossa sbagliata pe ll’ammuní e farle squalificà….Pe cchesto ll’annu mannato a Verona! E tu ce cade comme a ppiro nizzo?!″
dô 19’ st Aronica: 6- Tuosto e cuncreto ‘ndifesa, generoso ma ‘nu poco casinista quanno jette annante; se magnaje ‘nu golle a pporta spalancata!
Cannavaro: 3,5 nun è bbuono e nun è maje stato bbuono a zumpà e a respingere ‘e capa e se vedette; tène ‘e pprete dint’ ê ssacche e ‘o culo ‘e chiummo e ajere facette ‘a frittata:nun fuje crestiano ‘e mannà fora area ‘e capa ‘nu pallone semplice, semplice e ‘o dètte ‘ncopp’ê piere ‘e Bentivoglio, ca, pure pe colpa ‘e De Sanctis, nun se facette prijà e costruette ‘e presupposte d’ ‘o mumentaneo pareggio d’ ‘o Chievo. Chesto pe nun dicere po d’ ‘e tante rilance a capa ‘e saciccio ‘e culo ‘e chiummo ca s’ à dda assolutamente vennere o rialà, basta ca se ne jesse!
Campagnaro: 6+: cunzignaje a Denís ‘o cross p’ ‘o vantaggio napulitano . Cumplessivamente fuje abbastanza priciso ‘a fora ô mumento d ‘o mumentaneo pareggio d’ ‘o Chievo.In effetti steva ancòra facenno ‘e muorte a culo ‘e chiummo Cannavaro ca nun era stato bbuono ‘e menà ‘e capa ‘o pallone fora area; perdette ‘o poco ‘e tiempo, facette ‘na fenta ca mettette ‘ndifficoltà De Sancits ca durmeva cu ‘a zizza ‘mmocca e ca sbagliaje; ma ‘a colpa nun fuje ‘a soja, fuje ‘e chillu culo ‘e chiummo ‘e Cannavaro ca nun è mmaje stato bbuono e ca, comme aggiu dito, primma ‘o vennono, ‘o rialano o ‘o jettano, primma ‘a difesa va meglio!
Maggio: 4 – Doppo ‘e Cannavaro, ‘o peggio. Ma nun è colpa soja; nun è colpa soja si Mazzarri ‘o facette jucà e ‘o tenette ‘ncampo pe tantu tiempo! Nun steva ‘nforma e se vedette: sulo quacche vvota riuscette a arrivà ‘nfunno ‘e campo, ma po sbagliaje ‘o passaggio decisivo. Quanto a cuntené nun se ne parlaje proprio!
dô 38’ st Bogliacino: sv. Sulo ‘na bbona jucata p’ Aronica e ppo niente cchiú; fosse trasuto primma forze faceva quaccosa ‘e cchiú!
Gargano 5,5: Pronti via,e subbeto ‘nu passaggio sbaggliato; po s’accunciaje p’’a via e a centrocampo arrubbaje spisso ‘a palla e s’arrangiaje cu quacche bbuonu passaggio.
Pazienza 6-: assieme a Gargano facette ‘a solita fatica ca serve, ma ce fosse vuluta quacche idea ‘e cchiú. Me dispiace ma se vedette chiaramente ca Michelino sta passanno ‘nu mumento ‘e stanchezza: difatti ‘e Zzorro teneva sulo ‘a maschera; spata, cavallo e mantiello ll’êva lassate â casa.
Zuniga 6-: ô ssolito, ‘na partita cu ‘a chiena e ‘a vacante; ce pruvaje spisso , ma fuje sempe casinista!
Hamsik: 4.5 Verona ll’aggiu ditto nun porta bbuono a Marekiaro ca se fa sempe piglià dô nervosismo. Ajere nun riuscette maje a trasí dint’ô vvivo d’ ‘o juoco, e ghiette cuoveto-cuoveto (lemme lemme) ô mumento d’ ‘o contropiete. S’ ‘a puteva pure sparagnà l’ammonizzione pe ffallo ‘ncoppa a Jokic!
Lavezzi 7: Si ‘a partita fosse fernuta ô 40′ d’ ‘o siconno tempo, l’avesse miso cchiú ppoco; pe troppu tiempo Lavezzi, forze ancòra appaurato ‘e chello ca ll’era capitato â dummeneca primma, parette ca nun ce stesse, pure si quacche vvota facette vedé chello ca sape fà, po pe grazzia ‘e dDio e pe furtuna d’ ‘o Napule facette ‘o juoco ‘e prestiggio ca ‘e napulitane s’aspettavano e signaje ‘o golle d’ ‘a vittoria cu ‘na punizzione forte e furtunata! ‘O guaglione à dda sulo addeventà ‘nu poco cchiú cuncreto pecché fa cose belle assaje , ma po si perde ‘int’ô mmeglio e dint’ â cosa cchiú facile!
Denis 8: ‘O meglio lla ‘mmiezo ajere! Comme ô ssolito ‘ncopp’ a ògne ppalla aveta, ce stette isso e ô cuntrario ‘e chello ca era succieso dinto a ll’urdeme partite, ajere signaje pure, sfruttanno ll’unico suggerimento serio avuto ‘a Campagnaro. Pe tutt’ ‘a partita fuje ‘na spina p’ ‘a difesa giallobblú: ustaculaje ‘e ripartenze e se facette vedé sempe ‘mposizziona bbona. Me dispiace ca se parla d’ ‘o vennere: simmo proprie sicure ca truvammo a n’ato capace ‘e pigliarle tutte ‘e capa e fa paura ê difenzure? Ajere se jucaje ô mmassimo ll’urdema pussibbilità comme titolare e mettette ‘ncrisi a Mazzarri pe chest’urdeme ddoje partite ca rummanono.
dô 46’ st Rinaudo sv Justo pe ffà passà ‘o tiempo. Ce fosse stato ‘a ll’inizzio ô posto ‘e culo ‘e chiummo Cannavaro, ‘o Chievo ‘o golle nun ‘o signava!
Mazzarri: 5. Primmo tempo piatto e senza idee. Dico io “Si Maggio nun sta bbuono (e nun sta bbuono!) pecché te ‘ncapunisce (ti ostini) a nun cagnà modulo pe farlo jucà pe fforza? D’accordo,guarde ‘a panchina e tiene poco ‘a scegliere, ma Bogliacino esterno a ds. è ormai ‘na furzatura.Nun fosse stato meglio a levà subbeto a Maggio, spustà Zuniga a ds., fa trasí Aronica in difesa, spustanno Campagnaro esterno sinistro? Levarse ‘a giacchetta po’ essere scaramantico, ma nun è dditto ca abbasta!” Pe furtuna ca c’è stato Lavezzi a ffà ‘o muraculo!
Arbitro De Marco 4 Tène trentasette anne chist’arbitro ‘e Chiavari e tène pure ‘e gghiorde; nun corre, ma cammina e nun fuje maje presente dint’ ê mumente ‘mpurtante; evidentemente ‘nnammurato ‘e Giulietta, pe paura ‘e nun essere cchiú chiammato a arbitrà ô Bentegodi siscaje sempe ‘a luntano e a ffavore d’ ‘e ggiallobblú; se ‘nventaje falle inesistente e siscaje ad capocchiam pericolose punizzione dô lémmeto (limite) (pe furtuna napoletana senza nisciuno effetto); arbitraje a senso unico contro ô Napule, levannose ‘o sfizzio ‘e ammuní ‘e jucature napulitane ggià diffidate ca accussí sarranno squalificate!
A chiusura ‘e jurnata m’arravaje ‘a nutizzia ca ll’Intèrre aveva vattuto ddoje a zzero ‘a Lazzio e aveva surpassato n’ata vota ‘a squatra mariola ‘e chillu mariuolo ‘e Totti. Sperammo ca ‘o campionato fernesce accussí cu ll’Interre campione d’ Italia e cu ‘o Napule ‘a cuollo â Juventús!