‘a Pifanía ‘ntussecata, nun ne facimmo ‘na taggedia

Caro prof. ’sta vota cuncurdammo paricchio, pure si vuje site ‘e maneca larga, soprattutto cu culo’echiummo! Buon anno e datemi ospitalità. Grazzie assaje.
INTER – NAPOLI 6.01.11 3 A 1 LL’AGGIU VISTA ACCUSSí
Nun ne facimmo ‘na taggedia, guagliú… Ce simmo ‘ntussecato ‘a Pifanía, chest’è tutto…E che ffa? Simmo passate ‘e cóveta e nun ce putevamo aspettà ‘e truvà ‘a cazetta cu ‘e ppazzielle!
Nun so’ servute cuorne, vrancate ‘e sale,asso ‘e mazze,sciacarí e sciacarà …,ajere ll’Interre steva ‘nforma e ‘o Napule no,punto e basta. Evidentemente cchiú ‘e ‘nu jucatore napulitano teneva ancòra mussillo e capitone ‘ncopp’ô stommaco, ancòra roccocò, mustacciuole, cassatine e struffole ô posto d’’e ccosce e ‘e scioccele ô posto d’’o core! Se sapeva ca ll’Interre era e è ‘na granna squatra ma chesto nun vo’ dicere ca ‘o Napule nun po’ continuà a sperà d’arrivà a ccogliere ‘a Ciampionsa!Forze si avessero jucato Yebda ô posto ‘e Gargano e quacche ato ô posto ‘e Maggio, ‘e Aronica, ‘e culo’echiummo, ‘e Dossena dô primmo minuto ‘a partita fosse stata diverza, ma a pparlà doppo è ffacile. Pe ffurtuna ca pure ‘a juventussa ajere a ll’ora d’ ‘e zite à avuto ‘na bbona lardiata; cunzulammoce accussí e aspettammo dummeneca pe levarce ‘e pacchere ‘a faccia proprio cu ‘a vecchia zoccola! E passammo ê ppaggelle:
DE SANCTIS 5: Ajere ssera à fatto vedé ll’antiche magagne soje: nun ghiesce, manco si ‘o cacciano a ccauce â via ‘e fora, rilancia a capa ‘e ‘mbrello.Tène ‘ncopp’â cuscienza ‘o sicondo gollo ‘e Motta, ma p’ ‘o riesto nient’ato ‘a dicere.
CAMPAGNARO 5,5: S’addurmette ‘ncopp’ a ll’inzerimento ca permettette a Motta ‘e purtà ‘nvantaggio ll’Interre; quacche ata distrazzione cca e lla: ‘nzomma ajere nun fuje isso!
CANNAVARO 3: ‘A cchiú ggrossa ‘a cumbinaje quanno se facette piglià p’ ‘o culo ‘e capa ‘a Cambiasso ô mumento ca s’êsse vuluto starse cchiú attiento e ‘mmece culo’echiummo facette proprio ‘o ccuntrario e succedette ‘a frittata d’ ‘o siconno vantaggio ‘nterista, ma nun fuje ll’unico errore d’ ‘o capitano: troppe pe ll’arricurdà cca.
ARONICA 3,5: Nun capisco ajere ssera che succedette, ma ajere nun se puteva guardà dinto a quase tutte ll’ uccasione ca ‘o vedettero affannà lla ddereto…
MAGGIO 4: Pruvaje a ffà coccosa ‘ncopp’ô binario ‘e dritta, ma spisso lle facette difetto ‘o crosso e/o passaggio decente. Se magnaje ‘nu gollo fatto ô primmo tempo, gollo ch’êsse pututo cagnà ‘a storia d’ ‘a partita.
PAZIENZA 7: Nun sulamente ‘o gollo d’ ‘o momentaneo pareggio, ricuperaje ‘nu tummulo ‘e pallune e ‘e ppassaje sempe cu pricisione. Ato ca cederlo a ggiugno, s’êsse fà ampressa a rinnovarle ‘o cuntratto…
GARGANO 4,5: Muscio e fuceto ‘ncuorpo pure senza palla; ‘o vedette assaje scaricato atleticamente; chisto n’è n’ato ca ‘o matremmonio nun le ggiova!
DOSSENA 4: Nun ce simmo! Voglio vedé quanno se decide a essere ‘o jucatore ca ce aspettammo; ajere ‘o primmo tempo sujo fuje n’arruina ‘ncopp’ô lato ‘e mancina; nun riuscette nè a cuprí, nè a ccrussàdecentemente!
HAMSIK 5,5: Me parette ‘o meglio d’ ‘o trisso ‘e lla ‘nnante, ma ‘o fatte è ca ajere nun le jettero appriesso nè Cavani nè tanto meno Lavezzi.
LAVEZZI 5- -: Nun me parette ca avesse ancòra ricuperato cumpletamente dô ‘nfurtunio,(si de ‘nfurtunio s’è trattato e nno ‘e ‘na fenta pe ghirsene a ppassà Natale ô paese sujo: ‘o Pocho ‘sti ccose ‘e ffa, ‘e ffa….). Ajere nun le riuscette niente e nun fuje maje, maje periculuso!
CAVANI 5: Avette pochissimi palle pe ghiiucarsele comme sapesse fà, ma ajere nun era ‘a jurnata soja e se vedette poco o niente…
dô13° st YEBDA 6: Risuluto e spavardo, visto comme steva miso Gargano, fosse stato ‘o caso ‘e farlo jucà da ll’inizzio ô posto ‘e ll’ecchese muturino( ‘o matremmonio ll’à ggià spumpato).
dô 31° st SOSA S.V.: Pochi minuti ‘e qualità e appricazzione (impegno), ma senza zuco!
MAZZARRI 4 ‘A presumenzia è ‘o punto debbole ‘e st’ommo: nun riesce a cunoscere qua’ so’ ‘e limmete d’ ‘a squatra soja e d’ ‘e jucature ca tène; se ‘nfessisce a ffà scelte sbagliate e custringe, comme a ajere, ‘o Napule a ffà fijurelle ‘e seje sorde ca se putessero evità cu ‘nu poco ‘e accurtenza e acalanno ‘e scelle (con umiltà). ‘O Barcellona e ddico ‘o Barcellona, no ‘a Frattese joca cu ‘o 4-3-3 cu tutte chilli campiune ca tène (uno pe tutte:Messi) e ‘mmece Mazzarri vo’ esaggerà jenno a S.Siro contro a ll’Interre cu Maggio, Dossena e Gargano e cu tre difenzori (tra cuie culo’echiummo) e prupone ‘nu ridiculo 3-4-1-2. Cunclusione? Ll’Interre lòffia (lenta) e ammerecata ce à fatto ‘na ddia ‘e fijura e ‘o Napule ‘na fjurella ‘e niente: Cavani à tuccato pochi pallune, Lavezzi ll’à sciupate tutte. E ‘o riesto d’ ‘a squatra à arrancato malamente. Sperammo ca mo dinto a ‘sti prossime dduje juorne se désse ‘na sciacquata ‘e faccia e mmettesse ‘a squatra a dduvere contro â juventussa, ca contro â juventussa s’à dda vencere a fforza!
LL’ARBITRO S.V. Ce steva, ma se facette nutà poco.
 prossima!
R.Bracale