Cavani è stanco assaje
Lavezzi ce pruvaje

Me fósse piaciuto n’atu risultato…guagliú, ma tutto summato putimmo dicere cu Mazzarri: “Bravo, Napoli! Buona partita!” Punizzione a pparte, dich’io; ma pecché ‘e ttira sempe Gargano? Ce ponno essere ati soluzzione, misterro Mazzarri. Nun ve preoccupate ca Lavezzi, Cavani, Mascara o Yebda nun s’ ‘o slogano ‘o perezzullo! Ancòra ‘na volta pesano comme a ‘nu bblocco ‘e preta ‘e lava (macigno)’e pputtanate ‘e ll’arbitro: troppi fuoriggioco ‘nventate e ‘nu ricore annjato! D’accordo. A Villarreal ce ‘a jucammo ô stesso. Ma, jirce doppo ‘nu uno a zzero fosse stato assaje meglio! ‘O fatt’è ca ‘a suggità è troppo manza (remissiva). Ve ll’immagginate vuje ‘o casino, ‘o fracasso, si ô posto nuosto ce stessero ‘o Milanno, l’Interre o ‘a juventussa? Ce manca sulo ‘na cosa p’essere ‘na granna squatra: ‘nu poco ‘e alleverenzia (rispetto) dâ federazziona sia chella ttaliana ca chella europea. ‘O Presidente, si ‘a tène, facesse sèntere ‘a vocia soja! Tutto summato però era ‘mpurtante nun piglià golle, cosa ca nun è riuscita ô Milanno e â Roma ‘ncempionsa, e ‘a difesa à fatto tutto ‘o duvere suĵo; peccato ca nun simmo riuscite a fà ‘na fetenzia ‘e gollo, ma ‘a qualificazzione è ancòra tutta ‘a jucà, e ‘o ddico pe cchili dduje o tre ‘ncompetente ca parlano tanto pe ddà aria â vocca e ca è mmeglio ca ‘mmece d’ ‘o pallone se vedessero chella fetenzia ‘e festivàllo ‘e sanremo, cu cchillu bbuffunciello ‘e Benigni (ca,senza sapé nè lleggere, nè scrivere,senza sapé ‘e chello ca parla ce ll’ave cu ‘e Burbone, cu ‘o Cavaliere e sta cazza e ccucchiara cu Bersani e cumpagnia bbella), ll’Unità d’ Italia, e ‘e mafiuse/cammurriste ca se fanno ripiscà a ffurore ‘e popolo; a proposito v’arricordo ca se dice festivàl ( pecché uriginariamente è ‘na parola francese)e nno fèstival (che è chella stessa parola francese appezzuttata e sturciata da ll’ingrese!); fèstival ‘o ddiceno ll’ingrese e tutte ll’ignurante! Passammo ê ppaggelle.
DE SANCTIS 6 – Nun s’êtte quase spurcà ‘e guante, ma se facette truvà pronto chelli pochissimi vvote ca ‘o Villarreallo se facette sotto. Ce mettette ‘e punie pe respingere ‘a cunclusione putente ma centrale ‘e Borja Valero.
CAMPAGNARO 7 – Fuje ‘o meglio ‘e ‘na difesa ca nun currette gruosse pericule. ‘Nu culosso ‘nchiusura: dê pparte soĵe, comme a ssempe, non se passaje; basta spià a Giuseppe Rossi. S’ ufferette (si esibí) pure cu quacche bbona asciuta palla ô pere dâ difesa.
CRIBARI 6,5 – Se cumpurtaje bbuono pe quase tutta ‘a partita, po dint’ô recupero trattenette ‘ngenuamente a Marco Rubenno rialanno ‘na punizzione periculosa ca pe furtuna nun venette sfruttata; ma fuje ll’unica pecca d’ ‘o guaglione brasiliano. (culo’echiummo êsse sbagliato chi sa quanto!…)
ARONICA 6- – ‘Nu poco scuncigliato (disordinato),fuje ‘ndifficultà quanno Nilmarro ‘o puntaje e isso fuje custretto a stennerlo, abbuscannose ‘nu cartellino jalizzo. Po ‘ngenuamente s’abbuscaje pure ‘o siconno e s’êtte ‘a jí a ffà ‘a doccia primma ‘e ll’ate.
MAGGIO 5 – Currette tanto ma aizaje póvera senza custrutto. Fuje uno d’ ‘e preferite ‘e Lavezzi ca pruvaje cchiú ‘e ‘na vota a lanzarlo ma assaje spisso non capette ‘e ‘ntenzione d’ ‘o Pocho e sprecaje bbuonissime canze (buone opportunità) uffenzive.
GARGANO 5,5 – Facette ‘ncazzà ô pubblico d’ ‘o san Paolo e a mme â casa mia quanno ô primmo tempo allontanaje ‘e bbrutto a Mascara, a Lavezzi e a Ccavani pe tirà ll’ennesima punizzione ‘nfacci’â bbarriera. P’ ‘o riesto ‘o solito cupione, cu tanti palle ricuperate e ppo perdute cu passagge sbagliate. Mazzarri ‘o sostituette troppo tarde, ma se sape ca è ‘nnammurato ‘e ll’ecchese muturino e lle chiagne ‘o core quanno ll’à dda cagnà! (ô 78° SOSA (s.v.)).
YEBDA 5,5 – Ati vvote fuje cchiú ntrillece (vivace). ‘O centrocampo napulitano resistette bbuono, ma mancaje chillu fricceco ( quel guizzo) ca ‘ncasa nun êsse maje vení meno! ( ô 68° PAZIENZA 6 – Vinte bbuone minuti ‘e muraglione (contenimento) senza correre gruosse pericule).
DOSSENA 5 – Comme a Mmaggio anze piezzo e ppejo;tanta corza, ma aizanno póvera; preferette dà ‘na mano ‘ndifesa e nun ce nn’era bbisogno. Ll’unica vota ca se ‘mpezzaje dinto a ll’aria spagnula periculosamente cu ‘nu crosso decente, Borja Valero tuccaje (vuluntariamente) cu ‘o guveto, ma ll’arbitro nun vedette o facette nfenta ‘e nun vedé e nun siscaje… Ce avesse miso ‘nu poco cchiú ‘e cunvinzione e accuratezza (impegno) avesse pututo essere ‘a ponta ca ce fósse vuluta dint’ô scianco d’ ‘e spagnuole.
MASCARA 5,5 – Chiammato a sostituí ‘o primmo ca fosse juto dint’ê chiavette ‘nfra ‘o Pocho e Marekiaro, ll’ecchese catanese furnette ‘na prova quase abbastante (sufficiente). Lesto a prufittà d’ ‘e fessarie spagnole, quacche volta êsse pututo tentà ‘o tiro, ma nun ‘o facette. Se cunfermaje ‘na alternativa trigliuta (valida), ma po’ fà meglio. ( ô 61° HAMSIK 5,5 – Trasette pe cercà ‘e dà ê suoje chillu sprinto ‘e cchiú ca fosse servuto pe truvà ‘o gollo d’ ‘o vantaggio, ma chi t’ ‘o ddà, nun ce riuscette… Nun è ‘o meglio mumento pe Marekiaro; âmm’ ‘a aspettà: trica e vvène pesante!)
LAVEZZI 7 – Pruvaje a essere ‘a luce d’ ‘o Napule, ma s’ appicciaje e stutaje a intermittenza,pure essenno ll’unico ‘nfra ll’attaccante napulitane a crià quaccosa ‘e ‘nteressante comme ‘e bbelli ppalle rialate a Cavani;nun se sparagnaje maje quanno s’êtt’ ‘a correre, e facette sia ‘o cesellatore (rifinitore) ca ‘a sponna d’attacco pe Ccavani. Fuje ‘o pierno (fulcro) d’ ‘o muvimento (manovra) napulitano: lanzaje, ammezziaje (suggerí), ‘nventaje bbelli passagge lammeccante (filtranti) e allezziunante (illuminanti) e , ma purtroppo nun ‘o seguettero a dduvere tutte quante! A pparte però ca voglio murí quanno ‘o Pocho centra ‘o specchio d’ ‘a porta cu ‘nu tiro ‘a luntano!
CAVANI 5,5 – Chiaramente stanco, riuscette a rennerse periculoso sulo dinto a quacche circustanza. Signaje ‘e capa, cu n’assisto ‘e Lavezzi ma se scurdaje ‘e ‘nu niente ‘a linia e fernette ‘nfuoriggioco ca ll’arbitro – naturalmente – vedette. Fallette po ‘a cchiú sapurita uccasione d’ ‘a partita perdenno ll’equilibbrio a ttu ppe ttu cu chell’anema longa ‘e Diego Lopezzo e se facette levà ‘a palla mmece ‘e passarla a Mmaggio ca steva sulo sulo a pporta spalancata!
All. Walter MAZZARRI 6 – Fuje suddisfatto d’ ‘a partita dicenno ca ô Napule ll’era mancato sulo ‘o gollo… e dicimmo ‘e sí appriesso a isso; abbastanza bbuono l’inzerimento ‘e Mascara. Aspetta a menà dint’â ‘mbrugliata (nella mischia) a Victor Ruizzo (ca forze vedimmo ô ritorno visto ca Aronica sarrà squalificato), ma ‘o cumpurtamento d’ ‘a difesa p’ ‘o mumento dà raggione ô misterro. Nun ne tène a n’ato comme a isso, ma Cavani è stanco assaje,sbagliaje quacche palla ‘e troppo e s’ammeretasse d’arrepusarse ‘nu poco, presempio dummeneca ca vène pure pe scanzà n’ammunizzione ca ‘o facesse squalificà p’ ‘a partita contro ô Milanno!Êsse ‘a ‘a fà ‘na bbona ‘mparata ‘e crianza a Gargano pe nun farlo cchiú accustà a tirà ‘e punizzione! ll’arbitro
NUN SACCIO ‘O NOMME 4 Arbitraje a ll’ingrese; mo no p’attiggiarse a mmartire d’ ‘a sciorta, d’ ‘e circustanze o d’ ‘a cattiveria (non per fare del vittimismo), ma nun è ppussibbile ca vedette fuoriggioco napulitane ‘e pochi centimetre,cugliette ‘ncopp’ô fatto ‘e napulitane pe scutuliarle sott’ô naso cartelline jalizze e rrusse e cu ‘e spagnuole ce jette cu ‘a murbidezza, cu ‘o siddivò e cu ‘o senza pressa e nun vulette vedé niente, manco ‘nu ricore lampante… E che saciccio! Bbona fine ‘e semmana.Ce sentimmo!
R.Bracale Brak