Cuntentammoce, ‘e cunte se fanno sottô lampione

E che ne parlammo a ffà, guagliú? I’, appena liggette ca ll’arbitro fosse stato Rocchi, m’’o ssentette ‘e scennere pe dereto ê rine ca jeva a fferní accussí e ca ce ‘ntussecavamo ‘a serata… E cumminfatte è succieso; se sapeva ca chist’anno ‘o scudetto ll’à dda vencere ‘o Milanno, e vvisto ca ll’Interre se sta accustanno n’ata vota, ‘a squatra d’ ‘o demmonio êva ‘a allungà ‘o passo e Galliani e cumpagne s’êvano ‘a accautelà (si dovevano premunire) accattannose (s’ ‘o pponno permettere…) arbitro e signalinie.Pe gghionta ‘e ruotolo ‘o Napule d’ajere ssera (parlanno cu dDio annante a ll’uocchie!) jucaje sí e nno ‘nu quarto d’ora e nun tiraje maje ‘mporta; ‘nzomma ‘a peja partita‘e ll’anno (cu ‘e ddoje contro ô Chievo) ‘a squatra ‘e Mazzarri ‘a facette proprio ajere a mMilano dimustrannòse ‘na squatra senza carattere , cu ‘na paura futtuta ‘e affrontà ‘na granna squatra tosta e prutetta,facenno puttanate ‘ncoppa a pputtanate, senza tirà ‘na vota ‘mporta (cuglienno ‘o specchio) cu ppassagge facile facile sempe sbagliate; ‘na squatra (‘a nosta) ca me parette nun ce stesse ‘mmiez’ô campo e ffósse restata a nNapule.’Nzomma jette a fferní ca purtato pe mmano ‘a ll’arbitro e dê signalinie, ‘o Milanno stravincette e ce facette vrognole vrognole! Pe mme cumunque sempe Forza Napoli!; mo se tratta ‘e aizà n’ata vota ‘a capa, scurciannose ‘e mmaneche pe gghí annante cu ‘a cunvinzione e ‘a mentalità ‘e ‘ na granna pe tentà ‘e vencere ‘o campiunato d’ ‘o terzo posto nun scurdannoce ca a ‘stu paese ògne anno se jocano dduje campiunate: uno, chillo pe primmo e siconno posto fatto pe Milanno, Interre, Roma, juventussa e n’atu paro (‘a fora d’ ‘o Napule) e ddoje chillo pe ttutte quante ll’ate………. Nun ce scuraggiammo e pacienza, pacienza si ajere fujeno dicisive arbitro e signalinie vedenno fuorijuoche ca ‘un ce stevano e ‘nu ricore faluoteco (bizzarro) ca ll’azziona vista e rivista â moviola dice sempe ca nun ce steva! E mettimmoce pure ‘a squalifica ‘e Lavezzi, ‘mbase a ‘na prova televisiva ca nun era nè cchiara né spappata (inequivocabile): pirciò certamente contro recolamento.. ‘Nu caso? E nun credo. ‘E milanise se songo ammenestate ‘o campiunato pe sparterse ‘e scioccele a uso lloro… Che ce vulimmo fà:tenòno cchiú ppóvera e sparano e nnuje âmm’ ‘a sentere ‘e bbotte! Pe pparta nosta pavammo ‘o fatto d’essere ‘na squatra giovane,senza ‘sperienzia e ssenza cazzimma ‘na squatra ca sentette troppo ‘a partita; ‘na squatra ca però po’ sulamente migliurà.Ce putimmo aizà ‘a terra: ‘o campiunato è ancòra luongo e nun ce riguarda; p’ ‘o mumento avimm’ ‘a cumbattere pe vencere ‘o campiunato d’ ‘o terzo e cquarto posto!Forza Napoli! ‘A vera uccasione Mazzarri e DeLa ll’ànnu perduta dint’â cuppetella ch’ era â purtata nosta; Era chillo ll’ubbiettivo overo e ppussibbile… A ccunte fatte ô Meazza ch’è ‘o campo cchiú minacciuso (più intimidatorio) d’Airopa, (quanti mmazzate ànnu pigliato soprattutto ê spalle Cavani, quanti Mascara, Marechiaro e Maggio ‘a tutte chilli delinquente comme Gattuso, Flaminí e Fambombello?Quante?Peffino ‘o police Pato s’è permiso ‘e tené ‘a tosse!),che speranze tenevamo? ‘A squatra teneva dint’ê ccosse ‘a partita ‘e ggioverí,era sistematicamente minacciata e mazziata ma cu ttutto chesto ‘o Milanno, senza ‘o ricore rijalatele ‘a ll’arbitro Rocchi,avesse faticato pe ppassà e ccerto nun avesse sbracato.È ll’ora ‘e scetarce dê suonne pecché si ancòra quaccuno nun ll’ êsse capito,avimmo ‘a sudà paricchio pe centrà ‘a Ciampionsa (e nun è ccerto, visto ca ll’Udinese e ‘a Lazio stanno rimuntanno).Pirciò zitte e mmucce speranno ‘e cogliere ‘o terzo posto o ô mmacare ‘o quarto prummiso dô presidente.’Na cancariata (un appunto) ca pozzo fà a Mazzarri è cchesta: aveva ditto, tiempo fa, ca avessero sempe jucato no chille ca isso chiamma titolarissimi, ma chille ca penzava stessero cchiú ‘nforma.Pecché nun ll’ò fatto? Ajere ssera Gargano,Dossena,Maggio e Aronica (ricore a pparte) nun se putettero guardà, pe nun parlà ‘e Mascara, ca cu ttutto ca chiuveva fuje cacchio ‘e aizà póvera!Po me piacesse ‘e sapé comme se fa a gghiucà ‘nu campionato sano cu ‘nu reparto uffenzivo furmato sulo cu Cavani. Meno male ca è ppassato ‘o mese ‘e fevraro, chillo cchiú smaleditto (quello piú nefasto).Mettimmo speranze ô mese ‘e Marzo e â primmavera ca à dda arrivà! ‘Nzintesi e tiranno ‘a somma, bbrutta partita d’ ‘o Napule chella d’ajere ssera cu tutte ‘e jucature tiseche, appaurate e preoccupate.’O ricore ca sbluccaje ‘o risultato nun ce steva e cumunque era ammagagnato (falsato) pe ‘na precedente mancanza ‘e Ibraimoviccio ‘ncuollo a culo’echiummo-Cannavaro e , a seguí, ‘a ‘na rovesciata cu gghiuco periculuso ‘e Flaminí. ‘A chillu punto ‘e jucature luvarde (azzurri) perdettero cumpletamente ‘a capa, sbracajeno malamente libberanno ‘o contropiede d’ ‘o Milanno.Mo êsse ‘a mettere ‘e ppaggelle, ma doppo chello ca aggiu ditto se capisce ca cchiú ‘e 5 nun po’ averlo nisciuno anze Gargano,Dossena,Maggio e Aronica, Marekiaro e Mascara nun s’ammeretano cchiú ‘e 4,5 Nu discorso a pparte pe Mazzarri e lle dongo 4. Nun putimmo dicere ca se trattaje ‘e ‘na serata storta quanno Abbiati fuje spettatore senza pavà pe tutt’ ‘a partita e ‘o centrocampo milanista gigantiggiaje ‘ncopp’ a Gargano e Pazienza, annullanno pure a Marekiaro. Ô ccuntrario partita liggiuta assaje bbuono ‘a Allegri ca custruette ‘na granna cajola ‘mmiez’ô campo tenenno sotto cuntinua pressione a Dossena e a Mmaggio ca nun putettero scucuzzarse (sganciarsi), mentre ‘a difesa scupaje pressarulamente (frettolosamente) annante â bbona ‘e dDio mannanno pallune inutile pe Mascara e Cavani. Facette trasí troppo tarde Zuniga e Yebda. Arbitro e signalinie 3. Me facettero avutà ‘o vernecale (lo stomaco) e tanto avasta. Cuncludo arricurdanno a ttutte quante ca ‘e granne jucature ‘a trenta meliune d’evere nun ce ll’âmmo putute permettere e nun ll’âmmo accattate.Cuntentammoce pirciò ‘e frijere ‘o pesce cu ll’acqua e ‘e campà ‘e speranze ‘a cca nsino â fine d’ ‘o campiunato.Comme diceva Bettina ‘a rossa: ‘E cunte se fanno sottô lampione. Iammo annante e pruvammo a divertirci cu ‘e prossime unnece partite â faccia ‘e tutt’ ‘e ssecce,ma senza fà castielle ‘nn’ aria e nun perdenno ‘e vista ‘o terzo o ‘o quarto posto. Ce sentimmo!Bbona salute.
R.Bracale Brak