Pampa, nuje viecchi tifuse napulitane nun ce scurdammo ‘e chi à sempe annurato ‘a maglia d’ ‘o Napule e pirciò nun ce scurdammo ‘e te ca sî uno ‘e chill’urdeme bbuoni cumbattente ancòra rummase ‘ngiro cu ‘e scarpette ô pere; purtroppo ‘o presidente Aurelione, ‘o rre d’ ‘e bbleffature, ca ‘o pòzzano secutà…, nun ‘a penza comme a nnuje; quanno te ne jste dicette ca pe tte ce fósse stato sempe ‘nu posto, ma, ô ssolito, ahimmé, diceva ‘na cosa e ne penzava n’ata e nun appena tu aviste ‘a nicessità ‘e faticà quase cercanno ‘a llemmosena te ‘nzerraje ‘a porta nfaccia e fuste custretto a tte nne jí addirittura ‘nsiconna divisione a ‘nu paisiello ‘a do’ sî stato custretto a te ne fují pe bbia ca t’ànnu minacciato addirittura cu ‘na cacafuoco…. E è nnaturale ca ce sî rummaso male; nun te ll’aspettave ca succedessero ‘sti ccose ( sto parlanno d’ ‘a ‘nfamità ‘e Aurelione e d’ ‘e mminacce avute…), ma a nnuje nun ce à ‘mpressiunato ‘o fatto d’Aurelione: nuje simmo abbituate ê cchiacchiere e ê prumesse ‘e marenaro d’ ‘o Presidente nuosto! Mo però spero sulo ca ‘e tifuse overe smuvessero ‘nu poco ll’acqua pe farte riturnà cu ‘e scarpette ‘ncampo o cu ‘e mucassine arreto a ‘na scrivania pecché saccio ca tu ‘a chillu bbuono guaglione ca sî, mudesto e ssignore, accettasse, senza grossi pretese, qualunque ‘ncarico…. e pecché accussí se cumportano ll’uommene overe comme tu sî! Aspetto ‘e vederte ancòra a Napule e te faccio ll’augurio ca succedesse ampressa pe riturnà a essere abbracciato dê tifuse tuoje ca te ponno fà scurdà chella bbrutta facenna ca t’ è capitata luntano a Napule…Torna, ‘sta casa aspetta a tte!
Forza Pampa e sempe forza Napoli!
R.Bracale Brak