Caro Presitento,me songo liggiuto ‘o resoconto d’ ‘a partita ‘e ll’Argentina cu ll’americane e aggiu liggiuto ca a ffà ‘e lucialucia (a brillare) è stato soprattutto ‘o trio uffenzivo Messi-Lavezzi-Di Maria, ch’ à ‘mbriacato ‘a difesa mmericana… e i’ me so’ ffatto ‘nu suonno, ‘nu bbellu suonno!
‘O ssaccio, ‘o ssaccio ca p’ ‘o suonno mio ce vulesse ‘na cifra bblu,ma mettenno dint’ô carusiello chello ca se putesse recogliere vennenno a Marekiaro e ô cainato Gargano, ‘a cifra se po’ scagnà ‘e paricchio… e ppo penzo ca cu ‘a cumpetenza vosta ‘e managgerro, cu ‘e sponsorre juste, cu ‘e diritte TV, cu n’ajuto particulare ‘e tutte ‘e tifuse e coccos’ata ca nun saccio, ma ca vuje ve putisseve ‘nventà , putessemo fà turnà ll’ebbreca ‘e Maradona; Messi è ggiovane,Di Maria tène 23 anne e cu Lavezzi e Cavani facessero stravedé pe quatto, cinch’anne e pure ‘e cchiú vincenno scudette, Coppe eccetera! Ce penzate presidè?‘E ricave criscessero esaggeratamente, ll’icona ( l’immagine) d’ ‘o Napule e ‘e Napule se raffurzasse dint’ô panurama mundiale (arricurdateve ca si ‘o Napule è cunosciuto pe tutto ‘o munno è soprattutto pe bbia (per merito) ‘e Maradona); e songo certo ca uno comme a vvuje fosse sicuramente capace ‘e ggestí ‘nu clubbo cu ‘sti campiune, ‘e tifuse radduppiassero, ‘o merchandisingo jesse ê stelle . E songo certo ca tutte ‘e tifuse, malate p’ ‘o Napule , come a mme, fossero pronte a sottoscrivere ‘na bella cifra a ffavore d’ ‘o Napule, sotto forma ‘e abbunamente pluriennali o qualsiasi auta diavularia ve ‘mmentasseve……M’arricordo ‘e Maradona comme fosse ajere e m’arricordo ca ‘e bbraccia me se facevano pecune-pecune sulo a sentirlo annummenà dint’â furmazzione dô spikerro d’ ‘o S. Paolo, e mm’arricordo ‘a scigna (la rabbia) ‘e ‘mmiria ca curreva dint’ê vvéne ‘e chelli società ca vuje chiammate “le 3 genoveffe”……Presidè e che desse pe ffà turnà cu Messi, Di Maria e chill’ati dduje chilli tiempe ‘e maraviglia!!!!!!!….. Nun me pigliate pe pazzo, presidè,ve voglio bbene e penzatece ‘a coppa………..
R. Bracale brak