‘O signurino De Laurentis è turnato a appresentarse â Leca Carcio cchiú’ncazzato d’ ‘o ssolito e à ditto, parole soje: «La Juve se ne stia a casa sua, il mio allenatore è blindato per altri tre anni, oltre a questo che deve finire. Se, nel 2016, Mazzarri vorrà andare a lavorare alla Juve, potrà andarci». «Quello che trovo molto squallido – (à agghiuntato) – è che si dia per scontato che tutto sia vendibile e tutto comprabile. Mazzarri non è sul mercato. Il giorno che io dovessi dire che non va bene più per il Napoli perchè si è interrotta la nostra stima reciproca e la nostra volontà di lavorare insieme, allora sarà sul mercato. Io sono molto contento di averlo individuato tre anni fa, poi ho dovuto aspettare perchè non sono stato fortunato ad averlo prima del tempo».
E fino a cca niente ‘a dicere: so’ d’accordo e m’ è ppiaciuto chello ca à ditto, soprattutto pecché ce ll’à cantata dint’ê mustacce â juventussa… Po però, aummo aummo à cacciato fora ‘a canzona d’ ‘o Piano quinquennale… Spero ca ‘o Cielo m’ ‘o ffacesse vedé!….Cinch’anne capite?…. E chi m’assicura ca ce stongo ancòra? Presidé arricurdateve ca ‘e cunte a lluongo addeventano sierpe… A mme e a nnuje ce piaceno ‘e ccose frijenno magnanno… ato ca cinch’anne pure pecché aggiu sempe saputo e fforze ll’aggiu pure già scritto ca ‘o primmo punto ‘e n’ imprennetore è ‘o pruggetto aziennale e me pare ca De Laurentiis, si nun me sbaglio nun ll’à maje, maje presentato. Mo, finalmente, ‘o Presidente è asciuto ô scupierto e ce fa sapé, cumpassiona soja (bontà sua), ca ll’ubbiettivo pe chist’anno è ‘o quinto posto: ‘o quarto ‘e bbullito! Ora mo, visto ca ‘o Padrone è isso, nuje comme a ttifuse nun putimmo ca pigliarne atto e chijarcela a llibbretta…, pure si me pare ‘e puté ddicere ca ‘o signurino avesse pututo fà chiarezza ô pprincipio ‘e ll’anno; ‘o pputeva dicerlo a Jennajo, quanno tutti ‘o precavano ‘e rinfurzà ‘a squatra.Certo si nun ‘e ttene o è stritto ‘e pietto uno po’ pure capí, ma no cumpartecipà ll’accurtenza soja ‘nfacci’ô portafoglio (sul piano economico). Ma avimmo a fforza ,pe comme ‘a veco io, tené cchiú ‘e ‘na ‘ncertezza (dubbio) ‘ncopp’ a ll’effettiva rializzazzione d’ ‘o pruggetto pruposto aliasse ‘o piano quinquennale. ‘Sti piane quinquennale s’ausavano sott’ê reggime cumuniste e spisso spisso, mi risulta, nun erano nè songo purtate a ttermine: morono pprimma, o lloro o chille ca aspettano ca se portano a ttermine!
Cumunque, si ‘stu piano a lluongo esiste overamente, me pare ca ‘e jucature ca ce stanno mo, (‘a fora ‘e quaccuno,) nun songo jucature prugrammate p’ ‘o ddimane (proiettati nel futuro). E cchesto ce fa ‘ntennere ca o ‘o pruggetto è fauzo (fasullo) o pure è ppartuto cu ‘o pere sbagliato! Cumminfatte nun avasta avé azzeccato n’ acquisto comme a Ccavani pe senterse a ccavallo e mmetterse ‘ntusiello o saglí ‘ncattedra a puntificà. Ògne anno ‘a storia d’ ‘o Campiunato cagna pecché ‘e prutaguniste se rinforzano…. e nnuje stammo a gguardà!
‘O signurino Presidente,pe mme, o sonna o ce piglia pe cculo.E nun è ‘a mo ca so’ cunvinto d’ ‘a siconna potesi!
Brak