Nun ce azzecca niente cu ‘o pallone, ma ‘o fatto è ttroppo sfezziuso pe nun parlarne e ddicere coccosa ‘ncopp’ô sputtanamiento (smacco) d’ ‘e Savoia. Tutte ‘e ggiurnale ànno purtato ‘a nutizzia ca p ‘ ‘o matrimmonio d’ ‘o principe William cu Kate Middletone, ‘e riale ‘ngrese ànnu ‘mmitato ‘na cosa comme a mmillennoviciento perzone. Embé ‘nfra tutte chesti perzone nun ce sta nisciuno discennente d’ ‘a schiatta d’ ‘e Savoia, mentre risulta ‘mmitato don Carlo di Borbone, erede del Reame delle Due Sicilie. Ora mo vulesse dicere soprattutto a ttutt’ ‘e Carignano e cchiú ppoco a ll’Aosta:
nfino a quacche anno fa ve schifàvamo sulo nuje napulitane degne ‘e ‘stu nomme…., po chianu chiano tutto ‘o riesto d’ ‘o meridione…; dinto a ll’urdeme anne cu tutto chello che avite arrubbato cca bbascio e carriato â via ‘e coppa, cu ttutto chesto site riuscite a farve schifà pure dê nurdiste…; ogge venimmo a ssapé ca site state ca**e ‘e agguantà ‘o tracuardo ‘e farve schifà ‘a tutta ll’Europa,e penzo ca si nun mullate e ve dedicate a frequentà ‘nu poco ‘e cchiú ‘o riesto d’ ‘o munno dinto a ppocu tiempo riuscite a ffarve schifà dô munno sano. Tenco bboni speranze, anze so’ ccerto ca cu ‘e straurdinarie capacità voste putite cunquistà ‘o primato d’ ‘a schiatta cchiú schifata e schifosa ‘e ll’univerzo! Schiatta riale? Addó?! ‘E riale nun tenite niente: jate a spugnà ‘o vascuotto cu zzoccole e vajasse, cammarere e zambracche…,state ‘mplicate cu droca e ghiuoco pruibbito…, facite pubblicità ê ppapaccelle…, sparate addó coglio coglio comme ê sceriffe d’ ‘o Far Uesto, stunate canzunette sfranciose (ridicole) o ruffiane ca nun se sentono neanche dint’ê cchiú ppejo sceneggiate napulitane ‘e Pino Mauro…, jate a ffà ‘o bballo ‘e ll’urzo ‘mpertinente…. e pe gghionta ‘e ruotolo ve permettite ‘e chiaitarve ‘na cosa ‘e sorde dô cuverno ‘taliano!… Ma nun ve mettite scuorno? Ma ‘a do’ site asciute fora?…Me dispiace sulo p’ ‘a signora d’ ‘e vascuotte Doria…
Pe cquanto ricuarda ‘a nazziona ‘ngrese se vede ca doppo tutto chello ca ce cumbinajeno Gladstone e Palmerstone, se vede ca finalmente stanno arrivanno ‘e primme rimurdemiente (i primi rimorsi). A pparte po ca ‘ngenerale ‘e Savoia nun s’ànn’ ‘a ‘mmitarle maje pecché chi ce tène a ll’argenteria sape ca po’ sparí cchiú ‘e ‘nu piezzo! Cuntrullate: Vittorio Emanuele IV e Filiberto dint’ê code d’ ‘e fracchisciasse (frac) o d’ ‘e cafè a ddoje porte (marsine) tenono ‘e sacche p’annasconnere ‘a rrobba comme a don Liborio ‘e Caviale e Lenticchie. A pparte ancòra ca doppo chello ca Vittorio Emanuele IV e ‘o frate cucino Amedeo d’ Aosta combinajeno ô matremmonio d’ ‘o principe ‘e ll’ Asturie Felipe di Spagna,quanno cioè se paccheriajeno ll’uno cu ll’ato comme a dduje vatecare (carrettieri) ‘int’â cantina, prubbabbilmente Juan Carlos ‘e Borbone-Spagna avrà mannato a ddicere ê riale‘ngrese: “O nosotros o vosotros(O noi o loro)!” Sua Altezza Reale don Carlo di Borbone- Due Sicilie ce rappresentarrà currettamente (degnamente) comme popolo d’ ‘e Ddoje Sicilie e nno cumme ‘taliane. E mmeglio accussí; nun putévamo farce rappresentà dê Savoia ca so’ ‘na barzelletta sconceca e cafona (volgare) p’ ‘a storia ‘e ll’Italia e de ll’ Europa.
‘Sti pagliacciune lloco ponno truvà spazzio sulo ô circo equestre, ô Bagaglino o â televisione ‘taliana sempe però tenennòle luntano dô putichino e dâ cassa!
R.Bracale Brak