Guagliú, missione cumpiuta: ‘o Napule ajere ssera s’abbuscaje ‘o punticiello ca lle serveva p’apprudà direttamente ‘nCiampionsa senza preliminari ‘mpicciuse e apprettature (fastidiosi), pe ccuje bbicchiere ‘mmano e dicimmo ‘ncoro: Aiza, aiza aiza, acala, acala,acala, accosta, accosta, accosta ‘stu bbrinneso â saluta nosta e se magnassero ‘o limone chille ca nun ponno vedé!
Comme avevo abbunnantemente previsto se trattaje ‘e ‘na cranna pastetta o biscotto comme diceno ogge ‘e cchiú guagliune… ‘O ssaccio ca nun è bbello nè spurtivo, ma nun simmo asciute ajere ‘a sott’ô mantesino e sapimmo ca quanno ce vo’, ce vo’… E allora, pastetta! Cumminfatte Napule e Interre facettero vedé ca stevano facenno overo sulo pe ‘nu tempo ( ‘o primmo), po pure ‘e cchiú capoteche ‘e ll’Interre (Eto’o, Maiconno, Milito e soprattutto ‘o si’ pochiello ciappunese, ca nun me ricordo ‘o nomme)ca nun ne vulevano sapé, se facettero capace, capettero ‘antifuna, s’accarmajeno, ‘e ddoje squatre se spartettero ‘a posta e ‘o Napule putette festeggià centranno chillu punticiello decisivo pe s’assicurarse ‘o terzo posto sicuro cu ‘na jurnata d’ ancérca (anticipo).
Mo doppo tutto chello ca aggiu ditto nun tenesse senzo fà ‘e ppaggelle, ma ‘e ffaccio pe nun perdere ll’abbitudine e ppe ll’amice ca m’ ‘e ccercano; però avviso ca, tenenno presente ‘o risultato ca ‘e guagliune cuane ànno agguantato doppo n’annata commifò, pure si ‘nu poco ‘nquacchiata cu tre o quatte urdemi partite sballate,so’ quase custretto a mmettere allimmeno seje a ttutte quante (pure a cchi ajere ssera avesse pututo fà coccosa ‘e cchiú e nun ‘o facette…) e assignà ‘nu miezu punto ‘e cchiú a cchille ca me parettero cchiú pronte e dicise a fà crescere ‘a pastetta. E vedimmo:
DE SANCTIS 6,5: ‘O gollo ‘e Eto’o francamente fuje ‘mparabbile,ma isso fuje acàbato (perfetto) riuscenno a repuzà (respingere) ‘na delósa (una chiara) uccasione ‘e gollo ‘e Milito ô pprincipio d’ ‘o siconno tempo.
CANNAVARO PAOLO 6 Urdinaria amministrazzione pe culo’echiummo.
ARONICA 6 S’’a cavaje cu ‘a nicessaria empreja (esperienza), ma specie ô primmo tempo cocche vvota peccaje ‘e distraíto (distrazione).
CAMPAGNARO 6 Nun fuje difficile ‘a serata d’ ‘o Toro pure si ô primmo tempo l’Interre jucaje e avesse pututo fà cchiú mmale si nun ce fósse stata ‘a pastetta appruntata…
DOSSENA 6 Me parette ‘nforma, ma tutt’ ‘e diaperune (traversoni) suĵe senza Cavani o n’ato capace ‘e jucà ‘e capà nun servettero a nniente!
(VITALE 6 ‘E stima.)
PAZIENZA 6 Currette assaje e ll’attuccaje ‘e fà ‘a solita fatica sporca e scura.
GARGANO 6 Se facette truvà pronto, ma ‘o seje ll’ave p’ ‘a premessa ca aggiu fatto, no pecché s’ ‘o mmeretaje ‘ncopp’ô campo. Penzo ca fuje ll’urdema vota ca ‘o vedettemo ô san Paolo cu ‘a maglia luvarda.
HAMSIK 6 Se nutaje poco,e ll’unica jucata bbella fuje ‘na cuncrusione ô pprincipio d’ ‘o siconno tempo quanno però truvaje Julio Cesaro pronto.
ZUNIGA 6,5– Cu De Sanctisso (finalmente cu ‘na divisa seria!) ‘o meglio d’ ‘e cuane, nun sulo p’ ‘o gollo fatto ca vale assaje assaje, ma p’ ‘a corza senza sparagno e p’ essere stato sempre presente dint’ a ‘nu rollo ca nun è ‘o suĵo (in un ruolo non suo).
MAGGIO 6,5 Ll’attocca ll’applavuso nun sulo p’ ‘e ttanti chiusure difenzive ‘ncuollo ô ciappunese, ma p’avé capíto ca chillo era ‘o mumento adatto pe cartïà ‘a difesa ‘nterista, ca chello aspettava pe farse cartïà, e cuncretizzà ‘a pastetta agguantanno ‘o pareggio.
LAVEZZI 6,5 Partette bbuono e ‘a n’accelerazzione sòja ‘o Napule avesse pututo jí ‘nvantaggio, po ricalaje â platea mumente ‘e bbellu juoco e ricate (dribblings) ‘a retiro d’ ‘a patente.
MAZZARRI ( ALL.) 6,5 Nun era facile purtà â casa ‘stu pareggio, spicialmente doppo d’ ‘o gollo ‘e chella capa ‘e ca**o ‘e Eto’o ca nn’aveva capito ‘o fatto e aveva miso paura ê guagliune cuane.Pe furtuna po ‘e fatte s’accunciajeno e Walterino (ch’i’ ‘a ajere ssera chiammo donn’Amalia â Speranzella ) vedette ca ‘a pastetta s’era gunfiata bbona e se putevano frijere pastecrisciute, panzarotte e sciurille pe fistiggià n’annata mutòda (favolosa) e si ‘a squatra è arrivata accussí ‘ncoppa bbona parte d ‘o merito è proprio ‘e donn’Amalia ca ajere ssera ‘mmece ‘e s’appresentà cu ‘o custume d’ ‘a cerimonia pe fistiggià s’appresentaje cu ‘a grisaglia ‘e viaggio pe fà capí chiaramente ca steva cu ‘e bbalice pronte…
LL’ARBITRO DE MARCO 5; 4 ‘e stima, ma 6 pe nun avé fatto sgunfià ‘a pastetta: media 5
Ce sentimmo llunnerí ca vène, si Ddi’ vo’. Staveti bbe’!
R.Bracale Brak