Guagliú, comme ‘o Cielo vulette ajere chillu pallone trasette dinto…., ma che parpitazzione! Mo però, doppo ‘stu passo ‘mpurtante fatto p’arrivà ‘nCiampionsa, cunzentiteme d’essere chiaro: sempe forza Napoli, se capisce, ma p’ajere ssera perzunalmente nun veco niente ‘a strissemà (celebrare) pecché se po’ essere semplicemente cuntente p’ ‘o fatto d’ arrivà ‘nCiampionsa,ma pe strissemà o festeggià ce vonno fatte cchiú cauzante,e âmm’ ‘a rimannà tutto a cquanno e si vincimmo quacche trufeo, visto ca nfino a mmo nun âmmo vinciuto ‘o riesto ‘e niente!Cu cchesto nun voglio levà niente ô straurdinario campiunato fatto ‘a chistu Napule; epperò penzo ca si sultanto se fosse vuluto e creduto s’êsse pututo fà coccosa ‘e cchiú nun dico pe levà ‘o scutetto ô Milanno (cosa dint’ô Palazzo) ggià dicisa ‘a tiempo, ma allimmeno pe restà ô siconno posto dànno ‘nu pizzeco ‘e pepe ô campiunato ‘nfra fevrajo e mmarzo!Mo si cu st’urdeme tre partite ce cunfermanno ô terzo posto e ghiammo ‘nCiampionsa,penzo fosse justo e nicessario fà tre o quatto acquiste ‘e spessore e nun sultanto ‘e pruspettiva sempe speranno ca ll’anno ca vène ‘a suggità ‘ntennesse luttà ggià dô principio p’ ‘o scudetto pure si ‘e ccose ‘e dimane aggio paura ca nun sarranno comme chelle ‘e chist’anno! Forza Napoli speranno ca ll’anno ca vène fósse chillo ca vincimmo coccosa. Venimmo ê ppaggelle:
DE SANCTIS 6 ‘e stima: Pe cchello ca facette, s’êsse pututo pure stà â casa…Disoccupato pe tutt’ ‘a partita; ma pecché se nfessisce a metterse chella jettatoria divisa blu-savoia? Ajere ce jette bbuono, ma nun vulesse ca ‘na vota o ll’ata succedesse ‘a disturbata!
CAMPAGNARO 6+: Quacche vota Floro Flores le sfujette, ma – tutto summato – fuje assaje pusitiva ‘a partita d’ ‘o ‘toro’ argentino ca pruvaje pure a sunà ‘a carica quanno quacche cumpagno s’appapagnaje (si assopí).
( dô 49° s.t. SANTACROCE s. v.: trasette pe fa rispirà ‘o toro e pe fà muro a ll’urdimi periculuse mumente)
CANNAVARO 5+: Sulo ‘na vota smarrunaje malamente, ma pe furtuna senza cunzeguenze…, mancanno n’anticipo durant’ôprimmo tempo, ma riuscette ‘e ‘na manera o n’ata a mmettere ’a musarola a Paloschi e ringrazziammo ‘o Cielo! ‘O vizzio ‘e jí a rrompere ‘o pasticciotto ê cumpagne suĵe dinto a ll’aria ‘e ricore avverzaria, senza cunchiudere niente…, nun s’ ‘o vo’ levà!
ARONICA 6: Putette azziunà a mmestiere ‘o pede mancino sujo facenne girà palla visto ca ‘mpratica nun êtt’ ‘a marcà a nisciuno.
MAGGIO 6-:Me parette ancòra troppo preoccupato; nun è ancòra isso, ma pure si a ffatica,smestaje (spinse) cu custanza (continuità) ‘ncopp’ â curzia ‘e dritta cu ttutto ca, pe gghionta ‘e ruotolo, ‘e russeblú sistematicamente ‘o mazzulajeno (e l’arbitro zitto!).
GARGANO 6-: Smarrunaje ô ssolito suĵo ‘sbaglianno ‘a mesura d’ ‘a circulazzione ‘e palla a pochi minute dô sisco finale, ma fuje bastantamente viguruso (energico), tuosto e sulerto (dinamico) lla ‘mmiezo ô campo.
PAZIENZA 6-: ‘O ttureno pesante e ‘nfracetato d’acqua nun ll’ajutaje, ma ll’applicazziona soja (il suo impegno) fuje come ô ssolito priggevola (encomiabile).
(dô16° st YEBDA 6: Trasette subbeto ‘mpartita e poco mancaje ca un truvasse ‘o gollo cu ‘na capata!)
DOSSENA 6 +: A isso ‘o ttureno pesante e ‘nfracetato d’acqua ll’ajutaje e dimustraje tanta bona vuluntà quanno se trattaje ‘e smestà, ma fuje pure assaje presente quanno s’êtt’ ‘a difennere.
HAMSIK 6,5: sta assuttiglianno sempe ‘e cchiú ‘e minute ca joca: nurmalmente nun ghioca cchiú ‘e diece, quinnece minute; ajere scennette addirittura a cinche minute, ma pe ggrazzie d’ ‘o Cielo ll’avastajeno pe truvà ‘o lampo (il guizzo) finale ‘a tre ppunte; p’ ‘o riesto dinto a chille cinche minute riuscette a cosere attacco e centrocampo e se ‘mpignaje pure a difennere.
(dô 41° st MASCARA s.v.: Sulo pochi minute finale ‘e corza e cupertura d’ ‘a fascia ‘e dritta, quanno ‘o misterro mudificaje ‘o motulo passanno ô 4-4-2 )
LAVEZZI 6-: ‘E ssolite finte e controfinte, ‘e soliti scatti e driblinghe cu pocu zuco, e comme ô ssolito suĵo lle mancaje sempe ‘a freddezza nicessaria sotto â porta.
CAVANI 5,5: Nun fuje ‘mpalla e se vedette, ma po’ capità pure ê meglie ‘nu mumento ‘e padiébbulo smattimiento (leggero appannamento). ‘Nu poco cazzumio (egoista) dint’ê sidice metri, ‘nu paro ‘e vote ll’êsse pututo darla a ô Pocho (ca quase certamente ‘a sbagliava…) ma nun ‘o facette!
all. MAZZARRI 5.5 ‘E difette suĵe fujeno ‘e solite: chillo ‘e ‘nfessirse a ffà jucà pure chille ca nun stanno ‘nforma e cchillo ‘e nun cagnà modulo pure vedenno ca ‘e ccose nun stanno jenno bbuono; n’atu difetto gruosso ca tène è cchillo ‘e distruggere cierti jucature: ‘o facette cu Datolo, Cigarini e Denisso…., mo nun vulesse ca ‘o ffacesse cu Ruizzo!
arb. GAVA 5,5 Quanno a ffrevajo arbitraje ‘a partita d’ ‘o Napule contr’ô Catania i’ lle mettette seje e mmiezo e screvette: Finalmente ‘nu sischetto ca arbitraje a dduvere senza aizate ‘e cape e fessarie grosse. Forze pecché st’avvocato tène trentaseje anne è gguaglione e nun è ancòra trasunto dint’ô ggiro d’ ‘e sischette allezziunate…. Damme tiempo ô tiempo!
C’è vuluto poco; cumminfatte ajere ssera sott’ô delluvio siscaje sempe contro a nnuje, cunzentette ê genuane ‘o juoco pesante e ccarogna, senza maje sanziunarlo e nun ce dètte ‘nu ricore!
Ce sentimmo.
R.Bracale Brak