Guagliú, cca se continua a ffà troppu pparlà e nun se vede nisciunu fatto cuncreto; ‘stu mercato d’ ‘o Napule è ffatto sempe cchiú ‘e chiacchiere e ttabbacchere ‘e lignammo chelle ca ‘o Bbanco nun ne ‘mpegna e s’arriseca schitto (solo) ‘e farce fottere ‘a sott’ô naso dâ genuveffa janca e nnera o da quacche ata genuveffa quacche affaruccio ca se tenta ‘e nciarmà… Se parla troppo e nun se tira ‘nu capo ‘nterra! E ‘mmece s’ànn’ ‘a fà subbeto cchiú ‘e ‘nu fatto pe nun correre ‘o periculo ‘e fà ‘o bbisso d’ ‘o fatto ‘e Inlerro ca ‘a juventussa ce à futtutto comme ce po’ ffottere a Palacios e a Lamela ca ‘mmece a nnuje ce servono comme ô ppane pe sistemà ‘nzieme a Yebdà ‘a linia ‘e centrocampo doppo ca Inlerro nun è arrivato cchiú, ca âmmo perzo a Michelino Pazienza e ce âmmo assulutamente levà a Gargano ca oramaje aiza schitto póvera… Jammo annante: comme sapimmo tuttu quante ô Napule serve pe ll’attacco ‘na bbona riserva antribba e ddúnata (esperta e capace)e i’ pigliasse proprio a Gilardino (lassanno perdere a cchellu viecchio guallaruso ‘e Trezeguetto , ch’ è rrutto e scartavetrato, ‘a fora ch’è n’ecchese ‘nquacchiato juventino allurdato d’ossazza… e è troppo trancato (statico) p’ ‘o juoco nuosto) o allimmeno a uno ca ‘nserie A avesse ggià dimustrato ‘e valé assaje (Pellissier).E lassasse perdere pure a Bianchi ca nun vale ‘a ballerina Calaiò, e ca ggià ‘na vota rifiutaje ‘a piazza ‘e Napule e ffósse finalmente overamente ‘o caso ‘e attappà ‘o canale “ànno jucato dint’ â Riggina” (vuó vedé ca arriva pure Modesto?) manco ‘a Riggina fósse ‘o Riàl Madriddo o ‘o Barcellona…; nun ce simmo: ‘a Ciampionsa esigge ata ggente! Enun ce ll’âmm’ ‘a fà fottere ‘a sott’ô naso!
R.Bracale Brak