Aggiu liggiuto ‘ncopp’ a ‘nu ggiurnale ca l’onorevole (eh! proprio accussí!, onorevole, ah, ah, ah, ) Bersani à dichiarato quanto segue:«Mazzarri alla Juventus? Lo prenderei súbito, lo dico chiaramente. Ma alla Juve ci vuole una politica solida e stabile per rafforzare una squadra che ha fatto sí qualche passo, ma che deve farne tanti altri per ritornare nel giro vero»; ma po à ditto, dispiacennose assaje ‘e tené ‘a sensazzione ca Mazzarri nun ce va â juventussa; mo chi parla accussí dimostra sulamente tutta ll’autanza (l’arroganza) nun sulo d’ ‘e viecchie e nnuove cumuniste, ma pure chella ‘e tutte ‘e tifuse nurdiste, pecché cu ‘e pparole soje dà pe scuntato ca ‘a Suggità piamuntese po’ ffà chello ca vo’ e ca, anze, à tenuto ‘nu cumpurtamento a ssunna (a regola)! Vulesse arricurdà ô tifoso Bersani, ca chillu chiachiello ‘e Mazzarri tène ancòra ‘nu cuntratto ‘e duje anne cu ‘o Napule e che è stato ‘nu cumpurtamento scrianzato e sulòpato (scorretto e subdolo) ‘a parte d’ ‘a juventussa (e nun me pare ch’ è proprio ‘a primma vota…) a contattà ‘ncustanza ‘e cuntratto ‘o misterro nuosto, dimustranno ‘na cranne mancanza ‘e serietà, tutto cu ll’acàbato (il perfetto) stile janco e nniro!Mo si Mazzarri se ne va e sbarca a Torino, succede pe ‘na cuncessione d’ ‘a Suggità Calcio Napoli; a meno che, comme i’ spero, nun s’à dda accuntentà e restà stipendiato e luntano dâ Mole Antonelliana, cu ‘na canna ‘mmano a guardarsi ‘o golfo ‘e Napule p’ ‘e dduje anne venitiere (per i prossimi due anni), mentre ca ‘a squadra luvarda joca a ll’ordine ‘e n’atu misterro!
R.Bracale Brak