‘stu Donadel(lo) è ‘nu punto ‘nterrogativo

‘O nummero uno d’ ‘o Napule p’ ‘e juorne passate parlaje pure ‘e mercato.Riferisco mo parola pe pparola chello ca ‘on Aurelione dicette e ‘o ffaccio (pe nun me sbaglià a traducere (tradurre)) ausanno ‘o ttaliano, comme facette isso ca dicette «Bigon è tornato adesso da una breve e salutare vacanza. Operiamo e continueremo a farlo in maniera costante e intensa. Dico a tutti di stare sereni. Il calciomercato chiude il 31 agosto. Noi lavoriamo a fari spenti, a testa bassa, in maniera umile e con grande dedizione per la causa azzurra. Io mi considero un cavaliere al servizio del Napoli – disse De Laurentiis -, mi sono imposto un ruolo di paladino affinchè questa Società non abbia piú problemi economici, non rischi piú di scomparire dal grande calcio e prosegua nella sua crescita. State tranquilli, lavoriamo per voi…».
Mo che pozzo dicere? Sulo chesto: Bellissime pparole, Presidè. Quanno vuje parlate site sempe assaje sciarmante ( sempre molto affascinante)…, po però , facite spisso ll’esatto cuntrario ‘e chello ca dicite… Vuje m’ arricurdate a quaccheduno, ma nun saccio si è chill’ amico vuosto ,chillu tipo ca ce vo’ fregà a Marekiaro, o si è cchillu marisciallo Masaniello aletto sinnaco ‘e Napule ca à prummiso a fora ‘e libberarce dâ mmunnezza, mare e mmuntagne, munticule (colline) e ccampagna, mentre ca cca stammo sempe a ppane ‘e grano… Rummane ‘o fatto ca , p’ ‘o mumento, ‘o Napoli, ato ca cantera (cava) assumiglia sempe ‘e cchiú a ‘nu càntero spetenato cu Donadel(lo) ca tène quase trent’anne (e avive parlato ‘e giuvinotte ‘e fujanta (di prospettiva)…) ô posto ‘e Pazienza: è overo, tutte e dduje glianure ( modesti), però cu ‘a differenza ca Michelino era già ‘ntegrato dint’â pandiglia (nel gruppo)e nun se tirava maje arreto, mentre ‘stu Donadel(lo) è ‘nu punto ‘nterrogativo… Pe nun ddicere d’ ‘a penzata ‘e mettere ô posto ‘e Sosa a Santana, n’ato ‘e trent’anne (…sempe pe rrestà ‘ncuerenzia (in coerenza)cu ‘a prumessa ‘e giuvinotte ‘e fujanta): francamente, ‘nfra ‘e duje, nisciuno po’ appurà maje chi è mmeglio. Ll’unica cosa ca sapimmo è ca Donadel(lo) e Santana songo arrivate a ggasto zzero ( a costo zero). P’ ‘o riesto,nun s’è miso ancòra niro ‘ncopp’ô gghianco p’ ‘o passaggio ‘e Criscito e, soprattutto, cuntinua ‘a jacuvella ‘e Inler(ro) ca stammo arresecanno ‘e perdere ‘nzieme a cchillu Vidal(lo) ca fosse stato overamente ‘nu suggetto capace ‘e trasfurmà (cu Inler(ro)) ‘o centrocampo luvardo ch’ è glianuro assaje. Pe gghionta ‘e ruotolo prubbabilmente, a ll’urdimu minuto,fernesce ca Marekiaro va ô Milanno e ce cuntate o ce facite cuntà ‘a quacche pennarulo quacche fessaria pe farce stà zitte e cuiete; e po’ essere ca ce date ‘o rialuccio (ci darete il contentino) ‘e ‘nu Lamela…ca nun è quase certamente annurca, ma è limuncella!Presidè, ma che ve penzate ca mo stammo ascenno ‘a sott’ô mantesino?.. Stammo sentenno ‘e fà nomme scuonceche ( imbarazzanti) e site arrivato a raccuntà o a ffà cuntà ca Dzemailí è preferibbile a Inler(ro) sulo p’accammuffà (per mascherare) ‘o mancato arrivo d’ ‘o giuvinotto ‘e ll’Udinese!A pparte po ca p’avé ‘stu Dzemailí lloco, ‘o Napule à dda dà ô Parma nun sulo a Blasi (ch’è ‘na cosa bbona…), ma pure a Ssantacroce (e cchesto è ‘na cosa ca nun riesco a agliottere…; saccio sulo cu chest’ata finezza Mazzarri à distrutto n’atu bbuono jucatore ggiovane doppo d’avè distrutto Denis, Datolo,Cigarini, Vitale e Bogliacino e forze me ne scordo a quaccheduno!) ‘Nsomma,c’è ppoco ‘a stà allere…’e preoccupazioni songo liggittime. Presidè mettimmo ‘e ccarte ‘nterra e ll’urdema mana facimmoncella a ccarte scummigliate!
R.Bracale Brak