Guagliú ajere pe ggrazzia ‘e dDio è ffernuta ‘a sceneggiata ‘e Inler(ro) ca cammuffato ‘a lione finalmente s’è appresentato cu ‘a maglietta luvarda ‘ncuollo targata 88 (‘e casecavalle o ll’ammusciatore); po durante â cunferenza stampa è succiesa ‘na meza disturbata cu ‘nu pennarulo d’ ‘a Cazetta pe bbia ca Aurelione ll’à allisciato ‘nu tre cauzante e ll’à lassato senza parole, comme ‘o pennarulo s’ammeretava.
‘A cosa nun è ppiaciuta pure a quacche signora d’ ‘O Napulista ca s’è rizzelata pecché Aurelione à parlato comme se fa a Piazza Mercato, Porta Capuana o ê Quartiere e nno comme se parla a Calabritto, San Ferdinando o via dei Mille. ‘O fatt’è ca Aurelione è ‘nu presitente pazzaglione, ma sincero e scafato e cierti vverità nun ‘e mmanna dicenno, ma ‘e ddice dint’ê mustacce ‘e ll’interessate cu nnomme e cugnomme. E ffa bbuono! E a mme me sta bbuono accussí! Ah si sulamente fósse ‘nu poco cchiú llargo ‘e cogliapiecuro…
P’ ‘o mumento i’ e tanti ati tifuse malate comme a mme gudimmo p’ ‘a squatra nosta cunziderannola n’isola felice ‘mmiezo a ‘nu mare ‘e tanti guaje….ll’ate godono lamentannose, disprezzanno, distruggenno, sputanno ‘ncopp’ a qualunqua cosa lle càpita a ttiro, e peffino facenno ‘nu moralisemo favezo e artificiale (quanno sanno ca a Nnapole e ‘ncopp’ê munno, purtroppo, ce stanno ati prubleme ca no ‘na maschera ‘e lione e ‘nu poco ‘e scena studiantina (scena goliardica) cu n’asciuta ‘e tre per ridere tutte assieme…). Ma tiranno ‘a somma chi se ne fótte si ‘e pennarule nurdiste continuarranno a ffà pantumine ‘ncuoll’ ê duje tenure e mmiezo nuoste? So’ pantumine inutile visto ca Aurelione p’ ‘a millesima vota à ditto ca nun ‘e cede! Chi se ne fótte d’ ‘e pennarule ca ràmano (remano) contro e d’ ‘e procurature ca rummanano a vvocca asciutta? Mo scanzato ‘o fuosso ‘e piglià Trezeguet(to), sperammo ‘e scanzà pure chille d’ Amauri o ‘e Floccari pure lloro ‘nquacchiate d’ ossazza (lebbra) juventina/atalantina.
Fra poco s’ accummencia n’ ata vota….!!!!!!!!!!!!!!!!!!Primma però facimmo a ttiempo a ghiucarce 72 (‘a meraviglia) 80(i coglioni) 88 (Inler(ro)) e pe chi vulesse pure 47 (‘o presidente) e 65 (‘o lione). Bbona furtuna e arricurdateve ‘e me!
Raffaele Bracale Brak