Nun sempe s’ave ‘a sciorta ‘e ‘ncarrà ‘nu Cavani

Guagliú, si âmmo a stà a crerere ô TG TRE ‘e dummeneca tre lluglio, don Aurelione à dato quarantott’ ore ‘e tiempo a Inler(ro) ca s’à dda decidere a ttirà ‘o capo ‘nterra… Però po ‘o telecciornale nun ce à fatto sapé doppo d’ ‘e quarantott’ ore don Aurelione che fa:’o va a ppiglià p’ ‘e rrecchie o ‘o mette ‘o ssale ‘ncopp’â cora si ‘o turco dice ca no e nne cerca a n’ato meglio d’isso? Nun se sape niente! E a ccomme stanno ‘e ccose nun ce stanno nuvità ‘a fora ‘e quacche nnomme nuovo, ca se fa, ma ca però è periculoso farlo pecché nun appena s’annommena uno jesce fora Marotta e ce rompe ‘o flauto ‘e pelle dicenno ca chillu stesso jucatore piace â juventússa e ca ‘o sta trattanno.
‘Nzomma pe ghiudicà ‘o mercato d’ ‘o Napule âmm’ ‘a aspettà ca vène ‘a fine d’austo… Pe mmo âmmo perzo a Michelino Pazienza rijalato â zoccola janca e nnera (e mm’ è splicitato(dispiaciuto) assaje), âmmo perzo a Bblasi (e mmenu male!…) a Iezzo, a Yebdà e a Santacroce (e mm’è splicitato,sia p’ ‘o guaglione ca pe ll’alcerino) e songo arrivate Rosati, Fernandez(zo), Donadel(lo) e Dzemailí; pejo ‘e primma nun stammo, ma nun simmo addiventate cchiú fforte, e nun âmmo nemmeno allariato ‘nu poco ‘a rónna (la rosa) p’apparà quacche bbuco ‘ncaso ‘e squalifica o d’accidente(infortunio)… Penzo a chistu punto cumunque e nnisciuno mm’ ‘o lleva ‘a capa ca cu ‘e sórde d’ ‘a Ciampionsa s’ànno ‘a fà allimmeno ddoje grossi cumparazzione (bisogna fare almeno due grossi acquisti), fósse pure a mmezanotte manco diece d’ ‘o trenta ‘e austo,si no vo’ dicere ca cca ce stanno piglianno p’ ‘o culo tanto pe nun mannarla a ddicere e ppe pparlà chiaro! Nun sempe s’ave ‘a sciorta ‘e ‘ncarrà ‘nu Cavani primma pónta,ca azzecca ‘na tempurata (stagione calcistica) e riesce a ssignà pure cu ‘na pacca (con una..natica)(è succieso,dàteme audienza…è succieso!). Servono dduje sussirie (rinforzi) ‘e nivella primmera (di primissimo livello) e uno è certamente Inler(ro), e lle s’ànn’ ‘a dà 1,8/ 2 meliune ca cu ‘e premie Ciampionsa ponno cuntrastà ‘a pustura (l’offerta) d’ ‘a juventússa, mentre penzo ca p’ ‘e jusse ‘e gravura (per i diritti di immagine) ‘na cuncertazziona (un accordo) se po’ truvà.E nun ce scurdammo ca ‘o turco è adatto assaje â fórmula (allo schema) ca tène ‘ncapa Mazzarri. Pe cchill’atu sussirio me pare bbona ll’idea ‘e Pandev,ca tène seje anne mancante e è assaje meglio ‘e chella vecchia guallera ‘e Trezeguet(to) ca a pparte ca è troppo ‘nchiavecato d’ossazza (di lebbra) juventina, tène ‘e calle e ‘nu principio d’enfisema polmonare… Penzo ca pe ll’ambóscia (l’ingaggio) ‘e Pandev ‘na cuncertazziona (un accordo) se po’ truvà si se sacrificano ‘nu poco ‘o jucatore e ‘nu poco ll’Inter(re) ca tène commenienza a farlo. Avanzasse pure ‘a muneta nicessaria pe ppiglià chillo ca – aspettanno ca ammaturano Fernandez(zo) e Ruiz(zo) – pe mme cchiú ce serve: ‘nu vero difenzore centrale d’ano e de sperienzia (di classe ed esperienza) ‘nternazziunale, ca custasse pure assaje, ma ca désse â sezziona (al reparto) chella sicurezza ca culo’echiummo nun lle po’ maje e ppo maje dà!.
R.Bracale Brak