Guagliú, permetteteme ca a bbocce ferme e a acque calmate i’ pure dicesse ‘a mia ‘ncopp’ô fatto d’Aurelione ca quanno lle scappano ‘e cavalle nun ce stanno nè ssante, nè Maronne p’ ‘o fermà. Ora mo aggiu sempe apprezzato ô presidente ‘a fora p’ ‘o fatto ca ‘a soccia mana soja steva appesa dint’ê guantare, ll’aggiu sempe apprezzat p’ ‘a grossa abbilità d’ urganizzazzione ca tène e ppe cchello ca è riuscito a ffà dinto a poco tiempo p’ ‘o Napule e ll’à fatto a Nnapule addó se sape ca tutto chello ca se fa vale ‘o ddoppio viste ll’enorme difficultà ambientale ca nce stanno…; e pure ‘sta vota i’ sto’ cu Aurelione ca forze s’ ‘a puteva pure sparagnà chell’asciuta a ppaparelle fatta addó sapite, ma à fatto bbuono pecché si nun te faje sèntere chille ‘e lumbarde e ‘e piamuntise continuano a scamazzarce comme fanno ggià ‘a paricchio! Certo quacche milurdino ‘e chiazza Amedeo o via dei Mille cu ‘a puzza sott’ô naso, o quacche signora e ssignurina ‘e Calabritto cu ‘a burzetta ‘e Fendi sciucquaglie, ccannacche e anielle ê ddete…, sicuramente ponno parlà ‘e ‘nu cullasso ‘e stile (una caduta di stile), ma i’ songo ‘e Furia e a mme m’è piaciuta; Aurelione è ffatto accussí sanguigno e passiunale e s’à dda piglià accussí comm’è: n’ommo ‘e ‘nu bbuonu livello culturale, cu cravatta e varva curata,brillantina ‘ncapo e crumatina ‘ncopp’ê scarpe, vestito ‘e grisaglia o ‘e tasmania, ma ca nun se fa passà ‘a mosca p’ ‘o naso e tutto summato fa bbuono e à fatto bbuono a aizà ‘a voce ‘mmece ‘e starese zitto comme fanno tanti leccaculo accumincianno ‘a Preziosi ‘ntesta ca fa ‘o verginiello e se scannalizza! E nun ce scurdammo po ca Aurelione nun parla maje a scampulo ‘e mele annurche (a vanvera) pecché nun è ffesso e ògni vvota ca arape ‘a vocca sape addó vo’ arrivà.
Spero sulo ca lumbarde e piamuntise nun s’ànno attaccato ‘na fettuccia ô dito e spero ca â primma accasione nun se lèvano ‘e pprete dê scarpe…, ma nun ne songo tanto sicuro! P’ ‘o mumento dico: sto’ cu ttico Aurelió, sto’ cu ttico, presidè! Dalle ‘nfaccia!
Brak