Guagliù, che ve pozzo dicere? Vencere signanno quatto redde nun càpita tutte ‘e juorne…; succedette ajeressera, ma – forze pecché so’ ‘ncuntentabbile – nun saccio essere cumpletamente suddisfatto; anzi sto’ abbastanza ‘ncazzato pecché sí, è overo ca vincettemo, ma cunzentèttemo ô Lecce ‘e farce ddoje redde e cchesto proprio nun se ne scenne… comme nun se ne po’ scennere ca ajeressera ‘o Lecce ce mettette cchiú ‘e ‘na vota ‘nseria diufficultà. Certo vincettemo, ma ‘a scuatra dimustraje ‘e stà ancòra ‘ncrisi ‘e criscenza,pecché quanno passaje ‘nvantaggio penzaje d’averla nchiusa e sbracaje. E cchesto proprio nun se ne scenne… Siccome ‘o fatto era ggià succieso cu ‘a rubbentus(sa),fósse stato ‘o caso ca dint’a ll’intervallo Mazzarri avesse miso nchiaro cu ‘e jucature comme cumpurtarse. Mo ddoje songo ‘e ccose : o nun lle dicette niente, o nun ‘o stettero a ssèntere… cert’è ca ô siconno tempo De Sanctis pe ddoje vote êtt’ ‘a piglià ‘o pallone ‘nfunno â rezza luvarda… E cchesto proprio nun se ne scenne!E menu male ca ‘a siconna redda ‘o Lecce ‘a signaje all’uremu siconno… si no nun saccio comme jeva a fferní si ce fósse stato cchiú ttiempo!Certo ‘e cuane stanno stanche pecché jocano troppo e quann’ uno è stanco po’ ffà quacche fessaria superchia… Pirciò dico ca Mazzarri e ‘e guagliune ànno ‘a faticà ancòra pe migliurarse; ànn’ ‘a crescere! Ma pe ffarlo s’ànn’ ‘a cumpletà tutte ‘e reparte cu ggente a ll’ardezza d’ ‘e titolare… e De La nun facesse ‘o purucchiuso e a ggennajo arapesse ‘o cogliapiecuro! âmmo vuluto ‘a bicicletta (ciampionsa) e mmo s’à dda pedalà e nun ce se po’ allamentà ca se joca troppo! Guagliú, sí se joca troppo e nun fernesce ‘na partita ca ggià s’à dda appruntarne n’ata. E a mme piacesse ca se vincessero tutte, campiunato o ciampionsa! E mmo – a ccurto a ccurto miercurí ca trase contro ô Villariale àmm’ ‘a cercà ‘e vencere o allimmeno fà punte pure si sapimmo, cunuscenno ‘a scuatra spagnola, ca nun è ffacile! Passammo ê ppaggelle va’!
DE SANCTIS 5,5 Nurmale amministrazzione e nun tenette colpe ‘ncopp’â primma redda d’ ‘o Lecce;’ncopp’â siconna êsse pututo ascí ‘mmece ‘e rummané fremmo ‘mmiez’ê pale!
FERNANDEZ 6 Jette bbuono quanno se trattaje ‘e ‘mpustà ll’azzione; quacche ndecisione quanno Pasquato ‘o puntaje. Nun scopro ll’America dicenno ch’è troppo bradúso(lento) p’ ‘a difesa a ttre ‘e Mazzarri.
ARONICA 5,5 Aunesta partita spurcata ‘a ‘na marcatura senza cegna ‘ncuollo a Muriel(lo) ô mumento d’ ‘a primma redda d’ ‘o Lecce
FIDELEFF 5 ‘O guaglione à dda crescere; nun me pare ancòra pronto pe gghiucà dint’ a ‘stu Napule.Nun era meglio Ruiz(zo)?
(dô 74° GRAVA 9 Ll’applavuso d’ ‘o San Paolo me fa sparagnà qualunqua spiegazzione)
MAGGIO 6 Miezu voto mancante pecché s’addurmette n’ata vota a ttu ppe ttu cu ‘o purtiere!
INLER 5,5 Partette cu ‘o freno tirato,po se repigliaje ‘nu poco, ma ‘a uno comme è isso ce s’aspetta assaje ‘e cchiú. (dô 66° HAMSIK 6 Trasette subbeto ‘mpartita)
DZEMAILI 7 Ademasso (oltre) ‘a redda me piace arricurdà ‘na palla ‘nverticale pe Mmaggio ca dimustraje ca ‘stu guaglione ecchese Parma tène ‘e cqualità!
DOSSENA 5,5 Miezu voto mancante pecché manco ajeressera ‘o vedette fà c hello ch’êsse ‘a fà. Nun era meglio Vitale?
PANDEV 7 Ll’accuplaggio (aggancio) per ll’ajuda a Ccavani fuje overo straurdinario, ma tutta ‘a prova d’ ‘o giuvinotto giustificaje ll‘aumentata fiducia ca ‘o pubblico luvardo ll’accurdaje.
(dô59° GARGANO 6 Partita nurmale: sbagliaje ô ssolito ‘nu paro ‘e passagge facile, ma se dimustraje ‘mpurtante a ffà muro.)
LAVEZZI 7,5 Se fósse mmeretato pure 8, ma nun le pozzo perdunà ‘e ddoje rredde ca se magnaje ô siconno tempo! ‘Na cosa è ccerta però ca quanno isso ggira ‘o Napule tène ‘na marcia ‘e cchiú!
CAVANI 7 Ll’ommo justo ô posto justo, ô mumento justo!Ammènne accussí pure pe mmiercurí ca vene.
All. MAZZARRI 6,5 – M’aggi’ ‘a ripetere e a quacchuno nun po’ piacé chello ca dico:’mprimmese êsse ‘a spiecarse meglio cu ‘e suoje epretennere d’essere sentuto; francamente po ll’esperimente ca fa ‘o livornese nun so’ tutte ‘ncarrate: facette bbuono a ‘nzistere cu Pandev(vo) e cu Dzemaili, ma cu Inler(ro) à dda faticà ancòra e tenerlo fora quanno nun sta ô ciento pe cciuento; Fernandez po à dda jucà centrale difenzivo e nno laterale e Fideleffo è ancòra troppo acievero.
ll’arbitro ROMEO 6 Tenevo a mmente ‘nu 3,5 ca ‘o mettette
pe ll’arbitraggio ‘e n’ Udinese- Napoli ch’isso ce ‘ntussecaje e ajeressera me mettette paura ca facesse ‘o bbisse; pe furtuna nun ghiette accussí e ringrazziammo ‘o Cielo!
E fermammoce cca. Ce sentimmo, guagliú! Bbona dummeneca, cu ‘na bbona salute! Staveti be’
R.Bracale Brak