Guagliú tenco ‘o bbeleno nfi’ a ‘mpont’ô messo: ‘a tempurata 2012/2013 d’ ‘o Napule è accumminciata cu sette parme ‘e ca**o!E cu ‘a primma delusione. Ma i’ m’ ‘o ssentevo ‘e scennere pe ddereto ê rine appena liggette ca ll’arbitro d’ ‘a Supercoppa fósse stato Mazzoleni ca (pe cchi nun ‘o sapesse) è bergamasco e ppirciò tifoso atalantino/juventino visto (e se sape!) ca ll’Atalanta è ‘a scuatra travante (satellite) d’ ‘a juventus(sa). A chistu punto i’ dico ca à sbagliato De Pezzentiis a mannà ‘a scuatra ‘nCina! Appena se fósse saputo ca ll’arbitro fósse stato ‘o bergamasco e ca dint’â sestina arbitrale ce fósseno state pure Tagliavento e Rizzoli, avesse avut’ ‘a ritirà ‘a scuatra, perdere tre a zzero a ttavulino e sparagnarse ‘o viaggio e ‘a ‘ntussecata lloro e nnosta.Se sapeva ca cu chella ggentaglia a decidere nun fósse stata ‘na rencontra seria e spurtiva, ma ‘na cosa ammagagnata comme po fuje! Cumminfatte L’arbitro Mazzoleni, assieme ê culleche suĵe (tra cuje uno polliclotto capace ‘e capí ‘a ‘spressione:“‘emuorte’echit’èmmuorte” déttain macedone) vulette essere ‘o prutagunista assuluto d’ ‘a facenna e ce mettette tutt’ ‘o suĵo pe fermà ‘e passe d’ ‘o Napule (ca nfi’ a cquanno jucajeno unnece contro a unnece mettette ‘ndifficultà ‘a juventus(sa))apprimma rijalanno ê piamuntise ‘nu ricore ca chillu figlio ‘e zoccola ‘e Vuciniccio s’era fatto siscà a ffavore visto ca Fernandez(zo) lle steva troppo vicino e ‘o risciatava ‘ncopp’ô cuollo… Vidàl(lo) signaje ‘o ricore ca s’êss’ ‘a avuta ripetere visto ca l’area era chiena ‘e jucature juventine. Nun cuntento ‘e chesto Mazzoleni nce mettette ‘a jonta nun siscanno ‘nu ricore p’ ‘o Napule doppo ca Lucio, cu ‘nu sbuttulone ê spalle aveva stiso ‘nterra in aria a Behrami e cumpletaje ‘o capolavoro jettanno poco doppo fora a Pandev(vo) e nun s’è ancòra capito ‘o pecché e doppo pure a zZuniga ammunito ddoje vote visto ca ‘o guaglione s’era vennicato ‘e duje falte subbíte e ca ll’arbitro ll’êva siscato contro, ‘mmece ca a ffavore (comm’era justo ca fósse). Nun cuntento ‘e fà ferní ‘a rencontra cu ‘o Napule a luttà nove contro a unnece, ‘o bergamasco jettaje fora pure a Mazzarri ca giustamente prutestava p’ ‘o trattamento arbitrale.
Comme Mazzoleni vulette ‘a rencontra fernette cu ‘a juventus(sa) ca s’arrubbaje ‘o primmo trufeo d’ ‘a tempurata vincenno ‘a Supercoppa, e ‘o Napule pe prutesta nun s’appresentaje ‘ncampo pe vedé ‘a juventus(sa) festiggiata e premiata, cumpurtannose comme â juventus(sa) ca ô 1998/1999 perdette cu ‘a Lazzio ‘a supercoppa e pe prutesta non partecipaje â premiazione!Si ‘o bongiorno se vede dâ matina chesta è accumminciata accussí è n’ata tempurata ‘e mmerda e sa’ quanti fenucchie amare ce avimm’ ‘a rusecà pure ‘sta tempurata! Ve ll’immagginate? I’ purtroppo sí! Passammo ê ppaggelle va’:
DE SANCTIS 4 A nNapule parlammo sempe ‘e ‘nu rinforzo ‘ncopp’â fascia ‘e mancina (o ‘e dritta) , ‘e ‘nu vice Cavani, ‘e ‘nu difenzore centrale ecc. ma d’ ‘o purtiere ne vulimmo parlà o no? L’anno passato De Sanctis ce facette perdere ammeno diece punti e ajere tenette ‘ncopp’â cuscienza nun sulo ‘a rredda d’ Asamoah (pecché (rimbalzo o nun rimbalzo) nun se po’ piglià ‘na rredda ‘ncopp’a ll’unicu palo ca staje presenzianno), ma pure ll’iggentura(autorete) ‘e Maggio (pe n’ asciuta a vvacante), pe nun parlà ‘e tant’ati fessarie assurtite ca cchiú ‘e ‘na vota nce avette ‘a mettere ‘na pezza Campagnaro, Cannavaro o Britos(so)
CAMPAGNARO 6,5 Bella partita d’ ‘o Toro,ca s’ ‘a cavaje spisso cu ‘o mestiere.
CANNAVARO 6 ‘A juventus(sa) jucaje spisso centralmente, ma ‘o capitano napulitano, cu tutto ch’è ‘na meza cazetta, riuscette a nun fà danne. ‘Na brutta falta lle custaje giustamente ‘o cartellino jalizzo e Mazzarri, penzanno ‘e fà cosa bbona ‘o sostituette pe nun arresecà. Ma fuje ‘na mossa inutile e sbagliata.(dô 61° FERNANDEZ 5- È ggiovane, nun è scafato e mmanca ‘e cazzimma. Trasette e sbagliaje periculosamente cchiú ‘e n’intervento nfi’ â fessaria fatta dinto a ll’aria ‘e ricore quanno, visto ca ll’avverzario steva spalle â porta, ‘mmece ‘e metterle ddoje mane ‘nculo e mannarlo fora ‘e ll’aria détte ‘na mana a cchillu figlio ‘e coperativa ‘e Vuciniccio a menarse ‘nterra, sciusciannolo ‘ncopp’ô cuollo e a Mazzoleni nun lle parette overo ‘e puté siscà ‘o ricore p’ ‘a juventus(sa)).
BRITOS 7 Riuscette a mettere ‘a musarola a ‘nu jucatore tassuso (rapido) comme a gGiovinco jucanno spisso d’accotto (anticipo).’Na bbella surpresa d’ ‘a sfurtunata rencontra ‘e Pechino. Ô finale cu ttutto ca teneva ‘nu prubblema fisico, strignette ‘e diente e rummanette ‘ncampo cu ’a scuatra ggià ‘nsotto ‘e duje crestiane, facenno addirittura ‘a ponta!
MAGGIO 5 E nun tanto pe ll’iggentura, ma pecché m’aspettavo ‘e cchiú.Appressuraje (spinse) sí paricchio, ma se facette spisso surprennere ‘a Asamoah ca ‘ncopp’â zzona soja lle facette spisso vedé ‘e surece vierde. Sbrugliaje quacche situazziona, ma se facette truvà fora pusizzione ô mumento nicessario, abbandunanno ‘a curzia soja e lassanno a Asamoah libbero e ffranco ‘e tirà commotamente. Sfurtunata ll’iggentura ‘e capa p’ ‘o tre a ddoje juventino.Dinto a ll’uccasione fuje surpreso ‘a ll’asciuta a vvacante ‘e De Sanctis.
BEHRAMI 7 Accriscentaje (aggiunse) ô centrocampo d’’o Napule forza e pputenza ca spisso mancaje â tempurata passata. Nun se tiraje maje arreto,facenno ‘na pressione (un pressing) asfissiante e fuje sempe presente ajutanno ‘ndifesa e dànno sustegno a ll’attacco. Se fósse abbuscato pure ‘nu ricore a ffavore pe falta ‘e Lucio ca cu ‘nu sbuttulone ‘o menaje ‘nterra, ma chella granna latrina ‘e Mazzoleni facette a vvedé ‘e nun avé visto.
INLER 7 Jucaje ‘na rencontra suntuosa magnannose dint’â lotta ‘o centrocampo avverzario.Fuje uno ‘e ll’urdeme a s’arrennere lassanno ‘o campo pe ‘nu ‘mpiccio fisico.
(dô 105′ DOSSENA s.v. )
HAMSIK 6,5 Ô primmo tempo se sacrificaje assaje tampunanno a vVidal(lo) e a mMarchisio. Jucaje spisso assaje areto, ma accumpagnaje sempe ll’azziona. Pe ddoje vote sulo dint’ a ll’aria ma nun venette premiato. I’ nun ll’êsse sustituito; ll’êsse fatto cagnà pusizziona e mmiso ô posto ‘e Maggio,ma Mazzarri ‘a penzaje diverzamente
(dô 67′ GARGANO 6- Trasette subbeto ‘mpartita ufferenno ô ssolito granne dinamismo, ma sfurtunatamente nun abbastaje).
ZUNIGA 5,5 Jucaje ‘na partita urdinata ‘ndifesa e spisso fuje periculoso ‘nzona d’ attacco. Ma ‘o guaglione è troppo debbole ‘e nierve; ‘ngaggiaje ‘nu duello cuntinuato cu Lichtsteiner ca ‘o facette spacenzià (innervosire). Mazzoleni, a arte, le siscaje ô cuntrario ddoje o tre punizzioni e isso reagette cu ‘na falta ca lle custaje ‘o siconno cartellino jalizzo e ppirciò chillu russo ô mumento culminante d’ ‘o finale travulgente…
PANDEV 7,5 Ô pprincipio cumbattette, spisso isso sulo, apprensanno (pressando) auto e accussí facenno apprimma lanzaje a cCavani pe ll’ uno a zzero e ppo futtette ‘a palla a bBonucci, trasette dint’ a ll’aria e callechiaje ( batté) a bBuffòn(no) cu ‘nu fantastico colpo ‘nsotto!
A ll’arranqua (nella ripresa) se ne vedette bbene facenno ripartí ll’azzione comme sape fà isso. S’abbuscaje ‘nu cartellino russo pecché (a vulé stà a ccrerere a Mazzoleni (e chi ‘o crede tene ‘e ccorna!))facette in macedone ‘e muorte a ‘nu signalinee ca dinto a cchillu burdello e ‘a vinte metre pare ca sentette e capette addivintanno ‘o prutagunista d’ ‘a serata!
CAVANI 7 ‘O Matadòrro stette a ttutt’ ‘e pizze: annante e arreto;difennette e attaccaje dô primmo a ll’urdemo minuto. Cu freddezza e ccegna (caparbietà) ô mumento d’ ‘a rredda soja, ricunquistaje ‘o pallone alluntanato ‘a Buffòn(no) e a ttiempo a ttiempo, ‘e ponta mettette ‘mporta scanzannose ‘o ritorno ‘e duje difenzure.
MAZZARRI 5 Soprattutto p’avé falluto ‘o primmo appuntamento d’ ‘a tempurata e ppo pecché sbagliaje ‘a scelta d’ ‘o purtiere e sbagliaje ‘e sostituzzioni!
‘A SESTINA ARBITRALE 0 spaccato Pe tutto chello ca aggiu ditto e ca facetteno!
Arrivato cca pe me cungedà voglio dicere ca doppo d’ ‘o scuonceco d’ajere fósse proprio nicessario ll’intervento ‘e Palazzi soprattutto pe vederce chiaro, tenenno presente ‘na cosa ca nun tutte ànnu visto ma ch’è gghiusto ca tutte ànn’ ‘a sapé: quanno Mazzoleni détte ‘o ricore, Buffòn(no) s’avutaje verzo Rizzoli e lle facette l’occhiolino!… Ma chiste overo se credono ca scennimmo dê mmuntagne?O ce vulesseno fà crerere ca ll’era trasuto ‘nu muschillo dint’a ll’uocchie?!
E cu cchesto ve saluto e si dDi’ vo’ ce sentimmo â prossima vota! Staveti be’!
R.Bracale Brak