Faccio ‘nu granne avugurio a De Laurentiis ca cu ‘e sorde ca s’è miso dint’ô cogliapiecuro riesce a ffà n’atu pare ‘e granne cinepanettune

Guagliú, visto ca ‘e cunte se fanno sott’ô lampione i’ avesse ‘a parlà sulo a ggiugno ca vène, ma siccomme ‘a giugno passato l’accuppiata De Laurentiis/Bigon ce avevano prummiso ‘e rinfurzà ‘a scuatra cu perzone all’aldezza e de pruspettiva…, ora mo me pare justo ca – (arrivate a settembre,arrivate cioè â fine d’’a campagna d’accattà e vennere), i’ dico ‘a mia e ddico chello ca penzo. Embé doppo d’avé vennuto ô Pocho (sustituito, senza spennere ‘na lira cu n’atu scugnizzo comm’è Insigne ca nun se sape si Erode Mazzarri riesce a ffà maturà…) e doppo d’avé vennuto a gGargano, ‘sta famosa campagna ‘e raffurzamento s’ è nchiusa cu ll’urdema delusione; cumminfatte doppo d’ ‘o svizzero Behrami (ca forze è ll’unico ca se salva…),doppo d’ ‘o jammariello sereticcio (Gamberini), doppo d’ ‘o marrucchino (ch’è ‘nu punto ‘nterrocativo), doppo ‘e ‘nu criaturo brasiliano, (ca è meglio si ‘o dànno ‘mpriestito, visto ca Erode Mazzarri nun ‘o fà jucà e ll’affoca dint’â connola comme facette cu Santacroce, cu Ruiz, cu Datolo, cu Denis, cu Cigarini etc. )chi è arrivato? È arrivato sié paturnia(mestizia).E cu ‘sta ggente avessemo rinfurzato ‘a scuatra? Ma jesseno a arrubbà dint’ê cchiesie! Aggio ll’impressione ca se tratta d’ una d’ ‘e cchiú peggio campagne d’accattà e vennere ‘e ll’urdimi 50 anne. Me pare d’essere turnate ê tiempe ‘e Naldi/Corbelli. Certo ‘e cunte stanno a pposto, ‘a suggità sta a pposto, ‘o cogliapiecuro (il portafoglio) ‘e De Laurentiis s’è bbuono ‘mpurpato…, ma ‘o pizzo cchiú scuro è ‘o fuculare: ‘sta scuatra ‘ncopp’â carta nun è attrezzata pe vvencere ‘o riesto ‘e niente! Me dispiace d’ ‘o ddicere, ma ô posto ‘e Cavani i’ me ne jesse súbbeto! Tanto ‘nu sceicco disposto a caccià ‘e sissanta meliune ca lle servono a De Pezzentiis, ‘ngiro pe ll’Airopa se trova sempe! Nun è gghiusto ca ‘o Matadòr(ro) à dda cuntinuà a ffarse ‘nu mazzo tanto dinto a ‘na scuatra addò à da tené pe cumpagne Mesto, Dossena, culo’echiummo e ‘na vecchia gloria comme a De Sanctis. Nun è gghiusto ca à dda fà ‘o difenzore e ll’attaccante e (poco ce manca) pure ‘o purtiere!
Ma comme se fà a ‘nfessirse cu ‘nu jucatore scadente comme a Mesto? Nun crero ca se po’ alternà cu Maggio! Ll’unicu acquisto azzeccato me pare chillo d’ ‘o svizzero Behrami ca me pare ch’è mmeglio ‘e Gargano e ppo’ gghiucà sia a mmità campo ca comme esterno ‘e mancina; me pare jucatore tuosto ca riesce a vencere tutti ‘e cuntraste, jucatore ca addó nun ‘o simmene, lla ‘o recuoglie, jucatore ca se sape ‘nserí e quacche rredda t’ ‘a fa…; ‘o jammariello (Gamberini) è staggiunato sí, ma tene sperienzia e forze coccosa po’ ffà si Campagnaro à dda piglià sciato.
D’ ‘o brasilano Uvini aggiu già ditto e cunfermo ca i’ ‘o desse ‘mpriestito p’ ‘o fà abbituà e pe nun ‘o fà accidere dint’â connola da Erode Mazzarri.
El kaddourí (o comme se chiamma) nun ‘o cunosco e spero sulo ca po’ vení fora pecché stanno a cchello ca aggiu liggiuto, êsse ‘a essere ‘o sostituto ‘e Marekiaro ca quanno primma De Laurentiis ve faccio vedé ca s’ ‘o venne!Tutto chesto pe nun dicere ca fósse stato meglio, ‘mmece ‘e piglià gente comme a mMesto, fósse stato meglio piglià a ‘nu buonu purtiere affidabbile (giovane o viecchio nun ‘mporta) tenenno presente ca De Sanctis oramaje fa sudà friddo! ‘Ncuncrusione, chiammateme fesso, ma i’ nun songo suddisfatto dâ campagna d’accattà e vennere; e a cunte fatte pe comme stamme mise pe cumpletà ‘a rónna ( la rosa)… ce manca sulo Modesto!Aronica, Mesto e Modesto avessero furmato n’ata vota chillu granne ‘mbattibile pacchetto difenzivo d’ ‘a grannna Reggina ‘e Mazzarri. Aggio tuorto?
E mme fermo cca. Permettiteme però ca salutannove faccio ‘nu granne avugurio a De Laurentiis ca cu ‘e sorde ca s’è miso dint’ô cogliapiecuro riesce a ffà n’atu pare ‘e granne cinepanettune!
Statevi be’! Ce sentimmo!
R.Bracale Brak