Finalmente stammo addivintanno cchiú cazzemmuse

Comme ‘o Cielo vulette ajeressera guagliú riuscettemo a metterce dint’â sacca ‘e tre ppunte cu tutto ca‘ntribbuna ce steva Giggino Uocchie-stuorte assettato vicino a Aurelione e cu tutto ca pe quanto duraje ‘a rencontra ‘nu jettatore ‘e cummentatore ‘e SKY cuntinuaje a menà ‘a seccia ripetenno cuntinuamente ca erano quatt’anne ca ‘o Napule nun riusceva a vattere ‘a Fiorentina. E ‘mmece â fine ‘o Napule vincette, pure si ll’urdemi diece minute me venetteno ‘e parpetazzione doppo ca, ‘ncopp’ ô doje a zzero p’ ‘e cuane, Joveticcio aveva rimiso ‘ndiscussione ‘o risultato ‘nu poco apprufittanno d’ ‘o terreno ‘e juoco ch’ è ‘na vera latrina(senz’evera, chino ‘e rena e de fuosse…) e‘nu poco apprufittanno ca De Sanctis oramaje dorme cu ‘a zizza ‘mmocca. E tutto chesto pecché Mazzarri êva sbagliato ‘a furmazziona lassanno ‘mpanca a Inler(ro), custringenno ‘o Napule a gghiucà ’a primma mmità ‘e rencontra senza ‘nu centrocampo apprupiato, ‘mbalia d’ ‘a Fiorentina ca pe ffurtuna però nun facette danno cusicché ‘ncapo ‘e cinquantaquatto minute ‘e juoco (doppo ca era trasuto Inler(ro) cagnanno tutt’ ‘a solfa, quanno finalmente Marekiaro pigliaje ‘a decisione storica ‘e accummincià a gghiucà…) ‘o Napule passaje ‘nvantaggio cu ‘na carrambula ‘nfra ‘a cresta ‘e Marechiaro e ‘o vraccio ‘e Borja Valero e radduppiaje cu ‘na granna cagliosa ‘e Dzemaili ‘a fora. M’ero fatto ‘ncapo a mme ca avesse signato pure ‘o Matadòr(ro)…, ma chi t’ ‘o dà? Ajeressera Cavani facette ‘o difenzore e nno ll’attaccante! E ghiette a fferní ca a diece minute dâ fine (ricupero cumpreso) Joveticcio facette ‘a guapparia e rimittette ‘ndiscussione ‘o risultato facennome stà ‘ncopp’ê spine nfi’ô mumento ca Damato siscaje ‘a fine dicritanno ‘a vittoria napulitana ca ce fa stà ‘ncumpagnia
d’ ‘e pprimme d’ ‘a classe (juventus(sa) e lazzio) pure si è inutile farce illusione superchie pecché tanto pure chist’anno ‘o palazzo à diciso ‘e cunzignà ‘o scutetto â scuatra d’ ‘a Fiat(ta) ca jette a ffà ‘a cammurrista a Udine e ffuje accumpagnata pe mmano da chella fetenzia ‘e ll’arbitro Valeri ca jettaje fora ‘o purtiere ‘e ll’Udinese senza nisciuno mutivo, custringenno ‘a scuatra ‘e Guidolin(no) a gghiucà tutt’ ‘a recontra cu ‘na perzona mancante! Ma penzammo ê guaje nuoste e passammo ê ppaggelle.
DE SANCTIS, 5: Poco ‘mpignato, sbagliaje quase tutte ‘e rilance e s’addurmette ‘ncopp’ô tiro ‘e Joveticcio.
CAMPAGNARO, 6: ‘A solita cegna argentina; ‘sta vota però sufferette ‘nu brutto accunto comme Joveticcio e s’êtte ‘a preoccupà pure ‘e El Hamdaoui ca fósse attuccato a Cannavaro
CANNAVARO, 5,5: sbrugliaje cu furtuna quacche situazziona ‘ntricata, ma mustraje ‘e ssolite ‘nzecuritate (insicurezze) chiammannose fora a cierti mumente e facenno rilance a scampule ‘e cape ‘e sacicce manco fósse Krol!
BRITOS, 7 : forze ‘o meglio; cunfermaje ll’atalossa ‘e Palermo; dâ parta soja nun passaje nisciuno. Spisso avett’ ‘a ascípe piglià mo a Cuadrado mo a Joveticcio ca zumpavano sistematicamente a zZuniga; maje n’intervento azzardato o ‘tuffante (affannoso). Pare proprio ca se tratta ‘e ‘nu jucatore ricuperato e ca ce se po’ cuntà!
MAGGIO, 5: Currette e luttaje ma no comme ô ssoleto; se vedette ca nun sta ancòra ‘nforma…sufferette soprattutto quanno se trattaje ‘e arretrà a difennere.
DZEMAILI, 7: Atalossa sustanziosa;’a rredda (cu chella granna cagliosa ‘a fora) fuje ‘a perna ‘e ‘na rencontra ‘e sacrifiggio soprattutto p’ ‘a primma mmità quanno êtt’ ‘a jucà pure pe Behrami.
BEHRAMI 5: stranamente ‘ncunzistente;nun saccio si se trattaje d’ ‘a tenzione p’ ‘a rencontra ‘e ll’ecchese, o pe bbia d’ ‘a pusizziona sbagliata (i’ ll’êsse visto meglio ô posto ‘e Zuniga…) fatto si è ca ajeressera nun n’azzeccaje una! ‘Na vota ca ascette ‘a rencontra cagnaje faccia.
(dô 62° INLER, 6.5: Trasuto ‘o turco-napulitano ‘o Napule tenette súbbeto n’atu passo; ‘a rredda arrivaje quase ‘ncuntempuranea e nno casualmente giacché cu ‘o turco ‘ncampo ‘e cuane azzardajeno ‘e cchiú e ‘o facetteno cu cchiú idee, dimustranno ca Mazzarri s’era sbagliato a tenerlo fora!
HAMSIK, 6.5: Rummanette ‘o tuttóso (il dubbio) si ‘o pallone d’ ‘a rredda ll’êsse tuccato o no; isso giura ca sí e i’ ‘o crero, nun fósse ato p’ ‘o fatto d’esserse truvato lla a mettere pressione a ll’avverzario, quanno doppo cinquantaquatto minute finalmente pigliaje ‘a dicisione storica d’accummincià a gghiucà. Da chillu mumento quanno jucaje ‘e primma ammurciaje (innescò) sempe ‘nu cumpagno.
(dô 90° DONADEL, sv)
ZUNIGA,5: praticamente inutile; ‘ncopp’â fascia perdette tutt’ ‘e scontre cu Cuadrado e spisso cu Joveticcio, annante ô ssolito aizaje porvera.êsse preferito vedé a Bherami e nno a isso ‘ncopp’â fascia.
INSIGNE, 6-: Facette fummo quanno cercaje pe fforza ll’angiué (giocata), ma costringette duje difenzore â falta d’ ammunizzione; tène voglia e perzunalità. P’ ‘a cuncretezza âmm’ ‘a aspettà; forze è ancòra ampressa!
(da ll’81’ E. VARGAS, sv)
CAVANI, 6: miezu voto ‘e cchiú pe tutta ‘a granna fatica fatta p’aiutà ‘e cumpagne, facenno addirittura ‘o terzino( cinche salvatagge ‘e capa dinto a ll’area nosta!); annante nun se vedette quase maje e stette sempe troppo luntano dâ porta!
all. MAZZARRI, 5.5: Â fine ‘a rencontra se vincette e chi vence ave raggione e i’ ll’êss’ ‘a vuto mettere allimmeno seje. Ma nun m’ ‘a sento pecché nun me scordo ca sbagliaje ‘a furmazziona ‘e partenza cu Zuniga ‘ncopp’â fascia e cu Bherami ô posto ‘e Inler(ro). Nun ce scurdammo po ca ‘o Napule aspettaje troppo ll’avverzarie e ‘sta cosa nun me piacette! Comme nun me piacette vedé ‘mporta De Sanctis addó fósse stato meglio Rosati ch’è cchiú riattivo e nun sbaglia ‘e rimesse.Quanno se decide a ffà capí a culo’echiummo ca ‘o pallone ll’à dda appujà a ‘nu centrocampista vicino evitanno ‘e fà rilance a vienetenne?…
arbitro DAMATO 4 ‘e stima.
‘Ncuncrusione me pare ca finalmente stammo addivintanno cchiú cazzemmuse: ajere pochi tiri e ddoje rredde; certo quacche nivetezza (ingenuità) ancòra s’ è vista, specie doppo d’ ‘e ddoje rredde (nun se po’ lassà ca Joveticcio tira libbero e ffranco sapenno ‘e tené ‘nu purtiere ca dorme cu ‘a zizza ‘mmocca…, né se ponno pruvucà senza ‘nu serio mutivo periculuse tire piazzate); ‘ncopp’ a ‘sti fatte Mazzarri à dda faticà súbbeto pecché addó nun ce miette ll’aco ce miette ‘a capa! Chisti d’ajere fujeno cumunque tre punte d’oro! ‘A Fiorentina prubbabilmente fa ‘nu granne campiunato e nnuje pure tuffante ( con affanno) ll’âmmo vattuta.Però che scuorno chillu campo; cu tutta chella rena e chilli fuosse ce mancavano ‘nu paro ‘e cammelle e ‘o quatro era cumpleto! Ma comme è pussibile? Comme? Menu male ca nisciuno se facette male! Giggino-uocchie stuorte ‘o pudestà ‘e Napule ‘mmece ‘e penzà a vvia Caracciolo e ô quartiere p’ ‘e zzoccole e/o ‘e femmenielle penzasse a sistimà ll’evera d’ ‘o san Paolo!
E nchiudimmola cca gudennoce chesta vittoria surata e ce sentimmo n’ata vota- si dDi’ vo’ – ‘nfra quinnece juorne. Staveti be’!
R.Bracale Brak