Nun me dicite niente, ma i’ penzo ca ce à cacato ‘o cane niro! E mme spieco: cca âmm’appena appena jucato ‘a terza ‘e campiunato, nun âmmo ancòra accumminciato ll’E.L. e ggià stammo ‘nchiena vorfalla (emergenza) ‘ncopp’â curzia ‘e mancina: Britòs(so), se ‘nfurtunaje durante ô dressaggio (allenamento) ‘e viernarí passato e ‘e miedece ànnu ditto ca se tratta ‘e ‘na cosa ‘mpurtanta (distrazione al retto femorale della coscia sinistra.)cosicché ‘o difenzore à dda stà fremmo p’ allimmeno ddoje semmane! Comme si nun avastasse Salvatore Aronica ca ll’aveva sustituito durante â rencontra cu ‘o Parma s’è acciaccato pur’isso (distorsione di primo grado alla caviglia destra) e nun sapimmo a che s’ammette! Cunchiusione: stammo cu ‘e ppacche ‘int’a ll’acqua e mmo ggià p’ ‘a rencontra d’E.L. cu ‘e svedese ‘e LL’ AIK SOLNA âmm’ ‘a vedé comme ce âmm’ ‘a mettere. Datosi ca cumunque i’ penzo ca ‘o ppoco ‘e turnovèr(ro) s’ à dda fà si no ‘sti siconne linie ch’ ‘e tenimmo a ffà, i’ facesse jucà chesta furmazzione: ROSATI,GAMBERINI FERNANDÈZ(ZO) RINAUDO, MESTO DONADÈL(LO) DZEMAILI BEHRAMI, HAMSIK, VARGAS INSIGNE tenennome ‘e scorta a gGrava, a dDossena, a El Khaddouri,a Inlèr(ro)cu Pandèv(vo) e Cavani ‘a fà trasí si ‘o caso se cumprumettesse e ghiessemo ‘nsotto. Uvini non po’ essere pigliato ancòra ‘ncusiderazzione pecché nun è ancòra pronto,visto ca a differenza d’ ati eventuali “nuvizzie(esordienti)” è ll’unico a nun cunoscere ancòra nè ‘o schema ‘e juoco ‘e Mazzarri, nè ‘o juoco airopeo, e cquinde spero proprio ca Mazzarri nun ‘o fa jucà mettennolo a riseco ‘e critiche tose (feroci) ‘ncaso ‘e n’atalossa poco pusitiva… È overo ca Erode Mazzarri ‘e guagliune ll’accide dint’ â connola…,e nun me meravigliasse si ‘o facesse pure cu Uvini, ma spero proprio ca nun ‘o ffa! Quaccheduno po’ pure dicere ca ‘a furmazione”mia”rappresenta ‘nu vero e proprio tólemo (azzardo), ma ripeto: se nun accumminciammo a pruvarle mo ‘sti siconne linie… neh, ma quanno ‘e pruvammo? E ppo so’ cunvinto ca ‘sta scuatra cumunque po vattere ‘e micciarielle svedesi, soprattutto pensanno all’ acusía (voglia) ‘e mettersi ‘nmostra ‘e cchilli jucature ca sperano ‘e ritagliarse cchiú spazzio ‘mprimma scuatra (e sto parlanno p’assempio ‘e Rosati, ‘e Fernandèz(zo), ‘e Mesto e de quacche ato). E ccorna facenno, ‘ncaso ‘e nicessità, comme aggiu ditto, se ponno fa trasí ‘e protanguanguere comme a pPandèv(vo), a cCavani eccetera…, ma so’ cunvinto ch’è nicessario fà fà ‘nu poco ‘e sperienza ê jucature ca jocano ‘e meno e penzo proprio ca ‘a scuatra d’ ‘e micciarielle è ‘a cchiú adatta pe farce fà ‘stu tipo ‘e sperimento! Sempe ca nun me sbaglio.
R. Bracale Brak