Insigne dice ca ‘o Napule è da scutetto, s’ ‘o levasse ‘a capa!

Lèggio ‘ncopp’ê ggiurnale ca a Ccoverciano Insigne s’è sbilanciato dicenno ca ‘o Napule è da scutetto! Ora mo si ‘o fatto è overo e nun s’ ‘o songo ‘mmentato ‘e pennarule pe vennere quacche fuoglio, nun pozzo fà a mmeno ‘e dicere ô guaglione ‘e Fratta ca primma ‘e parlà rifrettesse ‘nu poco.
‘O fatt’ è ca  Insigne mo sta ascenno ‘a sott’ô mantesino, sonna a uocchie apierte e nun se rende buono cunto d’ ‘a rialtà… Certo a ttutte quante piacesse ‘e credere ca ‘o Napule po’ puntà ô  scutetto nello scudetto, ma siccomme tenimmo ‘a varva janca ce rendimmo cunto ca se tratta ‘e ‘nu suonno pe cchiú ‘e ‘nu mutivo:’mprimmese  ubbiettivamente comme scuatra stammo mise bunarielle dô centrocampo ( ma nun tenimmo però ‘nu vero esterno ‘e mancina e ce avimm’ ‘a arrangià cu Zuniga o Aronica !!!) a ll’ attacco (addó però nun tenimmo ‘na vera riserva ‘e Cavani…),purtroppo ‘o punto debbule nuosto è ‘a difesa accummincianno dô purtiere ca oramaje fa surà friddo, pe nun parlà ‘e ll’ate ca, si levammo a Campagnaro e forze aBritos  songo tutt’ ato ca campiune, anze arrancano spisso; e pe puntà ô scutetto ce vo’ ‘mmece proprio ‘na granna difesa !!!; n’atu mutivo overamente ‘mpurtante è ppo ‘o fatto ca ‘a suggità à dda cuntà quaccosa dint’ ô Palazzo, mentre ‘o Napule tène ‘nu presidente ca dint’â Leca e dint’â Federazziona conta quanto ‘o doje ‘e coppe a bbriscula quanno ‘o triunfo è a mmazze! Insigne po s’avesse rendere conto ca cu ll’ arbitragge ‘e  chisto inizio  ‘e tempurata (di stagione) Federazzione e Lleca ce ànnu fatto sapé  ca ‘a rubentus(sa)  e ‘o  Milan(no) ànn’ ‘a jí a fforza annante; pe ccui Insigne se facesse capace ca ô cchiú, ô cchiú
nuje si tenimmo ‘nu poco ‘e furtuna, o allimmeno senza ‘na granna iella, ô cchiú, ô cchiú  ce ‘a putimmo jucà nfi’ â fine centranno ‘o siconno/terzo posto! Ma se levasse ‘a capa ‘o scutetto  ca è ggià stato assignato d’uffizio â scuatra d’ ‘a Fiat(ta) ch’è destinata a gghiucà   38 rencontre  ‘nsidece contro a ddiece, cu  38 ricure  a ffavore ‘ncopp’ô zzero a zzero e 0 contro, 8 ammuniti ‘ntutto ‘o campiunato pe lloro e 80/100 pe ll’avverzarie!  Chesta è ‘a vita, Lorè! Stammo ‘nnItaglia. Che pretendimmo ‘e cchiú? Accuntentammuce!
R.Bracale Brak