Missione cumpiuta, guagliú! Cu ‘sta scuatra ucrajena ca ‘ncasa lloro ce avevano mazziato pe ttre a uno, tenévamo ‘nu cunto ‘nsuspeso e ajere ce simmo levato ‘e pprete dâ scarpa, soprattutto cu ‘o trainer(ro) lloro ca aveva ditto d’essere venute a nNapule pe vatterce n’ata vota e ce fosseno quase riuscite si a ‘nu certu punto Pintauro-Cavani nun avesse diciso ‘e saglí ‘ntusiello e avutà ‘o canisto cunzignanno quatte sfugliatelle a ll’ucrajene e risulvenno ‘o fullé! Passammo ê ppaggelle va’:
ROSATI 5: E mme dispiace. Penzavo ca fósse ‘nu bbellu purtiere, ma me sbagliavo; pur’isso comm’ô Pirata risultaje poco sicuro quanno êtt’ ‘a parrembà (intervenire) e cquanno êtt’ ‘a ascí.Facette ‘na retissanta fessaria ô mumento d’ ‘a siconna rredda ucrajena; è overo ca nè Donadel(lo), nè Aronica ascetteno a nchiudere ‘o tiro, ma isso se facette surprennere dô ricusceto (rimbalzo).
FERNANDEZ 5,5 :Nun fuje corpa soja si Mazzarri ‘o custrignette a ggjiucà ‘ncopp’â dritta e nno a ccentro,addó nurmalmente joca, ma ‘o guaglione à dda dimustrà d’essere scafato e ce à dda mettere ancòra ‘nu poco cchiú ‘e cazzimma.
ARONICA 5: Turnaje dô primmo minuto dopo d’ ‘a “strunzata” fatta contro ô Turino. Mazzarri ‘o mettette a ccentro e isso êss’ avut’ ‘a cumannà e urganizzà ‘a difesa…., ma chi t’ ‘o ddà! A ‘nu certo punto penzaje: Vuó vedé ca chisto pure ‘sta vota s’è gghiucato ‘o pareggio o ‘a scunfitta d’ ‘o Napule?! Ô mumento d’ ‘a primma rredda ucrajena, peggio ‘e culo’echiummo se facette fà ‘e capa a ccentro d’ ‘a camma ‘e ricore, ‘a uno ca spezzecaje ‘o pallone e ‘o dètte a cchillo ca steva appustato ‘ncopp’â linia d’ ‘a porta e cche signaje; ô mumento d’ ‘a siconna rredda ucraina nun ascette a nchiudere.
( Dô 72°PANDEV: sv)
BRITOS 6: ‘O meglio d’ ‘a difesa; pusitiva l’atalossa soja cu tutto ca turnaje ‘ncampo doppo ‘o ‘mpiccio ca ‘o tenette fora cchiú ‘e ‘nu mese.
MESTO 5,5: Prupusitivo ‘ncopp’â dritta, ma poco priciso ‘ncopp’ê cruzze!Cu ‘nu diacunale ‘mpruvviso e ddiciso mancaje ‘e poco ‘a rredda.
DONADEL 4: Doppo l’atalossa d’ajere e doppo ttutt’ ‘e sische ca lle cunzignajeno ‘e tifuse, è ssicuro ca a ggennajo chisto se nn’à dda jí a ffelicità a quacch’ata suggità o à dda appennere ‘e scarpette ô chiuovo! Ajere, no ppe ddicere, ma sbagliaje pure ‘e ccose cchiú faccile e gghiette facilmente ‘int’ê chiavette.( Dô 55° HAMSIK 6,5: Ll’ajuda p’ ‘o tre a ddoje dimustraje ‘a granna ‘nteliggenza tattica ‘e ‘stu guaglione ca, si joca, tene qualità ca nun se discutono e ca pure quanno trase a fullé ‘ncorso è ccapace ‘e cagnà faccia â rencontra.)
DZEMAILI 6: Ô mumento d’ ‘a primma rredda luvarda servette a cCavani n’ajuda spettaculosa, a zzuco ‘e caramelle. Partette cu granna perzunalità, po se nne scennette ‘nu poco cu tutt’ ‘a scuatra doppo d’ ‘a redda d’ ‘o pareggio ucrajeno ma po risurgette cu ‘o doje a ddoje.
INLER 6: O turco-napulitano alternaje mumente overo bbuone cu ate ‘e ‘mprecisione.Cumplessivamente però fuje n’atalossa suddisfacente ‘a soja; è uno ca dà sempe cunfianza(affidamento).
DOSSENA 4,5: Niente ‘a fà: è n’ècchese jucatore scadente e ppronto pe san Gennaro ‘e Pòvere, primma ca ‘o nzerrano:’e pochi cruzze ca facetteno fujeno tutte ‘mpricise e fora mesura e mettette spisso ‘ndifficultà ‘e cumpagne tardanno ‘e ppicalopse (le sovrapposizioni)
VARGAS 4: Acchiappa a chist’ato. Nun se putette guardà! Chisto n’ è n’ato ca a ggennajo se nn’à dda jí assulutamente lassannoce cu ‘na dimanna senza risposta:ma è ‘nu jucatore ‘e pallone, ‘nu soprammobile o ‘na zuppa ‘e carnacotta?Nun parlanno d’ ‘a palla perduta a mmità campo ca facette partí ll’azziona d’ ‘o vantaggio ucrajeno, ‘o guaglione cileno jucaje senza ggenio,sbaglianno cose facile facenno ‘ncazzà nun poco chille ca stevano ô san Paolo e nujeaute ‘ntribbuna divano!
(Dô 56° INSIGNE 6,5: Trasette dànno tassezza e alleria â manovra uffenziva luvarda e ghiette vicino â rredda cchiú ‘e ‘na vota. Peccato che ‘a sciorta nun ll’accumpagnaje.Uperrosa (splendida) ‘a férna (il tacco) pe Marekiaro!)
CAVANI 10: E ‘o vuó mettere cchiú ppoco a uno ca te risolve ‘nu fullé nun sulo signanno ‘a bbellezza ‘e quatto rredde, ma facennose nutà ’ndifesa e spisso a mmità ccampo ?’Nu gialante, ‘nu marziano ca se pigliaje ‘a scuatra p’ ‘a mana e s’‘a purtaje a vvencere! Troppo gruosso e ssempe carativo (generoso) pure ‘nfase difenziva.Chisto s’ à dda fà viecchio a nNapule e De Chiacchiaroniis se levasse ‘a capa ‘e vennerselo pe sissanta meliune d’evere. Pe uno comme a cchisto nun ce stanno denare ca avastano e mMazzarri nun ce venesse a ddicere ca ‘o Napule nun dipenne ‘a Cavani… Quanno ‘o Matadòr ce manca o nun gira ‘o Napule è ‘na scuatretta ‘e turneo d’ ‘e Salesiane! E a gennajo De Chiacchiaroniis allargasse ‘o cogliapiecuro e se precipitasse a accattà a Gomez Garcia pe sostituí a cCavani quanno chisto [po’ ccapità…] tène ‘o catarro!
MAZZARRI 5:E nno p’ ‘o risultato, ma p’ ‘e fessarie ca ll’ascetteno ‘a vocca doppo d’ ‘a fullé e soprattutto pecché nun à capito ancòra ‘e chi e comme s’ à dda serví… Sperammo ca doppo d’ ‘o fullé d’ajere lle se schiarisceno ll’idee, pure si nun ce spero…, visto ca pe tené n’idea s’à dda tené ‘na cerevella e a Wallerettino Erode chi ce ‘a dà?
LL’ARBITRO Nun saccio-comme-se-chiamma 5,5 – Quase niente ‘a dicere, ma siscaje troppo spezzettanno ‘o juoco e ffuje troppo pettemuso cu ‘e cuane e lle sventagliaje troppi cartelline jalizze!
E basta accussí!Ce sentimmo, si dDi’ vo’, lunnerí ca vène speranno ca ‘ncampiunato fossemo ancòra furtunate e ca dummeneca a gGenova contr’ê grifune turnassemo finalmente a vvencere doppo ddoje scutuliate fora casa e ‘nu pareggio casalinco!
Staveti bbe’!
R.Bracale Brak