E cchesta nn’ è n’ata! Che granna fijura ‘e mmerda ca facettemo ajeressera… Doppo d’ ‘o tre a zzero â casa lloro, ajeressera ll’ulandese ce venetteno a paccherià pure ‘ncasa nosta ! Che scuorno! Che scuorno guagliú! E i’ nun ce pozzo credere; ‘o vvedette, ma ancòra nun ce credo ca chillo d’ajeressera fuje ‘o Napule! No, no nun po’ essere! chillo d’ajeressera nun po’ essere ‘o Napule ca è siconno ‘ncampiunato… Chillo visto ajeressera fuje n’ata cosa: brutto, ‘mpriciso, senza ggenio e ssenza cegna. E mmenu male ca ‘a qualificazziona ggià ‘a tenévamo dint’â sacca! O forze no; forze fuje proprio pecché ‘a qualificazziona ggià ‘a tenévamo dint’â sacca, ca ‘o Napule sbracaje malamente e ave voglia Mazzarri ‘e dicere ca ‘o risultato fuje busciardo e ca si cca e ca si lla… Seh, seh! Si ‘o nonno teneva ‘e rrote era ‘nu pulmanno e si teneva ‘o trollo era ‘nu tramme! Qua’ busciardo e busciardo?! Chille, ll’ulandese ce facetteno ‘o culo vrognole vrognole e ce mettétteno ‘a lota ‘nfaccia e nuje nun fujemo capace ‘e levarcela. Passammo ê ppaggelle e v’avverto ca aggiu miso quache sseje sulo pe nun fà avvelí a quaccuno e pe nun essere ditto ca so’ ‘ncuntentabbile, ma nun ll’êsse avuto ‘a mettere a nnisciuno, pecché quanno se perde, comme se perdette ajere, nun s’ à dda essere ‘e maneca larga cu nisciuno! ‘O scuorno è scuorno e i’ tengo ‘a varva janca!
ROSATI 4 E che saciccio! Dacci oggi le nostre papere quotidiane!Dduje repuzamiente (respinte) veramente afelíse (ingenui) pruvucajeno ‘e pprimme ddoje rredde ulandesi.Pure ‘ncopp’â terza nun fuje crestiano d’antedrunnià (reagire).Me dispiace d’ ‘o ddicere, ma oramaje m’è scaduto dô core. Chisto s’ à dda vennere assulutamente e ppiglià a pPegolo! Si po’ nun è pussibbile, meglio mettere ‘e citofone…
UVINI 6 Me piacette ‘o debbutto ‘e ‘stu guaglione ca dimustraje senzo ‘e pusizziona, ancerca (anticipo) e bbuonu passo.
FERNANDEZ 5,5 L’argentino dimustraje sicurezza dint’a ll’ancerche, ma êsse avuto ‘a essere cchiú pronto p’ antedrunnià ‘ncopp’ê puttanate ‘e Rosati.
CAMPAGNARO 5,5 Me dispiace d’ ‘o ddicere, ma pur’ isso fuje prutagunista ‘e ‘na difesa poco cuncentrata; ‘ncopp’â terza rredda nun riuscette a redubblà (ripiegare) a ttiempo.
MAGGIO 4,5 Poca rrobba; quacche cusarella ô pprincipio, po te saluto e sso’! Sbagliaje pure n’uccasiona facila facila sotto porta.(Dô 69° MESTO 4,5 Idem cu ppatane si nun piezzo e ppejo: nun truvaje maje né spazzie adatte pe quacche bbuonu cruzzo, nè pe cquacche bbona arruca (suggerimento).)
INLER 5,5 – Contrastaje sí e ppuggiaje (rilanciò) pure, ma ‘o ffacette senza cegna e ccaturisema (determinazione) comme ‘mmece lle càpita ‘e fà dint’ê gghiurnate bbone; Soprattutto ‘nfase ‘e custruzziona risultaje assente. (Dô 57° PANDEV 5,5 Trasette purtanno ‘nu poco d’alleria â manovra, ma se vedette ca nun è ancòra a ll’arriba (al top). Fallette ‘na facila uccasiona ch’êsse pututo arapí n’ata vota ‘o fullé.)
DONADEL 5 Urdinaria amministrazziona. ‘E bbuono ‘o fatto ca ‘a ‘nu cuntrasto d’ ‘e suĵe nascette ll’arruca p’ ‘a rredda ‘e Cavani… Ma s’ è arrennuto Cristo cu ‘stu paternosto!
DOSSENA 4,5 Ma quanno ce ‘o dànno ô Milan(no), quanno?Sant’Antonio s’annammuraje d’ ‘o puorco e Allegri ‘e Dossena! E s’ ‘o pigliasseno, s’ ‘o pigliasseno e ce levasseno ‘stu ‘mpiccio ca ajere fallette‘na facila uccasiona ‘e rredda e ce mettette ‘o ssuĵo dinto a ll’azziona d’ ‘a terza rredda ulandese. Oramaje soffre ‘e guallarite acuta e recidivante e nnun appressuraje maje ‘ncopp’â curzia soja!
EL KADDOURI 6+ ‘A surpresa! ‘A meglia nota ‘ncasa luvarda.’O guaglione tene tecnica e bbuonu cuntrollo ‘e palla; peccato ca sotto porta se ‘ncartaje doppo d’avé fatto bboni ccose!
VARGAS 4,5 Dette ‘a cunferma ca ô mese ca trase s’ à dda jí a accasà a quacche ata parte: fallette súbbeto ‘na rredda a pporta aperta e se stutaje. Definitivamente!
CAVANI 5,5 Truvaje súbbeto ‘a rredda ma po ne sbagliaje tante ate. Currette, se smarcaje e se prupunette ma senza essere cuncreto comme ô ssolito!
(Dô 66° R.INSIGNE 6 ‘E ‘ncuraggiamento. Me dispiacette p’ ‘o criaturo ca debbuttaje a ffullé fernuto e diciso. Ma ‘o frato ‘e Lorenzigno ‘o ttène e p’ ‘o ffuturo po’ turnà utile).
All. MAZZARRI 4,5 Scuatra arremmediata e ce po’ stà, ma troppo squilibbrata pe ccogliere allimmeno ‘nu pareggio; ‘na cosa è tullemà (osare), ‘na cosa è esaggerà!
Arbitro DEAN 5 Direzziona all’ingrese d’ ‘o frate-cucino (scemo!) ‘e zi’ Michele Misseri. Nun siscaje quase maje e quanno ‘o facette, ‘o facette a sproposito. Nun cecaje a vvedé ca Jorgensen(no) affunnaje a cCavani dint’â camma ‘e ricore appujannose cu ‘o guveto e nno cu ‘a spalla, ‘ncuoll’ô Matadòr(ro)!
E cu cchesto ve saluto e si dDi’ vo’ ce sentimmo lunnerí ca vene speranno ca ve pozzo cuntà cose bbone d’ ‘a trasferta a Milano contro a ll’Inter(re). Stavati bbe’!
R.Bracale Brak