Tutto summato dicimmo, pure si nun è overo, dicimmo ca fuje cuntento guagliú! Ajere all’ora d’ ‘o spasso,’o Napule purtaje ‘mpuorto senza nisciuna parpetazzione ‘e core, ‘o primmo fullé d’ ‘o ggirone ‘e ritorno e â fine d’ ‘a jurnata [arrivanno a quaranta punte, ê spalle d’ ‘o pappavallo ‘e Lotito (42 punte) e a cchelle d’ ‘a rubbentus(sa) (45 punte) ca cchiú ‘e ‘nu punticiello nun riuscette a arrubbarese a pParma] mettette ‘na preta ‘mpurtante p’ ‘a cunquista ‘e chillu terzo posto ca nun è ‘na cosa ‘e ll’atu munno, ma è mmeglio ‘e niente pecché quann’uno ato nun tène cu ‘a mugliera se cocca. E p’ ‘o mumento ‘o Napule cchiú ‘e chesto nun se po’ permettere e s’ à dda arrangià cu ‘a mugliera!Dicimmo allora ca fuje cuntento, pure si nun è overo…. e nun è overo pecché pe ‘na bbona primma mez’ ora d’ ‘o primmo aione ‘o Napule me facette magnà ‘o fecato e ‘a rezza d’ ‘o core pecché ‘ncampo nun ce stette e me facette aspettà ‘e grazzie ‘e Cesare primma ‘e scetarese e accummincià a ffà quaccosa pe risolvere ‘a pratica-Palermo…e soprattutto nun fuje cuntento pecché ‘o zengariello nuosto nun riuscette a mmettere dinto ‘a rredda ca fósse stata a quarta d’ ‘a jurnata e ‘a nummero ciento ‘a che isso joca ‘nserie A! E ddicere ca ll’uccasiona bbona ( sulo sulo e a ttu ppe ttu cu Ujkani…) ll’êva avuta, sprecannola malamente!Sperammo ca se ll’è astipata pe dummeneca ca vène contr’â Fiorentina! Passammo ê ppaggelle va’!
DE SANCTIS 6 Nun tenette granché ‘a fà, ma fuje prisente ô pprincipio ‘e fullé quanno a dDossena lle capitaje ‘accasiona bbona pe purtà ‘nvantaggio ‘e purtualle siciliane.
CAMPAGNARO 7 Atalossa ‘e granna attenziona d’ ‘o Toro capace ‘e chiusure ‘mpurtante e d’accumpagnà a mMaggio ‘ncopp’â curzia ‘e dritta.
BRITOS 7,5 Atalossa overo ‘mpurtante a centro d’ ‘a difesa ‘e ll’ècchese murtadella ca nun sbagliaje niente e spisso cu ccegna e autorità, palla ô pede, facette arremarrà (ripartire) ll’aziona cu qualità. I’ mo vulesse parlà a quatt’uocchie cu cchille ca nun se vonno fà capace ca cu ‘a scualifica ‘e culo’echiummo ô Napule ll’ànnu fatto ‘nu favore ‘mpurtante! A rriseco ‘e scualifica ascette pe precauzziona. (dô 79° FERNANDEZ sv)
GAMBERINI 7 ‘Na sicurezza;sbagliaje sulo quacche púggia (rilancio), na ‘nchiusura fuje assaje priciso, comme quanno a uosemo stuppaje a mMiccoli.
MAGGIO 7,5 Ajere nun me facette ‘ncazzà, anze me facette piacere vedennolo ca sta turnanno chillo ‘e ‘na vota; se vedette ca ‘a ‘gnora lle sta dànno ‘na mano e â notte sta durmenno…Terza rredda cunzecutiva, doppo chelle a sSiena e rRoma, e n’ ata atalossa cunvincente. Sbluccaje ‘nu fullé ca se steva cumplicanno e ppo addeventaje, ‘ncopp’â curzia ‘e dritta, ‘na spina dint’ô scianco d’ ‘e ppurtualle siciliane. Dossena pruvaje a cuntrastarlo p’ ‘a primma mez’ora, po vedette ca nun era cosa e s’arrennette.
BEHRAMI 6,5 Tanta sustanza a centrocampo. A ll’arranqua se mettette a diriggere ‘a circulazziona ‘e palla snza affunnà ‘o pede pe nun arresecà, essenno tiffitato, ‘nu cartellino jalizzo.
INLER 7,5 ‘O fullé praticamente fernette lla, quanno ‘o turco-napulitano cu ‘na granna azzeccata cagliosa ‘a fora mettette ‘mporta ‘o pallone d’ ‘o doje a zzero. Da chillu mumento nun ce fuje cchiú storia:vincette tutte ‘e sfite ‘mmiez’ô campo e ffuje eccezziunale quanno cu ccegna vincette ‘nu cuntrasto ‘ncopp’ â dritta, cadette, s’aizaje, ricuperaje ‘a palla e ‘a mettette forte ‘mmiezo p’ ‘o tre a zzero ‘e Lorenzigno! Ma ch’ ato à dda fà? Addó stanno chille ca ‘o criticavano? Facitele parlà cu mmico!
ZUNIGA 6,5 Ô pprincipio aizaje pórvera, ma po dalle e ddalle ‘o cucuzziello addeventaje tallo e Zuzú fernette pe vvencere ‘a sfita cu Anselmo ca ô finale s’êtt’ ‘a arrennere distrutto dê ccarrettiglie (dagli scatti) d’ ‘o culumbiano. Riuscette a fà male pure quanno s’accentraje mannanno dinto a mMarekiaro e a ccumpagne.Si riesce a andivinà quacche cruzze ‘e cchiú aggio paura ca Armero nun ‘o vedimmo spisso.
HAMSIK 7 Marekiaro chist’è e ce ll’âmm’ ‘a tené cumm’è! Quanno ggià ‘o stevo facenno ‘e muorte p’ ‘e tanti pasiglie (passaggi) sballate e p’ ‘e ghiucate senza zuco, ecco ca isso ‘ncarraje ‘na granna jucata bbona e mettette ‘ncapo a mMaggio ‘o pallone ca sbluccaje ‘o fullé. Da chillu mumento criscette assaje e cu isso tutt’ ‘a scuatra: quase tutte ‘e pallune passajeno p’ ‘e piede suoje e spisso ‘o Palermo faticaje pe mettere ‘na pezza a ll’apereture soje ‘ncopp’ a ll’esterne ca spezzajeno ‘o schieramento siciliano. (da ll’86° R. INSIGNE sv pe chello ca facette , ma 6 ‘e ‘ncuraggiamento!)
PANDEV 5,5 Jurnata no d’ ‘o macedone ca nun facette n’ atalossa pusitiva, anze pe troppu tiempo fuje fora dô juoco. Però soprattutto durante ô primmo aione servette ‘nfase ‘e prutezziona d’ ‘o pallone pe fà saglí ‘e suoje. (dô 68° L.INSIGNE 6,5 – Trasette súbbeto ‘int’ô juoco mannanno ‘int’ê chiavette ‘a difesa d’ ‘e purtualle soprattutto uno contro a uno. Priciso e diciso nun sbagliaje ‘ncopp’â granna ajuda ‘e Inler(ro)!)
CAVANI 6+ Apettaje inutilmente ‘e vederlo signà; avette pure ‘na bbona accasione, ma nun ‘a sfruttaje… Peccato! ‘Ncumpenso détte ‘na mana jucanno a tutto campo e addirittura dint’ ô mumento cchiú difficultuso d’ ‘e cuane jucaje quase ‘a centrocampista favurenno ‘o dessarrollo (lo sviluppo) d’ ‘a manovra.
MAZZARRI 7 Chi vence ave raggione e ‘o Napule vincette pure si ‘a scuatra faticaje troppo p’ ‘a primma mez’ora e isso nun facette niente p’adderezzà ‘a varca; pe furtuna però ‘a scuatra arresecaje sulo dint’a ll’uccasiona capitata a dDossena. Sbluccato ‘o fullé cu ‘a rredda ‘e Maggio, ‘o Palermo s’accumpliaje (si sciolse) e ‘o Napule venette fora nchiudenno ‘o fullé e cuntrullannolo senza prubbleme. Da apprezzà ‘o fatto d’avé sustituito a bBritos a rriseco ‘e squalifica e chilli minute cuncesse a Roberto Insigne pe farlo rispirà ll’aria d’ ‘a serie A.
l’arbitro GERVASONI 3,5 ‘e stima. Uno d’ ‘e cchiú scieme arbitre ‘ncirculazziona; carta canusciuta nun se smentette; siscaje a vienetenne, spisso caputianno ‘e falte e facenno ‘o ‘nzisto soprattutto cu ‘e cuane, mentre cu ‘e purtualle fuje ‘e maneca larga!Facette nfenta ‘e niente quanno Dossena cu ‘nu sbuttulone affunnaje a cCavani dint’â camma ‘e ricore.
E cu cchesto ve saluto e ve ringrazzio ‘e ll’attenziona e si dDi’ vo’ ce sentimmo â prossima vota.
Staveti bbe’!
R. Bracale Brak