Tengo ‘o core dint’ô zzuccaro guagliú! Certo ll’anno nuovo êsse pututo pure accummincià meglio si ‘o pappavallo ‘e Lotito nun se fósse arrubbato ‘nu paro ‘e punte cu ‘nu ricore ca nun ce stette e si ‘o Diavulo nun êsse fatto ‘o stesso cu chillu figlio ‘e coperativa ‘e Pazzini ca [comme ll’avverzario l’appujaje ‘na mana ‘ncopp’â spalla e lle dicette: Ma che bell’uocchie ca tiene!] se menaje ‘nterra facennose assignà ‘nu ricore favezo… Ma nun se po’ avé tutto dint’â vita! Accuntentammoce ‘e avé accumminciato bbuono ‘o duimilatridice rigistranno ‘a scunfitta d’ ‘a rubbentussa ‘ncasa soja e ciové dint’ ô famoso mMerdarum Stadium ‘e Turino, a scunfitta d’ ‘a Fiorentina e cchella ‘e ll’Interre e ‘a vittoria d’ ‘o Napule nuosto ca ajeressera ne mannaje paccheriate â casa lloro ‘e rumanise ‘na furmazzione ‘e sbruffune viulente e ‘mbrugliune, ‘e spaccune, ‘e sbafante, ‘e grannezzuse, ‘e favune cu ‘nu capitano ca mo ‘mmece d’ ‘o pullicione se starrà zucanno, anze magnanno n’atu franfellicco…(capisce a mme!). Doppo d’ajeressera, pe ccomme ‘a veco i’ si ‘o spogliatoio rummane cumpatto e aunito, si De Chiacchiaroniis piglia chilli tre o quatte jucature ca servono urgentemente, allora sí ca putessemo fà ‘nu penziero nun dico riguardo a cchella cosa….. ca è mmeglio nun annummenà, pecché dicette ‘o si’ prevete: I’ nun ce crero,ma ‘a suttana se ne care!….e ‘o Napule tène troppe uocchie ‘ncuollo, accumminciano ‘a chille ‘e chillu cestariello ‘e gGiggino uocchie-stuorte…[ca pure ajeressera stette vicino a De Chiacchiaroniis,menanno ‘o nniro ‘e seccia, ca pe furtuna nun ce cugliette], ma riguardo a ‘nu terzo posto ca putesse salvarce ‘a tempurata!
Passammo ê ppaggelle va’:
DE SANCTIS 7,5 ‘O miraculo, ‘o miraculo! Fuje forze ‘o rinnovo d’ ‘o cuntratto…, fujeno forze ‘e prighiere meje…, nun saccio chello ca fuje, ma ajeressera Morgan turnaje a ffà ‘o pirata e nun sbagliaje niente! ‘O miraculo, ‘o miraculo! Atalossa straurdinaria d’ ‘o purtiere cuano, ca fuje attiento e priciso quanno ascette e ca cchiú ‘e ‘na vota (cu paríbbase[interventi] ‘mpurtante) nijaje â Roma ‘a pussibbilità ‘e turnà a arapí ‘o fullé e s’arrennette sulo ‘ncopp’ô tre a zzero, permettenno a Osvaldo ‘e signà ‘a rredda d’ ‘a bbannera. Tutte mmeritate ll’applavuse d’ ‘o san Paolo!
CAMPAGNARO 7,5 Cu ttutto ca ‘o Toro sape ca a ggiugno à dda cagnà maglia, ajere nun se n’arricurdaje, annuraje chella luvarda e fuje prutagunista ‘e granni chiusure ‘ncopp’â dritta e fuje sempe pronto a ffà arremarrà [ripartire] l’ azziona e a sserví mo a mMaggio, mo a ll’attaccante.È overo ‘nu peccato perdere ‘nu jucatore accussí!
BRITOS 7 Granna atalossa ‘e ll’ècchese murtadella cu ‘na sola fessaria: chella d’esserse peduto a Osvaldo quanno ‘o bbestia signaje ‘a rredda rumanesa. Ma p’ ‘o riesto ch’ ‘o vuó dicere? Duminaje ‘ncopp’ê ppalle avete,sventanno chiú ‘e ‘nu pellicro [minaccia] e spisso ascette palla ô pede p’ arremarrà ll’azziona.
GAMBERINI 6,5 Atalossa ‘e granna sicurezza pe ll’ècchese viola ca riuscette cu tanta ‘sperienzia a vastacà [arginare] ll’attaccante rumanise.
MAGGIO 7 Nun ‘o ssaccio, ma forze – finalmente ! – ‘a ‘gnora s’è ddicisa a restà a spuzzuliarse essa â notte ‘a criatura… e ‘o guaglione sta arrepusanno ‘nu poco ‘e cchiú…, certo si è ca ajere me parette ‘e turnà a vvedé ‘o Maggio ‘e ‘na vota! Ato che mumento ‘e crisa.Riuscette pure a signà ‘a siconna rredda cunzecutiva doppo chella fatta a sSiena, mettenno ‘a cerasella ‘ncopp’â pizza ‘e n’atalossa urdinata ‘nfase difenziva e pusitiva ‘nfase ‘e puzamiento [spinta].
BEHRAMI 7 Tuosseco p’ ‘o centrocampo rumaniso; autentico cane ‘e presa riuscette a mettere ‘a musarola a n’accunto delinquente e periculuso comme a Totti ca quanno s’avasciaje nun fuje maje crestiano ‘e lanzà a mmestiere esterne e attaccante… Ô finale sagliette ‘ntusiello srarecanno pallune ‘mpurtante e cumannanno ‘o repuzamiento [ripartenza].
INLER 6,5 S’accuntentaje ‘e fà ‘a barràcema [diga] annante â difesa. ‘Nzieme a bBehrami jette spisso ‘mpressione [ in pressing] mannanno ‘int’ê chiavette [in confusione] ‘o centrocampo rumaniso.Quanno se trattaje ‘e ascí a cchi sî ttu e cchi songh’i’, nun se tiraje maje arreto, vincenno spisso! (dô 65° DZEMAILI 6 ‘Na bella crusta [percussione] centrale; p’ ‘o riesto tanta pressione proprio ô mumento ca ‘a Roma tentaje ‘o ttutto pe ttutto.)
ZUNIGA 7,5 Vuó vedé ca ‘a voce ‘e ll’arrivo d’Armero ll’abbrusciaje ‘o prozo… certo si è ca Zuzú jucaje comme nun faceva ‘a paricchio; granna atalossa ‘e sustanza senza inutili garabbate [ghirigori], atalossa ca lle permettette ‘e vencere ‘a sfita a mmancina contro a pPiris, arrivanno cchiú ‘e ‘na vota ‘ncopp’â linia ‘e funno;pulitelico e garbuso [prezioso e generoso] pure ‘nfase difenziva cu valiosi [pregevoli] diacunale. Venesse Armero, venesse! Certo ca fósse bbello puté cuntà p’ ‘a fascia ‘e mancina ‘ncopp’ a dduje bbuoni jucature…putenno scegliere!
HAMSIK 6,5 Fora pusizziona, fuje custretto a ffà ‘o mediano ‘nfase difenziva, pe vastacà [arginare] ‘o pussesso palla cuntinuato d’ ‘e rumanise.Dètte ‘na mana ‘nfase ‘e custruzziona mentre a ll’ attacco, quase sturduto, fallette ‘na granna accasione doppo d’avé scanzato pure ‘o purtiere! (da ll’ 88° INSIGNE sv).
PANDEV 7 Quanno sta ‘nfromma, comme primmu viulino, nisciuno lle sta ‘a coppa!
Ajere ascette e trasette cuntinuamente dint’ô fullé,’ncarranno ddoje straurdinarie ajude p’ ‘a primma e siconna rredda ‘e Cavani,ca ancòra ‘o sta a ringrazzià! Sbagliaje pure quaccosa, ma ‘nfase uffenziva fuje ‘na cuntinua spina dint’ ô scianco d’ ‘a difesa e ‘e rumanise pe fermarlo, specie p’ ‘a primma mez’ora ‘o vattetteno sistematicamente sotto a ll’uocchie ‘e chella fetenzia ‘e Tagliavento, ‘o tagliaperucchie ‘e Terni, ca niente vedette, niente sentette e nniente dicette! (da ll’82° MESTO sv)
CAVANI 9 Lla ‘o vulevo vedé e lla ‘o vedette: cu sidice rredde ‘ncimma ‘a crassifica ‘e ll’artigliere addó ‘o zengariello nuosto se piazzaje cu ttre rredde una cchiú bbella ‘e n’ata; oramaje nun tengo cchiú aggettive pe ‘stu guaglione uruguaggio ca ajere trascenaje ‘e suoje a vvencere ‘nu fullé ‘mpurtantissimo ca cunzentette ô Napule ‘e piazzarse ‘nsulitaria ô terzo posto ‘ncrassifica cu ttutte ‘e duje punte ‘e penalizzazziona; senza pietà e tassuso assaje ‘ncopp’ ê ddoje primme rredde, sagliette ‘mparaviso ‘ncopp’â terza liberannose d’ ‘a marcatura ‘e Burdisso e nchiudenno praticamente ‘o fullé cu ‘na capata preputente; p’ ‘o riesto solito, cuntinuo cuntribbuto a tutto campo senza palla. ‘Nu mostro! Se purtaje â casa ‘o pallone e spero ca quanno primma se porta pure chillo d’oro! E si De Chiacchiaroniis s’ ‘o venne nun s’arretira cchiú â casa e è mmeglio si se prenota ‘na casarella ‘mmiez’ô quadrato!
MAZZARRI 7,5 ‘Ncarraje tutto cosa sciglienno ‘e mannà ‘ncampo a pPandev(vo) dô primmo minuto. E cumunque fuje ‘mpurtante ‘a famma ‘e vencere ca mustraje ‘ncampo ‘a scuadra luvarda ca andivinaje tutto mantenenno dô pprincipio n’atteggiamento attiento pe ppo arremarrà ‘ncontropiede:tutto chesto fuje pussibbile pecché ‘a difesa, furtunatamente orfana ‘e culo’echiummo, mettette ‘a musarola ô meglio attacco d’ ‘o campiunato! Quanno se dice ‘o mazzo ‘e Mazzarri!!!
arbitro TAGLIAVENTO 2,5 e ll’aggiu trattato! Vulesse proprio vedé ‘o cummissario ‘e campo comme ll’à trattato a cchistu tagliaperucchie ‘e Terni (ca si fa tinture e ppermanente comme arbitraje ajeressera… e ‘e ssignore lle scippano ‘a faccia… ll’à dda ringrazzià!). Ajeressera ‘stu ‘ntontero sistematicamente se ne futtette d’ ‘o recolamento e ‘e ffalte ‘e ssiscaje ô ccuntrario, sempe contr’ê cuane e lle mancaje ‘o core ‘e ammunní e ghiettà fora a cchillu sicchio ‘e lota ‘e Totti (capuzziello e sbafante comme a tutt’ ‘e rumane e rrumanise) ca fuje scurretto e viulento pe tutt’ ‘o fullé e isso, lle permettette tutto senza mettere lencua; pe nun parlà po d’ ‘o ricore ca nun vulette vedé quanno ‘o purtiere rumaniso arrunzaje a cCavani! Furtuna ca ‘o Napule risulvette ‘a pratica pure senza ‘o ricore! Fossero state nicessarie quacche cartellino jalizzo o russo ‘e cchiú spicialmente cu chilli delinquenti futtute d’ ‘e jucature ‘e Zeman(no) ca facetteno ‘e guappe e ‘e pruvucature! Ma chi t’ ‘o ddà?! Sperammo sulo ‘e nun ‘ncuntrarlo cchiú a ‘stu tagliaperucchie!
E mettimmo punto cca.Cu cchesto ve saluto e ve ringrazzio ‘e ll’attenziona e si dDi’ vo’ ce sentimmo â prossima vota.
Staveti bbe’!
R. Bracale Brak