Mazzarri ‘ncarraje quase tutto

O patapato ‘e ll’acqua a Forerotta ajeressera , guagliú e ‘a nicessità ‘e vencere cu ttutto ca a ffianco d’ ‘o presitente ce steva assettato chillu cestariello ‘e Giggino-uocchie stuorte! Manco tutto chell’acqua ‘o cunvincette a starsene â casa!
Ma se vincette, se vincette senza nisciuna parpetazziona ‘e core. Avastaje n’aione sulo pe risolvere ‘a facenna e ce mettettemo dint’â sacca ‘e tre ppunte sfruttanno bbuono ‘a pussibilità ‘e metterce a pparo cu chella fetenzia d’ ‘a juventússa facennole sèntere ‘ncopp’â noce d’ ‘o cuollo e diente affilate d’ ‘o Ciuccio! Vittoria ‘mpurtante assaje pirciò ca – ‘ndipennentemente ‘a ‘nu ricalo d’ ‘o Chievo, ca nun penzo po’ succerere… – po’ essere p’ ‘o Ciuccio ‘a chiave pe tentà ‘na trupaja (una fuga)’nvista d’ ‘o fullé ‘e ritorno ô S.Paolo.E a ddicere ca m’aspettavo ca êssen’ avuto ‘a faticà ‘e cchiú e mmece ‘o Catania sciso ô san Paolo nun fuje ‘a solita scuatra tosta e periculosa ‘ntutte ‘e sezzione accumincianno dâ difesa ca ajere nun fuje ‘mpernata attuorno a ll’ècchese ‘nquacchiato ‘e sozzazza janca e nnera, Le Grottaglie ca ademasso (oltre) a cummannà ‘a sezziona soja fósse stato assaje periculuso ‘ncopp’ê tire ‘e squina e menu male ca nun ce stette ‘e cuane se stetteno attiente a ttutte chille ca s’affullajeno dint’â camma nosta e lle spezzajeno ‘e passe; ‘o stesso succedette p ‘o centrocampo addó ‘e nuoste facetteno unu muorzo ‘e Lodi e d’ Almiròn(no) quanno trasette st’atu mammone pur’ isso ècchese ‘nquacchiato ‘e sozzazza janca e nnera… ‘Nzomma ‘o Catania aizaje porvera pure cu ll’attacco addó Gonzalès(so),Barrientòs(so) e Berghezio facetteno palla corta sott’â difesa cuana ca nun sbagliaje niente e tiranno ‘e ssomme, ripeto, avastaje ‘o primmo aione pe risolvere ‘a facenna e ‘o siconno fuje cumpletamente inutile e servette sulo pe ffà piglià ‘o catarro a quaccuno! Ma mo vène ‘o bbello e lla ‘ncoppa nun ce âmm’ ‘a fà vení ‘e vvertiggine; ce s’ à dda credere e da sàpato ca vène s’ à dda jucà cu ‘o sanco a ll’uocchie e cu ‘a gnósa (consapevolezza) d’ essere addiventate overamente granne e téleje (maturi) pe ll’ubbiettivo principale.E facimmolo aummo aummo, senza darlo a vvedé ca, cu ‘a scusa ‘e farce ‘e cumprimente cca chi cchiú, cchi meno ce menono ‘a favetta e i’ ô maluocchio nun ce vulesse credere, ma m’arricordo ca pure ‘o si’ prevete dicette : “Nun ce crero…, ma ‘a suttana se ne cade!” E stanno tutte cualizzate contro a nnuje comme a cchillu battilocchio ‘e Pulvirenti ca ll’autriere, pe ccomme ‘a veco i’ ca so’ ‘nu malepenzante, nun ‘o dicette pe pazzià d’essere venuto a nNapule pe ffà ‘nu favore â juventussa… Aggio paura ca Agnelli e Pulvirenti s’erano accurdate pe ‘na cosa ‘e sorde si ‘o Catania fermava ‘o Napule. Ma tutt’ ‘e dduje s’êtten’ ‘a fà cchiú ddinto ‘e dinto ô prozo! Passammo ê ppaggelle va’:
DE SANCTIS 6- S’allungaje pe fermà ‘na periculosa punizzione ‘e Lodi. Abbastanza pronto ‘ncopp’ê ppalle fremme e ‘e tire ‘e squine, ma ô ssolito ‘nu chianto quanno ascette dê pale; furtunato quanno cadenno ascette ‘e capa ô lemmeto d’ ‘a camma!
GAMBERINI 6,5 Scafato, cu granne ‘sperienzia s’ ‘a cavaje pure quanno se ritruvaje ‘nchietta (accoppiato) dinto a ll’uno contro uno cu Barrientòs(so) o Gomèz(zo).
CANNAVARO 6,5 ‘O miraculo, ‘o miraculo, ‘o miraculo! Nun smarrunaje e anze risulvette quacche situazziona ‘ngarbugliata. Ma ‘o vizzio ‘e jí a rrompere ‘o pasticciotto ê cumpagne attaccante nun s’ ‘o vo’ levà. Pe ffurtuna ca ajere se truvaje ‘ncopp’ ô pere ‘nu pallone ca s’êva sulo menà dinto e isso ce ‘o menaje, pure si se mettette ô posto ‘e Cavani e ll’arrubbaje chillu pallone pulitelico (prezioso). Prumettette â tribbuna divano ‘e nun ‘o trattà malamente e mantengo ‘a parola…
GRAVA 6,5 Riturnaje ‘ncampo doppo n’eternità facennose truvà pronto e s’attaccaje a Gomèz(zo) comme a ‘na sanguetta marcannolo cu ccegna e malizzia comme se faceva ‘na vota.Pruvucato a arte da ‘nu catanese arresecaje ‘o cartellino russo riaggenno, ma ll’arbitro pe ffurtuna o nun vedette o lassaje correre.
ZUNIGA 7 Accumminciaje cuoncio cuoncio, ma po venette fora e riuscette a ffà ‘a diafòrasa (differenza).Cercaje ‘a porta, ma sbagliaje dànno ‘nvolontariamente a Marekiaro ‘o pallone pe sbluccà ‘o risultato. (da ll’ 82° ARMERO sv )
BEHRAMI 6 Tanta corza e ‘na cifra ‘e pallune ricuperate, ma nun putette essere ‘o solito cumbattente ca spisso ce fa vedé e cchesto fuje cundizziunato ‘a ‘nu cartellino jalizzo abbuscato ‘ngiustamente ô pprincipio d’ ‘o fullé! (dô 63° INLER 6 Trasette e se facette valé; però tiffitato, preferette spisso nun affunnà ‘o pere).
DZEMAILI 7 Doppo d’ ‘o fullé ‘e Parma Mazzarri po’ ccuntà ‘ncopp’ a ‘nu jucatore ritruvato.Cu tutt’ ata cunfianza (fiducia) d’ati vvote ajere se pigliaje spisso ‘a respunzabbilità ‘nfase ‘e mpustazzione cu pricise caputamiente ‘e fronte che facetteno male ô Catania. Ammunito ‘ngiustamente mo à dda zumpà ‘a sfita ‘e sàpato ca vène. Maledizzione!
MESTO 6- Dint’â primma parte d’ ‘o fullé ‘o Napule attaccaje quase sempe d” pparte soje e ‘o sustituto ‘e Maggio facette ‘o ppussibbile. Nun se po’ avé – però – tutto dâ vita e cumminfatte Giandummineco cuncedette quaccosa ‘nfase difenziva e ppirciò aggi’ ‘a essere stritto ‘e pietto.
HAMSIK 8 ‘O meglio ‘ncampo; ‘a ‘nu paro ‘e fullé, finalmente,sta jucanno comme me piace a mme: a ttutto campo e senza sparagnarse; ‘stu guaglione è finalmente ll’anema ‘e chistu Napule. Facènnose truvà ô mumento esatto, ô punto esatto sbluccaje ‘o risultato e ‘ncanalaje ‘a rencontra comme vulevano ‘e cuane; tuccaje mille pallune diannèmmannole (distribuendoli) cu rica e cumpasso (geometricamente). Troppo bbella ll’ajuda (l’assist), ‘a menà sulo ‘mporta ca purtaje Cannavaro a ddubblà (a raddoppiare) nchiudenno ‘a custione.
(dô 76° INSIGNE 6,5 Jucaje diciotto minute ‘e granna qualità dialucanno bbuono cu Cavani e Marekiaro;ca ‘o Napule è divintata ‘na granna scuatra se vede pure ‘a ‘stu fatto, ca po’ permetterse ‘e tené ‘mpanca jucature comme a cchisto!)
PANDEV 7 Atalossa ‘mpurtante e de nivella.Pruteggenno ‘o pallone comme sul’isso sape e po’ fà, mannaje ô manicomio ‘a difesa d’ ‘o Catania custretta a vederlo partí annascunnenno ‘o pallone o cchiú spisso custretta a vederlo lanzà ‘e cumpagne, senza puterce fà niente.
CAVANI 6+ Ajeressera nun le riuscette ‘e sfurnà nisciuna sfugliatella; fallette ‘na còmmeta accasione ‘e capa, ma dètte ô ssolito ‘na mana pulitelica e ghiucanno a ttutto campo dubblejaje (raddoppiò) spisso ‘ncoppa a ll’esterne e facette ‘o difenzore agghiuntato ‘ncopp’ê ppalle fremme. Sfurtunato, ‘ncopp’a ‘na punizzione centraje cu ‘na cagliosa ‘o travesagno ca ancòra sta tremmanno! Peccato!Sperammo ca ‘a mena dint’ â porta lazziale sàpato ca vène.
MAZZARRI 7,5 P’onestà nun pozzo fà a mmeno ‘e dicere ca ajere Erode ‘ncarraje quase tutto cu ‘e scelte fatte; cumminfatte Grava annullaje a gGomèz(zo) e Pandèv(vo)risultaje funnamentale p’ ‘o sviluppo d’ ‘a manovra d’ ‘e cuane. ‘A scuatra è finalmente cchiú téleja (matura) e tène chella famma, chella ligazzòna (continuità) e cchella cegna ca ati vvote nun se so’ vedute e ca ‘mmece servono comm’ô ppane si se vo’ arrivà a cchillu saciccio ca è mmeglio si nun ll’annummenammo P’ ‘o mumento cu 49 punte ‘o Napule tene ‘o siconno megliu punteggio ‘e sempe;ma nun mettimmo limmete â Pruvverenzia!
arbitro CALVARESE di Teramo 5 ‘E ‘ncuraggiamento. Troppo guaglione e senza ‘sperienzia;sventagliaje troppi cartelline jalizze scuntannosela cu ‘e cuane (tre ammunite, ma dduje, Behrami e Dzemaili nun s’ ‘o mmeretavano ) e unu sulo d’‘e catanisi; ‘ncumpenso aizaje ddoje vote ‘a mana a Grava, ‘na vota sparagnannole ‘o siconno cartellino jalizzo quanno ‘o surdatiello pruvucato riaggette cu ‘na manata e n’ata vota quanno nun s’ ‘a sentette ‘e siscarle contro ‘nu ricore pe ‘nu pallone ca ll’era sciuliato ‘ncopp’a ‘nu vraccio… e cchesto va pe cchello!
E cu cchesto ve saluto.Si dDi’ vo’ ce sentimmo ‘a semmana ca vène speranno ca sàpato ‘o Ciuccio va a rRoma a ffà male ô pappavallo ‘e Lotito! Staveti bbe’!
R.Bracale Brak