Ajere ‘mmerz’ê ttre che granna delusione, guagliú e cche nnervatura! ‘Na nichessa (vittoria) ggià surata e cunquistata fove jttata a mmare, justo ô nuvantesimo, dê guagliune ‘e don Rafèle ô Dall’Ara ‘e bBulogna addó ‘e cuane senza cazzimma nun foveno crestiane ‘e se llevà ‘e pacchere ‘a faccia avute dê murtadelle preturiane p’’o ppassato proprio ô Dall’Ara.Niente ‘a fà: nun se riuscette a vvencere e c’êttemo accuntentà ‘e ‘nu punticciullo sulamente ca è acqua ca nun leva sete. Niente ‘a fà! È ‘na jastemma menata!Ajere ‘e cuane erano state chiammate a ddà ‘na risposta a rRoma e a jjuvenússa ca sàpato êvano fatte ‘e valle ‘ncopp’â mmunnezza cu lLivorno e ccu sSampedoria. E ‘nfi’ a ll’uttantasettessimo rispunnetteno a mmestiere, proprio comme m’aspettavo ca avesseno risposto; ma po dinto a ll’urdeme tre mminute sbracajeno e se facetteno arrivà cunzentenno ê mmurtadelle preturiane ‘e pariggià ‘o fullé ‘ncopp’ô doje a ddoje e a ccose fatte, tturnajeno a nNapule cu ‘nu punto sulamente dint’â sacca lassannome ‘mmocca ‘o ttuosseco ca ggià tenevo pe bbia ca Dela e bBigònno s’êvano fatte levà dâ Roma n’ata purpetta ‘a dint’ô piatto avenno perduto, doppo a nNaingolann(o) pure a bBastòs(so)! Ancòra nun ce pozzo credere ca ‘na scuatra ‘e jucature scafate se facetteno cartià ‘a chilli zappielle d’’e mmurtadelle preturiane; ancòra nun ce pozzo credere ca ‘nu jucatore comme Albiòllo ajere se facette piglià ‘a duje attacche ‘e cannavarite acuta lassanno pe ddoje vote sulo sulo a rRolando Bianchi ca signaje ‘e ddoje rredde preturiane…ca pe mme foveno comme a ddoje curtellate dint’ê scianche. E cche saciccio! P’’a verità pe tutto ‘o primmo ajone nun è ca ‘e ccose fosseno jute bbone… po però a ll’arrancua, doppo ca trasette Marekiaro ‘e ccose cagnajeno e ‘o Napule adderezzaje ‘a varca primma pariggianno ‘o cunto cu ‘nu ricore d’’o Pipita (cuncesso, giustamente, pe ‘nu fullone (fallo grave) ‘ncuollo a dDezmailì) e ppo passanno ‘nvantaggio cu ‘na bbella rredda ‘eCagliecònno ca sfruttaje a mmestiere ‘nu bbassurero (suggerimento) d’’o Pipita. A cchillu punto – mancanno diece minute ô prazzo (alla fine) me penzaje ca ‘o bbutto fosse stato fatto…, ma chi t’’o ddà? Justo ô nuvantesimo lassato sulo d’Albiòllo Rolando Bianchi (apprufittanno pure ca ll’arbitro lassaje correre ‘nu sbuttulone ca mettette fora causa a fFernandezzo) mettette dinto ‘o siconno pallone e mme ‘ntussecaje ‘a diggestione! Passammo ê ppaggelle:
RAFAEL: 6- Chiammato ‘ncausa poco o niente, nun dico ‘ncopp’â siconna rredda, ma ‘ncopp’â primma êsse pututo fà coccosa ‘e cchiú e nun ‘o ffacette.
MAGGIO: 6- Muntaje bbuono ‘a guardia ‘ncopp’â fascia ‘e dritta, ma se vedette poco annante.
FERNANDEZ: 5 Nun lle pozzo perdunà d’esserse fatto mettere fora causa cu ‘nu sbuttulone proprio ô mumento culminante d’’o finale travulgente scurdannose ‘e Bianchi!
ALBIOL: 5 Jurnata ‘e sufferenza p’’o spagnuolo, ca – camme aggiu ditto – pe ddoje vote se facette piglià ‘a duje attacche ‘e cannavarite acuta lassanno pe ddoje vote sulo sulo a rRolando Bianchi ca signaje ‘e ddoje rredde preturiane…
REVEILLERE: 6- Bbona atalossa (prestazione) pure si cu ‘o freno a mmano tirato.
DZEMAILI: 6. Ce mettette tanta sustanza, soprattutto currenno e cumbattenno ‘ntricea cu ‘o curtiello ‘mmiez’ê diente; acqua lota o mazzate isso nun se tiraje maje arreto e anze avanzaje e se jette a prucurà ‘o ricore pe ll’uno a uno.
INLER 5,5 Primmo ajone brutto e scunclusiunato; ‘nu poco meglio a ll’arrancua forze pecché sentette ‘ncopp’â noce d’’o cuollo ca ce sta pronto Giorgigno… e vulette dimustrà ca ‘o lione è fferito sí ma nun è mmuorto ancòra!
CALLEJON: 6,5 Pareva ca nun fósse ‘a jurnata soja ; ma po lle capitaje ll’accasione adatta e nun fallette, mettennola dinto. Jucatore funnamentale.
PANDEV: 5 Jurnata no d’’o macètone: êsse avut’’a essere ‘a spina dint’ê scianche preturiane, ma nun se facette nè vvedé, nè nnutà (dô 57° HAMSIK 6,5: Atu jucatore funnamentale, trasuto ‘ncampo facette cagnà faccia â scuatra partecipanno a ttutte ‘e repartite (ripartenze) luvarde (azzurre) cumpresa chella ca fruttaje ‘o mumentaneo surpasso).
MERTENS: 5,5 A mmiezu servizzio, decidette ‘e jucà sulo a ll’arrancua (nella ripresa), ma p’‘o primmo ajone se chiammaje fora (dô 77° INSIGNE sv).
HIGUAIN: 7. Fove chillo ca lla nnante se muvette cchiú ‘e tutte quante, ma ‘e cumpagne suoje nun ll’accurdajeno comme êssen’avut’’a fà. Signaje cu ddicisione e pricisione ‘o ricore assignato ô Napule e mmannaje ‘mporta a Cagliecònno.
All. BENITEZ 5,5 Me dispiace, ma ‘e fatte jetteno accussí e durante ô primmo ajone vedette uno d’’e Napule cchiú bbrutte d’’a tempurata (stagione);pe ffurtuna ca po venette fora ‘o carattere e ‘a classe d’’e suoje ca però ô prazzo (alla fine) d’’o fullé avetteno ‘nu calo ‘e cuncentrazziona e cce refennetteno ‘na nichessa ggià a ppurtata ‘e mana; e ffove proprio ‘nu giannizzero d’’e suoje, Albiòllo!, a vení meno!Coccosa à dda fà don Rafele; coccosa s’à dda ‘mmentà: nun se ponno jettà punte accussí!
Arbitro DAMATO 4 Scadente. Vecchia carta canusciuta st’avvocato ‘e Barletta(e comme a ppugliese quase certamente tifoso juventino) è ‘nu chiafeo, fúceto e sciacqualattuca(incapace) e ati vvote addirittura vennuto!Turnato a diriggere‘o Napule doppo paricchiu tiempe dê ‘nguacchie fatte precedentemente ‘ndanno d’ ‘o Napule, ajere dispenzaje cartelline jalizze ad capocchiam ma no quanno fove nicessario e lassaje correre falte (falli) ‘mpurtante e pruteste d”e preturiane accummincianno ‘a Diamante ca avesse avuto jttà fora cchiù ‘e ‘na vota e nnun ‘o ffacette.Vedette bbuono ‘a falta ‘ncuollo a dDzemailí e ssiscaje ‘nu sacrusanto ricore; po però nun vedette o nun vulette vedé ‘o sbuttulone ca mettettefora causa a fFernandezzo ‘nnaccasione d’’o doje a ddoje preturiano e ‘a cca lle trasetteno e ‘a cca ll’ascetteno ‘eppruteste napulitane!
E fermammoce cca. Staveti bbe’ e si dDi’ vo’ ce sentimmo ‘nfra ‘na semmana!
R.Bracale Brak