Granna nichessa (vittoria) napulitana ô san Paolo

Ajeressera guagliú granna nichessa (vittoria) napulitana ô san Paolo. ‘Mpurtante e cummincente nichessa cunquistata cu ttutto ca ‘ntribbuna vicino ô presidente ce steva chillu cestariello ‘e ggiggino-uocchie stuorte, ca però ajeressera nun ce putette! ‘O Napule vincette, cunzignaje tre bbabbà ô Milànno e nn’ ‘o mannaje â casa paccheriato e chiagnenno.Granna nichessa (vittoria) ch’ i’ cunzidero ‘e bbuon’ aurio e dde sustegno (viatico) p’’o fullé ‘e miercurí ca vene contro â Roma, fullé ca s’à dda vencere! E accussí sia! Passammo ê ppaggelle:
REINA 6 Taaracommesechiamm’isso ‘o superaje cu ppricisione ‘ncopp’ô palo luntano, ma po ‘o purtiere cuano se riscattaje fermanno ddoje cunchiusioni ‘a fora e soprattutto ‘nu tiro ‘e Kakà a ll’arranqua (nella ripresa). Arresecaje ‘e fà ‘a frittata ascenno malamente ‘ncuollo a pPazzini, ma po se facette perdunà cchiú ttarde quanno ‘o fermaje dint’â camma levannole ‘o pallone dê piere.
MAGGIO 6- Durante ô primmo ajone cuncedette ‘nu poco troppo ‘nfase difenziva, però a ppietto ‘e ll’urdemi vvote appressuraje assaje ‘e cchiú. Retissante (clamoroso) ‘o palo cuoveto a ppurtiere fora causa.
Fernandez 6 Tutto summato nun fove sempe acàbato (perfetto), ma alluntanaje ògne minaccia senza ricamà a ppuntaggiorno e dê pparte soje Robinho s’’a vedette sporca.
Albiol 5,5 È ‘a curona d’’a capa mia ma, tutto summato, nun pozzo metterle ‘e cchiú:ajere facette quacche prano (errore) ‘e troppo ‘nfase ‘e plantamiento (impostazione); riuscette sí a mmettere ‘a musarola a n’accunto (cliente) scòmmeto e scamuso comme a bBalotelli, ma tenette cchiú ‘e ‘na respunzabbilità ‘ncopp’â rredda milanista, dàtosi ca ’mmece ‘e ascí cu ddecisione a nchiudere, cessaje arreto troppo cuncedenno a Taaracommesechiamm’isso spazzio e ttiempo pe ttirà.
GHOULAM 6,5 Dê pparte soje ‘o Milànno nun trovaje maje spazzio.Nzerraje ògne chésema (varco) cu ‘a nicessaria cattiveria e sse facette vedé cu cuntinuità ê spalle d’Insigne.
INLER 7 Finalmente ‘o jucatore ca vulesse vedé sempe! Avette ‘a fònda (merito) ‘e ripurtà ‘e suĵe súbbeto ‘ncopp’ô pareggio cu ‘nu bbellu tiro ‘a fora forze sfresato (sfiorato) ‘a uno cu ‘a maglia rossa e nnera. Da chillu mumento s’arricurdaje d’essere ‘nu campione, se scutuliaje ‘a cuollo preoccupazziona e ppaura e se mettette a ddiriggere ll’urchestra, tuccanno a mmestiere mille pallune e pennellanno ll’ajuda (l’assist) p’’o doje a uno d’’o Pipita. Ascette chiammannose ll’applavuse d’’o san Paolo. (da ll’88° DZEMAILI sv)
JORGINHO 6,5 Bbellu jucatore,currette assaje senza stancarse,piazzannose spisso ê spalle d’Inlèrro; quanno ‘o Milànno pruvaje a cchiuderse, truvaje sempe ‘a chésema (il varco)justa pe ‘ntrufularese. Che bbella cosa si se ‘mparasse a ddifennere meglio!
MERTENS 7 N’arillo! Jucaje a ttutto campo dispenzanno granni ghiucate e ricupere mutòde (favolosi). Nun se facette prià, nè se sparagnaje pe ddà superiorità nummerica e ll’ isurrupío (equilibrio) nicessario.
HAMSIK 6,5 Accumminciaje cu pruntezza e ddecisione truvanno cchiú ‘e ‘na vota ‘a chésema (varco) centrale p’’e cumpagne. Ce pruvaje spisso, ma senza furtuna pure si cu granna cumminzione e pittaje ll’apertura pe Cagliecònno dint’a ll’azziona d’’o tre a uno finale. (da ll’82° BEHRAMI sv)
INSIGNE 6 Jucaje tanti pallune ‘ncopp’â curzia ‘e mancina e, soprattutto ô primmo ajone,prucuraje cchiú ‘e ‘nu periculo p’’e diavule russe e nnire.Ô prazzo (al finale) s’ammusciaje e se ne scennette ‘e listonga (rendimento).(dô 78° CALLEJON 6,5 Trasette súbbeto e bbuono ‘nfullé, avasciannose spisso p’accumpagnà ll’eligma (manovra). Suĵo ll’ajuda (assist) p’’o tre a uno d’’o Pipita).
HIGUAIN 8 Jucaje sempe p’’a scuadra cu fforza, ggenio e ccegna (grinta) facenno a spurtellate cu ‘e centrale russe e nnire.Se jette a ‘nfilà ê spalle ‘e Mecchesesse purtanno in ‘nvantaggio ê suoje e ppo se facette truvà ô posto justo, ô mumento justo pe cuncedere ‘o bbisse e nchiudere ‘o fullé sfruttanno ‘a còmmeta ajuda (assist) ‘e Cagliecònno. BENITEZ 7 ‘A scuatra trasette ‘ncampo cumminta ‘e puté vencere e ppure juta ‘nsotto ô primmo tiro ‘mporta d’’o Milànno, nun se scumpunette e ccuntinuaje a appressurà (spingere) p’adderezzà ‘a varca e ccumminfatte truvaje quase súbbeto ‘o pareggio.Da chillu mumento nun cagnaje cchiú scena e ‘o Napule cuntinuaje a gghiucà a ccapa sotta sciupanno quacche accasione, ma nun facennose cogliere cchiú ‘nfallo dô Milànno.Se facetteno apprezzà sia Ghoulàmmo ca nun cuncedette niente a nnisciuno, sia Inlèrro turnato a gghiucà comme po’ e ssape fà isso;Marekiaro dimustraje ‘e stà ‘ncopp’â bbona strata, Ggiorgigno e Mertens se cunfermajeno, Insigne facette pace cu ‘o pubblico. S’à dda reggistrà ‘o muvimento passivo d’’a linia ‘e difesa, ca – comme sta capitanno spisso – cessa troppo arreto cuncedenno all’avverzario ‘e tirà ‘mprta libbero e ffranco; doppo tanti fullé forze Albiòllo s’êsse ârrepusarse…e prubbabbilmente Henrique gradualmente putesse serví!
ll’arbitro MASSA 4 ‘Stu bancario di Imperia ca arbitraje ajeressera p’ ‘a primma vota ‘nu fullé d’ ‘o Napule ô san Paolo nun me piacette! Troppo guaglione, senza sperienzia e ssoprattutto senza curaggio, sufferette ‘o bblasone russo e nniro e trattaje ê milaniste cu ‘e guante ggialle sparagnannole ‘nu ricore pe ffalta ‘e mano ‘e Mecchesesso e ammunenno sulamente a Abbiati, scuntratose cu Mertenso, addó [reculamento â mano] ll’êsse avut’ ‘a jettà fora…; e cchesto senza dicere ‘e tanti ati fetenzie assurtite cuncesse ê guappe e ê mammasantissime milaniste ca mazzuljajeno ê cuane senza ca isso ‘ntervenesse e ‘e mmettesse a dduvere!
E cu chesto ve saluto e si dDi’ vo’ ce sentimmo ggioverí ca vène doppo d’’o fullé ‘e coppa itaglia contro â Roma ca, comme aggiu ditto, s’à dda mazzulià pure sulo p’uno a zzero pe gghirce a gghiucà ‘a finale e vvedé ‘e vencere ‘o trufeo. Accussí sperammo! Staveti be’
R.Bracale Brak