Nun ce simmo, N’ati dduje punte rijalate

Nun ce simmo, nun ce simmo e nun ce simmo guagliú! N’atu bbuco dint’a ll’acqua ajeressera ô san Paolo; n’atu pareggio scatobbio e ppe gghionta ‘e ruotolo cu ‘na scuatra ‘e pellerine! N’ati dduje punte rijalate doppo chille umaggiate ‘ncasa nosta ô Sassuolo, a ll’Udinese, ô Chievo e ‘sta vota coceno ‘e cchiú dàtosi ca ‘a Roma e ‘o siconno posto se songo alluntanate cchiú assaje. Nun ce simmo, nun ce simmo e nun ce simmo. ‘O Napule jucaje ‘nu bbuonu primmo ajone, ma po – a ll’arrancua – s’ammusciaje ‘mparanza dimustranno ca ‘e ccosse nun riggevano cchiú doppo nove fullé jucate dint’a ‘nu mese e don Rafele, tenite a mmente!, tenette ‘e respunzabbilità soje ‘mprimmose pecché nun facette n’atecuato rutizzio ( turnover),accuntentannose ‘e lassà fora sulo a mMaggio pe rReviglié,e ppo pecché nun tenette ‘o cuorio, ô pprincipio ‘e ll’arrancua, ‘e levà quacche capo-masto cchiú stracquo e mmenà dinto quacche meza-cucchiara capace [comme attuccava ] ‘e menà ‘e mmane mettenno tutte ‘e unnece arreto â linia d’’a palla a ggestí cchell’unica rredda visto ca nun foveno cacchie ‘e farne n’ati ddoje o tre. A mmeno che don Rafele nun stesse ggià cu ‘o penziero ô fullé ‘e ggiovedí ca vene. Ma chesto sinaparco (comunque) nun ‘o scusa;’e ccose se fanno una â vota si no nun se ne fa nisciuna bbona! Ajeressera s’êss’avut’’a vencere assulutamente pe ttènere ‘o passo d’’a juventussa e d’’a roma e se puteva vencere contro a n’avverzario abburdabbile! È overo ca Calaiò ncarraje ‘nu tiro iuperocio (straordinario), ma si ‘o Napule fósse stato ‘ncopp’ô doje, tre a zzero… ‘a ballerina avesse signata ‘a rredda d’’a bbannera, ma nun ce avesse levato dduje punte!
Passammo ê ppaggelle:
REINA 5,5 ‘Na bbona parata ‘ncopp’a kKonate, ‘e ppo poca rrobba. Ce fósse vuluto ‘nu miraculo ‘ncopp’â timmurría (punizione) ‘e Calaiò, ca fove forte e pricisa e ttuccaje ‘o palo primma ‘e trasí, ma Pepe‘stu miraculo!
nun ‘o facette
REVEILLERE 6 Miso, p’’a primma vota, ô pizzo suĵo ciovè a ddritta, apprussuraje (spinse) cu ddicisione; ‘nfase difenzisa, sulo a ll’arrancua se facette surprennere ‘na grama vota ‘a Sculli.
FERNANDEZ 6,5 – Bbona atalossa ‘e ll’argentino ca fove sempe priciso ‘int’ê chiusure e crísemo (utile) a ‘mpurrà (avviare) ‘a manovra. Bravo a ssalvà ‘ncopp’â linia ‘na cunchiusiona ‘e Konate.
ALBIOL 6 Urdinaria amministrazziona cu ‘nu sulo sfregazzo (sbavatura) quanno Konate ‘o superaje ‘nnaccasione d’’o salvataggio ‘e Fernandèzzo.
GHOULAM 6,5 – Quanno a ll’arrancua, tutte se ne scetteno ‘e pressione isso fove ll’unico a ccrescere appressuranno (spingendo) cu cqualità e cuntinuità e mmettenno ‘mmiezo bbuoni pallune.
BEHRAMI 6 – Ricuperaje tanti pallune riuscenno , soprattutto ô primmo ajone, a stuppà ògne repartita (ripartenza) d’’o Genoa.
JORGINHO 5,5 – Tuccaje tanti pallune , comme ô ssolito, ma nun dètte ‘o cuntribbuto ca m’êss’aspettato ‘nfase ‘e sustetazzione (impostazione) pure pecché Matuzalèmme fove ll’ombra soja e ‘o mazzuliaje scientificamente, senza ca Banti pigliasse pruvvedimente. (danll’80° INLER sv)
MERTENS 6 Fove chillo ca cercaje cchiú spisso ‘a porta: ddoje vote Perínno lle dicette ‘e no e n’ati ttre vvote ‘o pallone ascette ‘e poco; p’’o rieste fove n’arillo cu ‘arteteca e pe tutt’’o fullé nun foveno crestiane d’’o piglià.Ll’attocca miezu voto mancante pecché pe ccausa soja Banti assignaje ‘a timmurría (punizione) ca Calaiò trasfurmaje. (da ll’85° PANDEV sv)
HAMSIK 5,5 ‘A chiena e ‘a vacante; alternaje bbelli gghiucate a ffessarie ‘a pigliarlo a ppacchere, soprattutto a ll’arrancua. (dô 72° INSIGNE 5,5 È overo ca trasette a ‘nu bbruttu mumento, ma nun se facette nutà).
CALLEJÒN 6,5 Sempe prisente ‘ncopp’â curzia ‘e dritta dint’ê ddoje fase ‘e juoco, pe ddoje vote fove stuppato ô mumento ‘e tirà a bbotta sicura. Che peccato!
HIGUAIN 6,5 Pistuto (incredibile) ‘o colpo ‘nsotto a ccucchiaro pe superà a pPerínno.P’’o riesto assicuraje presenza dint’â camma d’’e crifune, ma senza dà punte ‘e riferimento â tràsera (alla difesa) d’’o Genoa. Diffidato, se facette ammuní cazzemmusamente pe scuntà ‘a scualifica cu ‘o Livorno e nno, si fósse capitato, cu ‘a roma.
BENITEZ 5 Me dispiace, ma ‘sta vota pure don Rafele tenette ‘e respunzabbilità ssoje, comme aggiu ggià ditto ô pprincipio e si ‘stu pareggio ce lassaje ll’amaro ‘mmocca sperammo ca ggiovedí ca vene don Rafele ce ‘o lleva facennoce passà ‘o turno cu ‘o fullé d’E.L.
arbitro BANTI 5 Vecchia cunuscenza e antica fetenzia, comme ô 99,9 pe cciento ‘e ll’arbitre tagliane, ggià ati vvote ‘ncruciata dô Napule; ajeressera però nun ce facette gruossi tuorte tranne ‘o fatto ca ausaje dduje pise e ddoje mesure: tuosto e ffiscale cu ‘e cuane e ppermissivo cu ‘e crifune.
E ccu cchesto ve saluto e ce sentimmo, si dDi’ vo’, viernarí ca vene doppo d’’o fullé d’E.L. quanno spero ‘e cuntarve d’avé vinciuto e ppassato ‘o turno.Staveti bbe’.
R.Bracale Brak