Mme fósse piaciuto ca 4-0 fósse stato ‘o risultato finale

Guagliú, ll’êvo ditto p’’e juorne passate a cchiú ‘e ‘nu cestariello ca me azzelliva ‘e ccarne cu ‘o fatto ca ‘o Napule [‘nserie A] nn’êva maje vinciuto ô Massimino, ll’êvo ditto ca ce sta sempe ‘na primma vota. E ‘a primma vota fove justo ajeressera quanno ‘e cuane scummajeno ‘e sanco ‘o Catania risulvenno ‘a prattica ggià ô prazzo (alla fine) d’’o primmo ajone nchiuso ‘nvantaggio ‘e quatte rredde a zzero… E mme fósse piaciuto ca chillo fósse stato ‘o risultato finale. ‘Mmece nun ghiette accussí. ‘E fullé durano nuvanta minute e a ll’arrancua (nella ripresa) ‘o Napule se ne scennette ‘e pressione, ‘o Catania ce dètte sotto riuscenno a ricuperà ddoje rredde e levannoce ‘o sfizzio ‘e fà ‘e valle ‘ncopp’â mmunnezza vincenno largo e mantenenno ‘a porta salva… Pacienza. Cuntentammoce d’avé purtato â casa tre ppunte ‘mpurtante e ppassammo ê ppaggelle:
REINA 6 Forze êsse pututo fà quaccosa ‘e cchiú ‘ncopp’ô tiro ‘e Plasíllo ca ce custaje ‘a rredda ‘e Monzònno, ma nun tenette nisciuna sfarma ‘ncopp’â siconna rredda.Se scurciaje ‘e mmaneche quanno ‘e cumpagne se ne scennetteno ‘e pressione sbruglianno ddoje o tre situazzione perculose ô finale. Nun ce scurdammo po ca fove suĵo ‘nu lanzo ‘e cinquanta metre cu ‘nu pallone ca atterraje ‘ncamma (in zona)’e Zapata, lanzo ca ce fruttaje ‘a quarta rredda.
HENRIQUE 7 Cratisto (ottimo) ‘o primmo ajone d’’o bbrasiliano ca fove sempe priciso dint’ê chiusure e ddètte qualità ‘nfase ‘e plantamiento (impostazione). Fove iuperocia (fantastica) ‘a rredda d’’o tre a zzero! (dô 60° ALBIOL 5,5 C’êsse avut’’a mettere cchiú ccazzía (cattiveria)e mmece se perdette a gGyombèrro ‘nnaccasione d’ ‘o quatto a ddoje.)
FERNANDEZ 6,5 – Se cunfermaje ‘o cchiú ‘nforma d’’a tràsera (difesa); priciso e puntuale ‘int’ a ttutte ‘e cchiusure, nun tenette niscuna sfarma (colpa) p’’e rredde ‘ncassate.
BRITOS 6 S’’a cavaje senza tanti prubbleme sia comme siconno centrale ca comme terzino a mmancina, ma facette troppi prane (errori) ‘nfase ‘e bbassurero (suggerimento).
REVEILLERE 6- ‘E cchiú nun se po’ pretennere dô francese ca spustato ‘ncopp’â dritta a ll’arrancua sufferette cchiú d’’o pprevisto, ma s’à dda capí ca nun è de primmo pilo e steva stanco pe dduje fullé uno appriesso a n’ato. ‘E bbuono ll’avé strignuto a ccentro e salvato ‘o Napule dô pussibbile ddoje a uno.
JORGINHO 6 ‘E ccose meglio ‘e ffacette vedé ’nfase prupusitiva; resistente e ‘nsaluta se facette sèntere e vvedé pe ttutto ‘o fullé, nsi’ ô prazzo (fino alla fine) dànno ‘na risposta a cchi se penzava ca nun ce ll’êsse fatta tre gghiuorne doppo ll’intero fullé jucato cu ‘a Fiorentina. DZEMAILI 6 Lle mancajeno riga, cumpasso e e ttiralinie ‘e gGiorgigno, ma garantette ‘o fammacone (il filtro) â tràsera quanno ‘o Catania appressuraje (spinse) p’’e vvie centrale e accumpagnaje cu prusíatezza (generosità) ll’azziona nsi’ ô prazzo (fino alla fine).
INSIGNE 6 Ce pruvaje cchiú ‘e ‘na vota, ma ‘a bbona sciorta nun ll’assistette cunfermanno ca p’’o guaglione nun è ‘nu mumento prupizzio e pperò priparaje ‘a rredda ‘e Caglièconno cu n’ajuda (assist) tipo Pipita a fFirenze. P’’o riesto ‘e troppe fullé cunzecutive e uno appriesso a n’ato se facetteno sèntere e ‘o guaglione ‘nfase difenziva nun fove sempe lucente (brillante).
HAMSIK 6,5 Dimustraje ‘e starese ripiglianno; da ‘na crusta (percussione) soja ‘nzistita nascette ‘a primma rredda ‘e Zapata.Jucanno ‘nfra ê llinie mannaje dint’ê cchiavette ‘o Catania; se sparagnaje ‘o finale ‘nvista d’’o fullé cu ‘a juve. (dô 65° RADOSEVIC 6 ‘O vvuleva fà e trasette ‘ncampo cignuso (grintoso) luttanno ‘ncopp’ a ògne ppallone).
CALLEJÒN 7 Overo ca, quanno signaje, ‘a bbona sciorta lle dette ‘na mana doppo ‘e ll’amàrtema (erroraccio) d’Anducàrro,ma ‘o spagnuolo faticaje d’ uncinetto servenno ‘e duje ajuda pe zZapata e ppe ttutto ‘o fullé currette comme a ‘nu lucco (forsennato) pe ddà isurrupío (equilibrio) â scuatra.
ZAPATA 7 – Don Rafele lle dette ‘na pussibbilità ‘mpurtante e isso rispunnette pusitivamente cu ddoje rredde e cu n’atalossa (prestazione) cunvincente;nun sempe riuscette a cupulià (dialogare) cu ‘e cumpagne dint’ô stritto ma facette pesà ‘o pisemo d’’o fisico suĵo, custruenno quacche azziona ‘nteressante.(dô 79° HIGUAIN sv)
Benitez 6,5 Avette n’ata vota raggione isso! ‘O Napule turnaje a vvencere e a convincere pure si tanti ghiucature stanno a ccurto ‘e sciato e ppure avenno ‘a fà a mmeno ‘e tanti ati fremme pe quacche accidente (infortunio). gGestuniaje (Gestí) a mmestiere ‘e fforze cagnanno Henrique e ppo Marekiaro ‘nvista d’’o fullé cu ‘a juve. Peccato pe cchelli ddoje rredde cuncesse ô Catania a ll’arrancua! Don Rafele à dda fà ripassà â trasera ‘e muvimente adatte ‘ncopp’ê ppalle fremme…
ll’arbitro MASSA 6 ‘Stu bancario di Imperia ca arbitraje ajeressera p’ ‘a primma vota ‘nu fullé d’ ‘o Napule luntano dô san Paolo e ca n’atu paro ‘e vote ‘ncasa nosta nun m’era piaciuto, ajeressera nun me spiacette, pecché nun levaje nè mmettette e cchesto ggià è assaje pe n’arbitro tagliano!
E cu chesto ve saluto e si dDi’ vo’ ce sentimmo llunnerí ca vène doppo d’’a mamma ‘e tutte ‘e fullé: ‘o scontro cu ‘a juve ô san Paolo addó sperammo ‘e levarce ‘a faccia ‘e pacchere ‘e ll’annata, sempe ca ‘o palazzo nun manna n’arbitro ca sta ‘ncopp’ô stato paca d’Agnelli, comme succedette a tTorino quanno Rocchi ce ajutaje p’’a scesa, dànno ‘na bbona mana â juve. Sperammo ca nun succede n’ata vota! Staveti be’
R.Bracale Brak