Le pagelle in lingua di Bracale. Pennellata d’artista di Callejon, elogi agli attaccanti del secondo tempo
CARPI – NAPOLI 1 -4
Bbona jurnata a ttutte quante; eccuce cca a pparlà d’’a terza ammestosa (amichevole) d’’o Napule ca ajeressera a tTrento s’’a vedette contr’ô Carpi, ‘na scuatra certamente cchiú ttosta d’’e ddoje ‘ncuntrate ‘mpricidenza, però ‘o (risultato) fove ‘o stesso: se vincette e ppure largo, ma senza sbrasà pe diciassette a zzero [Bassa Anaunia] e ppe ssette a zzero [Trento]; se vincette sulo pe cquatto a uno i ‘o bbrutto fove proprio chillu primmu stuco (gol) pigliato. Peccato e ppacienza!
Tutto summato fove ‘mpurtante riuscí a vvencere,largo!,’nu sibbacco (match) tuosto e ssenza tirà ‘a coscia arreto, addirittura jucato dô Carpi cu ‘o sanco a ll’uocchie manco stesse jucanno’o dinto e ffora (play-off) p’’a serie A. Pe pparta nosta pure nuje jucajemo cu ccegna (grinta) e ll’artavullo (agonismo) nicessarie, allimeno p’’o primmo ajone (tempo) e ddico chesto pecché a ll’arrancua (nella ripresa) ‘a scuatra me parette poco curaggiosa e sse permettette quacche grossa muracabba (distrazione) comme a cchella ‘e Tonelli ca ô 52’ cunzentette a Malcore ‘e pariggià ll’addaffa (rete) ‘e Peppe ‘a ‘nguenta ca ô 7’ ce aveva purtato ‘nvantaggio.
Menu male ca po primma a ll’ 81′[cu ‘na bbotta secca e ‘mpruvvisa, quase ‘a fermo,dô lemmeto] e ppo a ll’ 86′[‘sta vota a pporta aperta] sant’Arcadio mettette ‘e ccose a pposto, mentre nce penzaje po a ll’ 89′ Ounàsso a ccumpletà ‘a recoveta, cunzentennoce ‘e chiudere ‘a mubbara (partita)comme era justo ca se chiudesse a mmeno ‘e ‘nu mese dô previo (preliminare) ‘e Ciampionsa.
Passammo ê ppaggelle
REINA 6 Finalmente avette ‘o piacere ‘e vederlo ‘nfra ê pale, signo ca nun sulo nun tene ‘mpicce ‘e saluta[comme diceva cocche cestariello] , ma vo’ restà ancòra cu nnuje! Nun tenette quase che ffà, ma rummanette sempe cuncentrato i â primma palla ca tuccaje se chiammaje ll’applavuso d’’e tifuse cu ‘nu ricato (dribbling) alicante assaje ‘ncuoll’a Mabkogu doppo n’azzardato pasiglio a gghí arreto (retropassaggio) ‘e Maggio. Cchiú ttarde se facette truvà pronto ‘ncopp’a ‘nu tiro d’’o stessoMbakogu.
[Dô 46’SEPE 5 Nun se mmereta ‘e cchiú; forz’è sfurtunato, ma cert’è ca ‘ncopp’a ll’unicu tiro arrivato dê pparte soje, se facette fottere ‘ncopp’ô palo luntano.Parlammoce chiaro: nun po’ essere isso ‘a riserva ‘e Reina, pecché ‘nu purtiere nun po’ permetterse ‘o lusso d’essere sfurtunato!]
DIFESA
MAGGIO 6 ‘A solita zaccà (generosità) ‘ncopp’â curzia ‘e dritta, addó appressuraje spisso garantenno però pure ‘a cupertura nicessaria.
[Dô 46’ HYSAJ[Meza cucchiara] 6+ Cchiú ‘e ‘na vota se facette vedé annante a ddà ‘na mana a Ounàsso e sfresaje (sfiorò) pure ‘o stuco (gol) cu ‘nu diacunale forte.]
MAKSIMOVIC 6– Finalmente ‘o vedettemo ‘ncampo, ma nun dimustraje ancòra ‘e valé tutte ‘e sorde spise p’averlo; ô 19′ facette ‘na fessarie grossa,ca puteva custà cara, ma ‘o cumpagno ‘e sezziona ce mettette ‘na pezza. Meglio cu ‘o juoco auto.Albiollo è n’ata cosa! [Dô 46’ CHIRICHES 6,5 Nun sbagliaje niente dànno sicurtà (sicurezza) a ttutt’’a sezziona (reparto) Fove sempe isso a ffà partí ll’azziona dâ trasera (retroguardia) i ‘o ffacette cu cqualità.]
KOULIBALY[‘O gialante] 6,5 Tene ‘a saluta e sse vedette: se magnaje addirittura ll’avverzarie, pure dduje â vota, nun cuncedenno niente a nnisciuno! [Dô 46’ TONELLI 5 ‘A nota stunata; ciuccio e prosuntuoso, ô 52’ arresecaje ‘nu ricato (dribbling) inutile, perdette palla e ffacette ‘a frittata facenno partí ll’azziona ca se cunchiudette cu ‘o stuco (gol) d’’o Carpi, ll’unicu pigliato dô Napule ‘int’a ttre mubbare (partite)! P’’o riesto jette ‘int’ê chiavette troppo spisso: bucciato!]
GHOULAM 6 Ce mettette cegna (grinta) e ccorza facennose apprezzà soprattutto quanno appressuraje (spinse). [Dô 46’ STRINIC 6 – Garantette ‘a presenza ‘int’ê ddaje epate (fasi).Lle pozzo perdunà ‘nu paro ‘e sfregazze (sbavature) senza cunsequenzie.]
CENTROCAMPO
ALLAN 6 Accumminciaje ll’azziona ‘e ll’addaffa (rete) ‘e Peppe ‘a ‘nguenta cu ‘nu scicco bbassurero (suggerimento) pe cCiruzzo ca, a uocchie nchiuse mettette palla addó sapeva ch’êsse truvato ‘o spagnuolo.Doppo pochi minute ‘o nummero cinche nuosto sfresaje (sfiorò) ‘o stuco (gol) cu ‘nu tiro ‘a fora; p’’o riesto se dètte da fà ‘nzertandose centralmente pe ccupulià (dialogare) ‘int’ô stritto cu ‘e nassie (attaccanti). [Dô 46’ ROG [‘a bbelva] 6,5 – ‘Na mubbara (partita) ‘e forza, cegna (grinta) e artavullo (agonismo) cumbattenno cu ttutte e vincenno quase tutte ‘e cuntraste.]
JORGINHO 6 Affaticato, ma ricuperaje e nnaviaje (smistò) cchiú ‘e ‘nu pallone mettenno ordine e gghiucanno ‘e primma.[Dô 46’ DIAWARA 6,5 A ll’arrancua (nella ripresa) ‘a scuatra s’allungaje e ‘o guaglione avette che ffà nun sulo custruenno ‘o juoco ma pure facenno trancatura(interdizione). Però nun se tiraje maje arreto!]
ZIELINSKI 6 Cu ttutto ca nun sta ancòra ô ciento pe cciento, ‘o guaglione riuscette a nnun sfigurà ‘nzertannose a ssustegno ‘e ll’azziona.[Dô 46’ HAMSIK 6 Atalossa nascitta (prova energica) d’’o capitano ca però à dda ancàra trasí ‘nforma; cumminfatte faticaje a ttrasí ‘int’ô juoco e nnun fove priciso cu ‘o tiro, ma se dimustraje sempe nicessario quanno ‘a scuatra s’allungaje.]
ATTACCO
CALLEJÓN[Peppe ‘a ‘nguenta] 7 ‘O stuco (gol) signato fove ‘na vera pennellata d’artista; p’’o riesto nun sbagliaje niente facennose truvà sempe ô posto justo e ssempe pronto ‘mpressiona (pressing) auta.
[Dô 46’ OUNAS 7,5 Pure ajere dimustraje d’essere ‘nu bbellu jucaturiello; nun sulo signaje, ma furnette ll’jusaida (assist) p’’o terzo stuco (gol); p’’o riesto tanti gghiucate pure difficile e bbassurere (suggerimenti) mo pe cchisto, mo pe cchillo a uocchie nchiuse.]
MERTENS 6,5 Nun signaje,ma se cunfermaje a bbuoni mistaue (livelli) crianno tanto, tenenno ‘ntribbule e ‘ntempesta ‘a trasera janca e ffurnenno ll’jusaida (assist) p’’o stuco (gol) ‘e Peppe ‘a ‘nguenta. [Dô 46’ MILIK 7,5 –Ancòra ‘na sustanziosa atalossa (prova) da jucatore cu ll’uosemo ‘e ll’addaffa (rete). Apprimma ‘a sfresaje (sfiorò) ‘nu paro ‘e vote e ppo ‘a truvaje, comme v’aggio anticipato cu ‘na mancina bbotta secca e ‘mpruvvisa, quase ‘a fermo, dô lemmeto e ddoppo mettenno dinto ll’jusaida (assist) ‘e Ounàsso.]
INSIGNE 6 Nun fove ‘o Lorenzigno ca sapimmo, ma riuscette a ddà quacche preoccupazziona â trasera (difesa) d’’e janche tuccanno palla ‘e primma; peccato ca nun truvaje ‘a porta, ma paricchie azzione noste passajeno p’’e piede suoje. [Dô 46’ GIACCHERINI 6 – Atalossa (prestazione) vulenterosa d’’o guaglione ca se dette da fà soprattutto quanno ‘o Carpi se nchiudette a rriccio.]
SARRI 6.5: Quanno se vence vence pure ‘o mutarribbo (allenatore); ajere ‘o Napule ‘e ll’arrancua (ripresa) nun fove spettaculare comm’ô ssolito, ma tutto summato ne venette fora ‘na bbona atalossa (prova) cu ‘nu risultato justo e dde sustanza contro a ‘na scuatra ‘e mistaua (livello).
E ccu cchesto ve saluto e rringrazzio dànnove appuntamento, si dDi’ vo’, a ddummeneca ca vene doppo ll’ ammestosa (amichevole) ‘e sapato a ssera contr’ô Chievo, speranno ‘e putereve cuntà bbelli ccose. Ciuccio fa’ tu! Staveti bbe’.