Torino-Napoli 1-3, le pagelle in lingua di Bracale. Soltanto Reina al di sotto della sufficienza
A ll’ora d’’e ppastarelle e d’’a vermutta
Canta Napule guagliú, n’ata vota Napule primma ‘ncrassifica ca ajere, a ll’ora d’’e ppastarelle e d’’a vermutta, jette a Tturino contr’â scuatra d’’o zincaro e, facenno ‘o Napule, ‘ncapo ‘e ‘na mez’ora risulvette ‘a pratteca cunzignanno ê turiniste tre bbabbà zucuse ca ce permettetteno ‘e turnà ‘ncimma â crassifica ô ssicuro ‘e surprese datose ca a ll’ora d’’a tiella, pe pparta soja, ll’Udinese, prufittanno ca p’’a primma vota ‘o prozo sfunnato ‘e Spalletti nun funziunava, ce aveva fatto ‘o favore ‘e vattere ‘o piscione milaniso! Accussí me piace, sí, accussí voglio vedé ‘o Ciuccio a mmaggio: lla ‘ncimma; peccato sulo ca ajere Reina nun riuscette a mantené ‘a porta acrata (inviolata) cuncedenno ô vallo ‘o stuco (gol) d’’o tre a uno! Peccato, ma pacienza: nun se po’ avé tutto dâ vita.
Passammo ê ppaggelle
REINA 5,5 Me dispiace ma ll’aggi’’a mettere miezu zifo (voto) mancante pe bbia ca ajere nun riuscette a mmantené ‘a porta acrata (inviolata) pecché nun fove esattamente isso; ‘o Turino non tiraje praticamente maje e cchelli ddoje vote ca ‘o ffacette Pepe nun me picette; êsse avut’’a fà coccosa ‘e cchiú ‘ncopp’ a ll’addaffa (rete) ‘e Belotti, menannose primma pe rrispingere ‘a palla, ‘mmece ‘e sfresalla (sfiorarla) sulamente senza fermarla e ppo avesse avuto parà súbbeto, ‘mmece ‘e menarse ddoje vote,pe ffermà ‘nu tiro fesso ‘e Iago Falque e nnun ‘o ffacette. Peccato!
Difesa
HYSAJ[Meza Cucchiara] 6,5 Bbona atalossa (prestazione) d’’o ggiuvinotto ca difennenno se facette rispettà paricchio e nun se passaje!
KOULIBALY[‘O Gialante] 7 Signaje súbbeto ô 4’ sbluccanno ‘o sibbacco (match) e ppo p’’o riesto nun sbagliaje niente ancercanno (anticipando) cuntinuamente ‘e capa a bBelotti.
ALBIOL 6 [‘O Masto] Pulito, alicante e ssicuro durante ô primmo ajone (nel primo tempo)cummannaje a mmestiere ‘a trasera (difesa) dànno pure ‘na mana a mmettere ‘a musarola a bBelotti; però a ll’arrancua (nella ripresa) s’’o perdette ddoje vote: ‘na vota quanno, ‘int’ô bburdello d’’a muntaca, ‘o vallo apprufittaje ‘e ‘nu tozza-tozza (rimpallo) d’’a palla e ssignaje e n’ata vota quanno pe ffermarlo êtte passà ê ttriste e ll’arbitro, ca chell’aspettava, ‘o nutizziaje (ammoní). Pacienza!
MARIO RUI 6 Calaje sulmente ô niajo (finale)pecché p’’o riesto me parette ca stesse ‘ncriscenza e ffacesse ‘o ssuĵo.
Centrocampo
ALLAN 6,5 Miezu zifo (voto) mancante pecché si è overo ca foveno suĵe ‘a sponna pe cKalidú ca signaje, tanti bbelli ‘nzertamiente (inserimenti),tanti bbelli accasione pe mMarekiaro, Peppe ‘a ‘nguenta e cCiruzzo, succedette ca trasuto ‘int’â muntaca (area di rigore)turinista, ‘mmece ‘e signà se facette fottere ‘a palla, accussí cumm’i’ me fotto miezu zifo (voto) d’’o suĵo.
JORGINHO 7 Atalossa umazza ( prova ottima) d’’o centrale ‘e ll’armidanno (centrocampo) cuano (azzurro) ca gestiunaje a mmestiere tanti pallune, jenno a cciammiello pure cu ‘a trancatura (interdizione); ‘a perna soja fove quanno ô 25’ urtizzaje (verticalizzò) cu ssette parme pe zZielinski ca mettette a ffrutto.[Dô 76’ DIAWARA 6 Muimma aluaffata (missione compiuta) p’’o guaglione, ca trasuto ô niajo(finale)tenette palla cummiglianno lla ‘mmiezo.]
HAMSIK[Marekiaro] 7,5 Alleluja, alleluja, alleluja, finalmente ‘o capitano nuosto! Finalmente ‘o Marekiaro ca vulimmo sempe vedé:se sbluccaje ô 30’ recuglienno centralmente ‘na palla taminna (preziosa) ‘eCiruzzo e mmettennola ‘mporta sott’ô sette ‘e mancina e sSirigu putette sulo levarese ‘o cappiello; affibbiaje (agganciò) finalmente a dDiego Armando Maradona levannose ‘a cuollo ‘na jastemma ca teneva i ‘o frenava e ttruvaje pure paricchi gghiucate d’’e ssoje.Peccato ca pe ppochi centimetre sbagliaje p’ati ttre vvote ‘a palla d’’a pareglia. Se ne parla n’ata vota… [Da ll’83’ ROG sv Troppo pocu tiempo pe ffà coccosa e gghiudicarelo.]
Attacco
CALLEJON [Peppe ‘a ‘nguenta] 6 ‘e stima pecché ‘ncampo me parette poco cuncreto e soprattutto ‘o vedette stunato; êsse avuto stà cchiú attiento a cchello ca steva facenno Lorenzigno e llevarese ‘a vicino ô palo accussí chella mmunnezza ‘e Mazzoleni êsse avuto ‘nvetarese ata scusa pe nun cuncedere ‘o stuco (gol).
MERTENS [Ciruzzo] 6 Pure ajere nun signaje, ma facette signà quanno mettette ‘ncudizziona a mMarekiaro ‘e turnà a ccentrà ‘a porta; p’’o riesto quacche granna penzata ‘e granne jucatore ca però s’ammerata miezu zifo (voto) mancante pecché nun lle perdono ca a ll’arrancua (nel secondo tempo) se magnaje n’addaffa retissante (rete clamorosa) a ‘nu passo dâ porta vacante
ZIELINSKI 7 Bbona atalossa (buona prova) d’’o guaglione ca jucaje carigginno (esterno) auto ‘mpressiunanno pecché fove pusitivo ‘int’ê ddoje epate (fasi) e sotto porta; ‘nzomma ‘na mubbara(partita) ‘e sustanza cunnita ô 25’ cu ‘nu bbellu stuco, chillo d’’o doje a zzero; ascette stracquato pe ffà posto a lLorenzigno. [Dô 70’ INSIGNE[Lorenzigno] 6 Justo ‘na ventina ‘e minute tanto pe repiglià cunfianza (confidenza), ma avette ll’aggio ‘e farese vedé tiranno o jabbranno (crossando) periculosamente.]
All. SARRI 7 Durante ô primmo ajone (nel primo tempo) vedettemo ‘o Napule ca ce piace e ddà suddisfazzione facennose apprezzà pure pe ccomme ‘e jucature gestiunajeno (gestirono) palla doppo d’ ‘o tre a uno; peccato ca po a ll’arancua (nella ripresa), pure crijanno tanti accasione, ‘e sciupajeno tutte una arreto a n’ata. Mo però s’à dda fà capace ca Peppe ‘a ‘nguenta s’à dd’ arrepusà, servonnose o d’ Ounasse o d’’a bBelva o ‘e Zielinski ca jucanno carigginno (esterno) auto ce piace.
Arb. MAZZOLENI 4 E ll’aggiu trattato a ‘sta vecchia carta cunusciusta, ‘sta mmunnezza bergamasca ca ce nn’à sempe fatto sempe ‘nu tummulo e ‘na sporta e ajere aumentaje ‘a ddosa nun cunvalidannoce ‘a quarta addaffa (rete) ca ce fósse attuccata visto ca se trattaje ‘e ’na daffimarma (autorete) ‘e capa fatta da ‘nu turinisto ‘ncopp’a ‘na mmenziona ‘e Lorenzigno, ‘mmece isso dicette ca ‘a palla era trasuta ‘mporta pe bbia ca Peppe ‘a ‘nguenta appustiato vicino ô palo ‘e mancina e ppirciò ‘nnattasallulo (in fuori gioco) êva sciusciato ‘ncuoll’â palla e ll’êva menata dinto! Però cchiú ‘e tanto nun ce putete fà i ‘o Napule vincette ô stesso e bbuono, â faccia soja e de chi chi ce vo’ male. Uh ca ll’accirere, senza pavarlo!
E ccu cchesto ve saluto dannove appuntamento si dDi’ vo’ a miercurí ca vene doppo d’’a nutturna d’’o turno ‘e copp’ itaglia ‘e contr’â Sampedoria speranno ‘e putereve cuntà ancòra bbelli ccose.
Staveti bbe’!