Fabian è già Anema Longa, Diawara ‘a cummannaje isso

Napoli-Gozzano 4-0, 7/7/2018 – ‘A vedette accussì

Eccuce cca guagliú. A nnomme ‘e dDio ce stammo sentenno n’ata vota e vve dico tutto a pposto:bbona ‘a primma p’’o Napule targato ‘o Jancone; ajere fenette quatto a zzero contro ô Gozzano, ‘na fumazzione ‘e sissela (Serie) C.ca s’è ppigliata quatto purpette una peduno ‘e ll’Anema longa, Verdi, Grassi e Ounas(se). ‘Nzomma simmo partute cu ‘o pere justo.

Cu ‘e rezine sempe aute assaje a ddà ‘na mana â manovra uffenziva, cu ‘e dachilinne (interni) d’ armidanno (centrocampo)mise ‘ncampo a ppiere a icchese (invertiti) e ccu ‘e carilinne (esterni) uffenzive pronte a cunvergere sempe cchiú ddint’ô campo; chesto è cchello ca vo’ ‘O Jancone i ‘a primma ll’à dato raggione, pure pecché tutt’’e jucature ànnu fatto ‘o duvere lloro e ll’avverzario era chello ca era….

E sinamparco putimmo dicere ca piacette cumme ‘a scuatra pressaje bbuono ‘nnante, cosa ca ggià sapeva ggià fà e nunn’ è stata ‘na nuvità; piacette assaje ‘o capitano ‘int’â pusizziona nova ô posto ‘e gGiorgigno e sperammo ca cuntinuanno a ffaticà se migliora quacche cusarella cca e lla e cquacche gghiucatore, mo ve dico, nun sturzella ‘o musso! E cchiú nun ve saccio dicere e ppassammo ê ppaggelle:

Karnezis 6 – ‘E stima Maje seriamente ‘mpignato,’a fora ‘e quacche ppallone da ggestiunà (gestire) cu ‘e piere ô lemmeto d’’a muntaca (area di rigore).

[dô 46 Contini 7 – Scanzaje ll’uno e uno ,’ncopp’a ll’unico tiro periculuso d’’o Gozzano, cu ‘nu miraculo, mettemmoce ‘e mmane ‘ncopp’ô tiro da pochi passe a bbòtta sicura! Penzo ca ‘o guaglione d’’o ’96, doppo ‘na tempurata (stagione) mumazza(ottima) ‘nsissela( in serie) C è ppronto p’’o zumpo ‘mpriestito ‘nsissela (in serie) B.]

Hysaj [Meza Cucchiara] 6 – Me piacette ‘o ggenio ca teneette ‘e jucà pe mmiglirà ‘a cundizzione, cumminfatte rummanette ‘ncampo pure a ll’arrancua (nella ripresa).Fove prutacunista ‘e ‘nu bbellu càtaro (diagonale) difenziva ‘ncopp’a ‘nu tentativo d’’o Gozzano; sempe bbuono pusizziunato s’’a ‘ntennette a mmestiere cu pPeppe ‘a ‘nguenta ca jucaje cchiú accentrato ‘e quanno ce steva Sarri.

[dô 60’ Mezzoni sv]

Albiol [‘O Masto] 6 – ‘Nu paro ‘e pallune cumplicate pe bbia d’’e màtreche (pozzanghere) ‘int’ê primme minute, ma maje quacche azzardo (rischio) cu ‘e cumpagne ca tenetteno ‘a linia uffenziva auta. con la squadra che tiene la

[dô 46’ Tonelli 6 – Ll’unica pecca [ca lle costa ‘o meno] fove ca nun se facette truvà alliniato a mmestiere ‘ncopp’a ‘na repartita (ripartenza) e affannaje pe mmetterce ‘na pezza, pe tutta ll’arrancua però po êtte sulamente ‘mpignarse a ascí palla ô pere p’ accummincià mutamisso(solerte) ll’azziona].

Maksimovic 6 – N’ora ‘e juoco senza prubbleme; ffove prutacumista ‘e ‘na bbona nchiusura ô lemmeto d’’a muntaca (area di rigore) e spisso ascette bbuono palla ô pere; me maravigliaje ca cu ttutto ‘a stazza soja fó sse ggià ‘ncundizzione, signo ca ‘o Jancone ll’à ggià miso sott’ê ffatiche!

[dô 60’ D’Ignazio 6 – Nun avette prubbleme e ddimustraje bbona perzunalità dànnoce dinto cu ssulo mez’ora a ddispusizziona!]

Luperto 6 – Certamemte meglio cumme centrale ca laterale mancino; ‘o Jancone ‘o tenette ‘ncampo pe cchiú dde cinquanta minute tenennolo d’uocchio.

[dô 67 Senese 6 – ‘O scazzuoppolo d’’o duimila trasette dimustranno cegna (grinta) e ggenio ‘e fà senza però esaggerà.]

Rog 7 – Astirio(Tarantolato) me parette ggià ‘nforma i ‘o ddimustraje súbbeto. [dô 46’ GRASSI 6,5 Nun sulo dimustraje ‘e tené presenza facennose nutà ‘int’a ttutte ‘e ddoje ll’epate (fasi) ‘e juoco, ‘ncupertura e ‘nszertannose ‘nnante cumme ‘nnaccasione d’’o doje a zzero chiammannose ‘o jabbro (cross) d’Ounas(se).]

Hamsik [Marekiaro] 6,5 – Cuntento d’’a pusizziona nova, ‘o capitano, sventagliaje ‘ncopp’ê ddoje curzie bbuoni pallunne, ma nun mancaje ‘e fà quacche ‘nzeramiento cu ll’anema longa ca pigliava a cchillu mumento ‘o posto suojo, dimustranno ggià ‘na bbona ‘ntesa.

[dô 46 Diawara 7 – A ll’arrancua ‘a cummannaje isso duminanno ‘a sezziona;’nu poco appesantuto, ma già cu ‘e fficre (idee) chiare, ‘e forza cunquistaje ‘o ricore d’’o tre a zzero, signato ‘a Verdi. 3-0 e ppo cu ‘nu jusaida (assist) a zzuco ‘e caramella istataffaje (propiziò) ‘o quatto a zzero d’ Ounas(se)].

Fabian [Anema Longa] 7,5 – Eccezziunale! E mme ne maravigliaje!Ll’avastajeno quarantacinche minute pe ccunfermà tutt’’o bbuono ca se dice d’isse ô paese suĵo tanto ca ggià se ne parla cumme punto fremmo d’’a nova nazziunale spagnuola!Accumminciaje ggiustranno ògne azziona ‘nchietta cu ‘o capitano, pennellaje cagne ‘e juoco cu ‘o pere ‘e dritta e dde mancina e anema longa cumm’è ‘o ffacette cu zzurea (velocità); ‘a primma addaffa (rete) d’’a tempurata (stagione) è ‘a soja e ffove ‘na perna, mettenno ‘e mancino e cquase da fremmo ô pallone ‘int’ô sette. Poco mancaje ca mutaiffasse (raddoppiasse) cu ‘na muniataffa (girata)i ô lemmeto d’’a muntaca (area di rigore)fove sempe ‘nu spetrtaculo.

[dô Allan [‘o Ncrifato] 6 – Certo stanno ô pprincipio nun è ancòra isso, ma ggià se vedette ‘a cegna (grinta) soja cu quacche ricupero e ccagno ‘e zurea (ritmo) ca nun mancajeno.]

Callejon [Peppe a’ Nguenta] 6 – Certo avimm’aspettà pe tturnà a vvedé ‘e taglie suoje ‘e ‘na vota;pp’o mumento sta sturianno ‘a pusizziona nova vuluta dô Jancone ca ‘o custringe a ggiustrà assaje dint’ô stritto cu ‘nu 4-3-2-1 addó nun tene spazzio pe gghí’mprufunno e à dda jucà cu scagne assaje zeccate; nun lle mancaje ‘a qualità, ma me parette poco cuntento e ssurifatto ‘e chello ca steva facenno.

[dô 46’ Ounas 6,5 – Puntaje ll’ommo, mo cu ‘a chiena e mmo cu ‘a vacante, ma se facette apprezzà cun ‘nu granne jabbro (cross) p’’o doje a zzero e Grassi e dde cchiú cu ‘a firma sott’ô quatto a zzero 4-0 cuntrullanno ‘e dritto e ttiranno ‘e mancino

[da ll’ 80’ R.Insigne sv.]

Inglese 6 – ‘Nu paro ‘e pallune pe ddimustrà chello ca sape fà meglio:’a cabbesera (colpo di testa) e ppo tantu muvimento ‘mpressione o pe dettà ‘o pasiglio (passaggio) ê cumpagne; ‘e cchiú ‘nu tiro ‘e dritto salvato dô purtiere.

[dô 46’ Vinicius 6 – Assaje pesante e lluntano dâ cundizziona doppo poche tarribbe (allenamenti); avette pure poche pallune subbeto cuntrullate dâ trasera (dalla difesa);

[da ll’80’ Ciciretti sv]

Insigne 6 – ‘Na sola vota cercaje cu ‘o solito pallone telecumannato a pPeppe ‘a ‘nguenta ‘ncopp’ô palo luntano, ma nun ‘o truvaje visto ca ‘o spagnuiolo steva cchiú ddint’ô campo. Nun mancajeno cca e lla quacche pennellata jucanno cchiú mmiezo ‘int’ô bburdello.

[dô 46’ Verdi 6,5 – Se muvette bbuono, nuovo ‘int’a ‘na furmazziona tarribbiunna (sperimentale),turnanno e ggiustranno dint’ô stritto rientrando e giocando bene nello stretto. Da ll’ armarno (dischetto) futtette ‘o purtiere spiazzannolo p’’o tre a zzero];

[da ll’80’ Gaetano sv]

all. Ancelotti [‘O JANCONE] 6 –  ‘E stima. Bbona ‘a primma e sperammo ce porta luntano!

E ccu cchesto ve saluto e ce sentimmo si dDi’ vo’ p’’o sibbacco (match) ca vene, ca mo nun saccio quanno e addó è. Staveti bbe’. R.Bracale Brak