Napoli-Sassuolo, le pagelle in lingua: voto bassissimo per Zielinski, promossi Malcuit, Koulibaly e soprattutto Adam Ounas.
Napoli-Sassuolo 2-0, 7/10/2018 – ‘A vedette accussì
No, guagliú accussí nun va! Ajeressera ‘ntribbuna divano nun ce divertettemo pecché ‘o Napule ‘mmece ‘e farne d’’o Sassuolo [nun ce scurdammo, scuatra assineja (satellite) d’’a vecchia zoccola)!…] carne pe purpette e mmannarlo â casa cu ‘na guantiera ‘e cinche o seje sfugliatelle se cuntentaje, ‘ncapo ‘e nuvantatrè minute, ‘e cunzignarle ‘nu cartucciello cu appena ddoje soli rriccie ca foveno sí sapurite assaje, ma poche… addó ggià ô 45’ êssen’avute ‘a essere allimmeno quatto! Certo vuje me putisseve dicere: meglio ‘na nichemata pe ddoje a zzero, ca ‘nu caucio ‘int’ê rine!… Nun so’ d’accordo!
Quanno se po’ nchiudere ‘a prattica ggià primma ‘e se jí a ppiglià ‘o ttè e sse po’ ffà cu tre o quatt’addaffe (reti) a zzero s’à dda fà assulutamente nun se po’ pretennere ch’’e masciadde (spettatori) facesseno ‘o cuollo luongo aspettanno ‘e ggrazzie ‘e Cesare e ssempe cu ‘a parpitazzione ‘e core… proprio chello ca ‘mmece succedette ajeressera ca ‘o Napule doppo d’avé ggià sbluccato ‘o sibbacco (match) ô 3’ cu Ounas ca overo da granne figlio ‘e ‘ndrocchia apprufittaje ‘e ‘na granna fessaria ‘e Locatelli ca lle servette palla, doppo n’alicante cubbà (sombrero) ‘ncopp’ô centrale, ‘as fravecaje sotto a ll’afachía (traversa) senza lassà ‘o tiempo a cConsiglio ‘e capí che stesse succedenno, ce facette fà ‘o cuollo luongo nsi’ ô 72’ quanno Lorenzigno finalmente cu ‘nu capolavoro ‘e tiro a ggiro mettette ‘a palla ê spalle ‘e Consigli dint’ô sette d’’o palo luntano. Vuje capite guagliú sittantaduje minute pe ssignà ddoje addaffe (reti) a cchilli scarpare a strisce verde e nnere, ghittanno a mmare allimmeno tre granni accasione ggià durante ô primmo ajone(tempo), ddoje cu Zielinski e una cu cCiruzzo. Cose ‘e pazze! Nun se po’, nun se po’ e nnun se po’!
Pe cchello ca ‘o Napule facette e cce facette vedé nun se po’ gghí ô rescanzo (riposo) cu ssulo n’addaffa (rete) ‘e maslaia (vantaggio). Nun se po’, nun se po’ e nnun se po’! Pure pecché a ll’arrancua ( ripresa) ‘o Sassuolo turnaje ‘ncampo diciso a ffà coccosa p’adderezzà ‘a varca sfruttanno ll’arfasadde (innesti) ‘e bBerardi e dde bBourabia e cquase súbbeto avetteno ‘nu paro d’ accasione ‘e truvà ‘o russimo (pareggio), truvanno però Ospina pronto a rrepuzà (respingere) ‘e pere. Visto ‘o periculo ‘o Jancone se chiammaje ‘mpanca a Ounas e ffacette trasí Lorenzigno, ca – cumme v’aggiu ditto – doppo diece minute avuta palla da Meza Cucchiara ca s’era veppeta ‘a curzia ‘e mancina, palla ô pere,’a mette ‘mporta nchiudenno ‘a mubbara (partita) e cchiammannose ll’applavuse d’’e bbemate (spalti) e d’’a tribbuna divano. Doppo ‘e chesto nce fove sulo ‘o tiempo ‘e vedé a cchillu cesso a vviento ‘e Rogerio e ‘na granna parata d’ Ospina ca fermaje ‘nu tiro carogna ‘ bBabacar(re) mantenenno ‘a porta acrata (inviolata)!
Tutto summato ‘nzomma guagliú ‘e guagliune d’’o Jancone riuscetteno a ppriparà assaje ‘masto, ma mettetteno ‘int’â vetrina pochi sfugliatelle: ddoje, solo ddoje. Troppo poche! No, guagliú accussí nun va! Sperammo jesse meglio a Udine ‘nfra quinnece juorne!
Passammo ê ppaggelle:
Ospina [Pastacrisciuta] 7 – Ve cunfesso ca me sta surprennenno pusitivamente; me penzavo fósse scadente, ‘mmece nunn’è accussí i ‘o ddimustaje ajere quanno cu tre ttacculle (interventi) uno meglio ‘e n’ato stuppaje tre ttentative d’’o Sassuolo e mantenette ‘a porta acrata(inviolata).
Malcuit [‘O Tignuto] 6,5 – Pure ajere dimustraje ‘e saperece fà ‘int’ê ddoje epate (fasi) difennenno e attaccanno.
Albiol [‘O Masto] 6 – Facette tutto ‘o duvere suojo,senza cauffíe (incertezze).
Koulibaly [‘O Ggialante] 6,5 – Sempe puntuale e ppriciso fove ‘nu lione ‘ncampo!
Hysaj [Meza Cucchiara] 6 – Quacche pprano (errore) ô mumento ‘e diammà (appoggiare) ce fósseno pututo custà caro; pe ffurtuna nun succedette e sse facette perdunà quanno se magnaje ‘a curzia mancina e servette a lLorenzigno ‘a palla d’’o doje a zzero.
Zielinski 4,5 – Me dispiace p’’o guaglione pulacco, ma ajere mancanno ‘e bburruda (freddezza) sotto porta sprecaje ddoje grann’accasione e nnunn’ ‘o pozzo perdunà!
Rog [‘A Bbelva] 6,5 – Sibbacco (match)jucato cu ‘o sanco a ll’uocchie, azzannanno ll’arcalle (caviglie) ‘e chi capitasse. Peccato ca tène ‘na mala annummenata e ccumme guarda ‘nu poco stuorto n’avverzario o lle spia nutizzie d’’a mamma o d’’e zzie ll’arbitro ‘o nutezzeja (l’ammonisce) e lle sisca ‘na timmuría (punizione) contro, cumme succedette ajere!
Diawara 6 – Nun facette cape d’angelo, ma fove tuosto ‘o nnicessario e pprimma ca ll’arbitro ‘o nutizziasse (ammonisse) p’’a siconna vota, ‘o Jancone s’’o chiammaje ‘mpanca.
[Dô 70′ Allan [‘O ‘Ncrifato] 6,5 – Trasette e ffove ‘o solito cumbattente tuto raiva (furia), cegna (grinta) e azzaja (rabbia) nicessarie.
Verdi 6 – Atalossa (prestazione) pusitiva p’’o carigginno (esterno) lla nnante ca s’appicciaje ògne ttanto spaventanno ‘a trasera (difesa).
[Dô 69’ Callejon [Peppe ‘a ‘nguenta] 6 – Trasette pe ffà risciatà a vVerdi e ffove isso a essere cauciato da Rogerio pe ffurtuna casticato ‘a Di Bello!]
Ounas 7 – V’aggiu ggià cuntato chella perna soja ca ô 3’ ggià ce purtaje ‘ncopp’a ll’uno a zzero; p’’o riesto se dètte da fà, ma fove poco ajutato. Peccato!
[Dô 51’ Insigne [Lorenzigno] 7 – Trasette e ‘ncapo ‘e pochi minute mettette ‘a firma soja sotto a ll’addaffa (rete) ca nchiudette ‘a prattica e ffove ‘a sesta ‘ncampiunato senza cuntà chella ca ‘nCiampionsa chiejaje ‘o Liverpool(lo). Se vede ca sta ‘nforma!]
Mertens [Ciruzzo] 5,5 – Me dispiace ma ‘e cchiú nun pozzo metterle: se magnaje n’addaffa (rete) e cumplessivamente cumbinaje poco. Pe mme sant’Arcadio êsse pututo fà ‘e cchiú!
all. Ancelotti 7 – Pure ajere avette raggiona isso cunfermannose masto d’’o rutizzio (turnover)e ppure cagnanno meza scuatra se vincette, ma àdda fà capí ê suoje ca nun se ponno sciupà tant’accasione e cquanno se ne ponno fà quatto se nn’ànn’’a fà cinche, pecché ‘o pallone è ‘nu spettaculo i ‘a ggente ca pava se diverte se vede ‘e vencere largo ‘a scuatra soja!
Arb. Di Bello 4,5 – Scadente assaje, anze ‘e cchiú, scennette ‘ncampo cu ddoje felle ‘e salame azzeccate ‘ncopp’a ll’uocchie tanto pe nun vedé ‘e ccose ‘e curtellate ca tanti jucature d’’o Sassuolo [scola zecchia zoccola] faceveno contr’ê nuoste e ppe ccaputià carí(falli) sempe ‘ndanno d’’e cuane ca sulo si se canzavano d’addimannà a n’avverzario: “Cumme s’’a passa sòreta?”venevano nutizziate (ammoniti)e sse sentevano siscata ‘na timmuria (punizione) contro; se levaje ‘e felle ‘e salame sulo quanno ‘o Jancone ‘scucciato prutestaje a auta voce e ‘o ffacette justo ‘ntiempo pe vedé Rogerio, ‘atu bbellu mobbile d’’a vecchia zoccola, caucià a pPeppe ‘a ‘nguenta e ppe gghittarlo , finalmente!, fora.
E ffermammoce cca! Êssem’avut’a vencere assaje cchiú llargo, ma pacienza, cuntentammoce d’esserce mise ‘e tre ppunte ‘nsacca; mo dummeneca nun se joca e sse ne parla ‘nfra quinnece juorne quanno jammo a Udine addó penzo ca putimmo fà meglio d’’a vecchia zoccola e ssi dDi’ vo’ ve ne parlo p’’e vintuno! Staveti bbe’.