Napoli-Chievo 0-0 – ‘A vedette accussì

Che scajenza e cche nnervatura guagliú! Ajere a ll’ora d’’a tiella ô san Paolo ‘nnante a cinquantamile masciadde (spettatori)’mpurpate d’acqua ‘o Ciuccio s’’a vedette cu cchilli quatte campanare cumpaisane d’’e pariente ‘e chella zoccola ‘e Giulietta ca scennetteno ‘ncampo pe ffà ‘nu catenaccio ca manco ‘a bonanema ‘e Nereo Rocco e cce riuscetteno ‘ncapo ‘e 94 minute a ppurtarese â casa ‘o punto ca vuleveno custrignenno ‘o Ciuccio a ‘nu scartellato russimmo (pareggio) ca è pproprio acqua ca nun leva arzura e fraditanto’a vecchia zoccola piamuntesa, vattuto ‘a Spal(le), à allungato ‘o passo. Nun ce simmo guagliú, nun ce simmo: cierti sibbacche (match) s’ànn’’a vencere e nno russimà (pareggiare) e ajere, pe ccumme ‘a vech’i’, sbagliaje pure ‘o Jancone a nnun mettere ggià dô primmo minuto a mMario Rui e soprattutto a sant’Arcadio ô posto d’Ounas(se) ca pe ttutt’’o primmo ajone (tempo) aizaje porvera e nnun cunchiudette ‘nu bbenamato saciccio e ttutte quante ll’ate nun riuscetteno a mmettere penziere ô  purtiere  d’’e campanare. Coccosa ‘e cchiú se vedette a ll’arrancua (nella ripresa), ma fove  poca rrobba e nnun avastaje ‘o solito rutizzio (turn-over) ca nun servette a nniente i ‘e cinquantamila se ne jetteno â casa cu ‘o ffele ‘mmocca.

Passammo ê ppaggelle:

Karnezis [‘O Creco] 6,5 – Pe ttutt’’o primmo ajone (tempo)nunn’êtt’’a fà quase niente e ffove ‘mpignato sulamente a ll’arrancua (nella ripresa) da Obi guadagnannose  ‘a pagnotta  e scanzannoce dô periculo ‘e abbuscà.

Malcuit [‘O Tignuto] 6,5 – Fove uno ‘e chille ca se vedetteno ‘e cchiú soprattutto saglienno spisso libberannose ‘e Barba.

Albiol [‘O Masto] 6 – Pure ajere nun sbagliaje niente, pure si sott’a ll’acqua quacche vvota jette ‘int’êchiavette, ma senza cusequenzie.

Koulibaly [‘O Ggialante] 6  – Accumminciaje cu ‘na meza fessaria ca ô’ncapo ‘e mubbara (partita) nce fósse pututo custà cara e ppe ffurtuna nun succedette; Po, però turnaje a essere isso e addirittura verzo ‘o nijaio (finale), sciso ‘nnante, sfresaje (sfiorò) ‘o stuco (gol), mancannolo ‘e n’attecchia.

Hysaj [Meza Cucchiara] 5 – Me dispiace, ma nun pozzo metterle ‘e cchiú: ajere a mmancina nun riuscette a sustenere ll’azziona uffenziva , né ffacette ‘nu jabbro (cross) decente.

[Dô 74′ Mario Rui 6 – Trasuto a ll’rdemu quarto d’ora pruvaje a sfunnà e a jabbrà (crossare) ma ‘o ffacette cu ppocu zuco.]

Callejon [Peppe ‘a ‘nguenta] 5,5 – Miezu zifo (voto) mancante pecché è overo ca fove durante ô primmo ajone (tempo) periculuso ‘nu paro ‘e vote, ma po nun sfruttaje ‘o pallone bbuono pe ppurtarce ‘nvantaggio e cumplessivamente fove poco o niente pruduttivo.

Diawara 6 – Poco prutacunista, ma ‘a riggia soja fove pulita e ppricisa.[Dô 59′ ALLAN[‘O ‘Ncrifato] 5,5 Ajere manch’isso fove ‘o solito: nun ce facette vedé ‘e ffajelle (scintille), cumme ce fóssemo aspettate, e nun riuscette a ffarece zumpà dâ seggia. Peccato!]

Zielinski 6 – Bbuono ‘o primmo ajone (tempo) cu ddoje bbelli ccose e ‘nu taglio pe Llorenzigno; a ll’arrancua (nella ripresa)però se ne scennette assaje.

Ounas  4,5  – Me dispiace, ma ‘o franese ajere aizaje porvera e ffove overo  poco pruduttivo e ssulo ‘na vota riuscette a  mmette Lorenzigno ‘nnante a sSorrentino. Troppo poco!

[Dô 59′  Milik [sant’Arcadio] 5,5 – Me dispiace mettere cinche e mmiezo, ma – trasuto tarde – pure isso cunchiudette poco e nnun avette nisciuna accasione pe ffà  male ê campanare! Chi sa’ si fósse trasuto primma!]

Insigne [Lorenzigno] 5,5 – Ajere manch’isso fove ‘o solito: fermato dô muro d’’e campanare  faticaje a mmeterse ‘mmostra e sse magnaje ‘o stuco (gol) ‘e ll’uno a zzero! E cche saciccio!

Mertens [Ciruzzo] 5,5 – Cumm’ô cumpagno ‘e sezziona (reparto) pur’isso deludette e ffove bluccato ‘a Sorrentino  chelli ppochi vvote ca puitette tirà.

all. Ancelotti [‘o Jancone] 5 – Me dispiace metterle cinche, ma ‘ncasa ‘na scuatra à dda vencere, pure contro a cchille ca cumme ‘o Chievo, metteno ‘o pulmanne ‘nnant’â porta … e isso ajere nun fove crestiano ‘e ‘nventarese coccosa pe ffarce vencere e durante ô primmo ajone (tempo) sí e nno spustaje ‘e nassie (attaccante) cagnannole ‘e pusizziona. Troppo poco!

arbitro Chiffi 4 – N’atu criaturo ‘ncopp’â strata d’’o Napule. Sta addivintanno ‘na canzona; chisto d’ajere,  ‘nu ‘ngignere guaglione   se vedette  súbbeto  nun ce capeva quase niente   e de consequenzia o nun vedette o  siscaje a vienetenne e ssenza criterio caputianno ‘e carí (falli) e cchi ne facette ‘e spese  fove ‘o Napule soprattutto quanno Peppe ‘a ‘nguenta trasette ‘int’â muntaca (area di rigore) e fove stiso ‘nterra cu ‘nu sbuttulone ê spalle da Obi! Ma isso,’o guaglione cu ‘o sisco ‘mmocca, manco p’’a capa, nè sentette ‘a nicissità ‘e addimanà a chilli profuche d’’a Varra, ca pe pparta lloro, se facetteno ‘e fatte lloro e nnun ll’alluccajeno ‘int’ê recchie!

E ccu cchesto ve saluto e si dDi’ vo’ ce sentimmo ggioverí ca vene doppo ca miercurí a ssera  ‘o Napule se scontra  p’’o sibbacco (match) ‘e Ciampionsa cu ‘a Stella Rossa e ll’âmm’a fàvrognele vrognole  accussí pozzo cuntareve cose bbone. Staveti bbe’.