Napoli-Empoli 5-1, a’ vedette accussì

Canta Napule, Napule a mmitraglia guagliú! ‘Nu Napule  ca ajeressera ô san Paolo facette vrognele vrognele ‘e tuscane ‘e ll’Empoli ca â casa lloro aveveno spaventato ‘a vecchia zoccola e cca ‘mmece cca ajeressera ne piglije cinche e ô Jancone ll’avastaje’o Napule doje pe risolvere senza troppi anzíe (patemi) ‘a facenna  e smezzà ll’armafaja (distanza) dê janche e nnire, aspettanno ca ogge s’’a vedono cu ‘o Cagliari; ‘o Jancone pure ajeressera esaggeraje cu ‘o rutizzio (turnover) sparagnannose dô primmo minuto a Pastacrisciuta, ô Masto, a mMario Rui,a pPeppe ‘a ‘nguenta ô ‘Ncrifato i a mMarekiaro, ‘nzomma meza scuatra a ppietto ‘e chella ca prubbabbilmente joca marterí ca vene cu ‘o Parisangermenne e ttutto summato pure ajeressera avette raggion’isso vincenno pe ccinche a uno e ddannoce ‘a suddisfazzione ‘e vedé signa a lLorenzigno [9′], a cCiruzzo [pe ttre vvote [38′,64’ e 93’] a ssant’Arcadio [90’].

Passammo ê ppaggelle:

Karnezis [O Creco] 5,5 – Nun lle pozzo mettere ‘o seje pecché êsse avutto ‘a essere cchiú stiappo (reattivo)’ncopp’ô cataro (diagonale) ‘ncorza ‘e Caputo ca ce custaje ll’addaffa (rete) pigliata [19’]

Malcuit [O Tignuto] 5,5 – Me dispiace, ma ll’aggi’a mettere mierzi zifo (voto) mancante pecché  ajeressera ‘o guaglione pure truttanno   cumme a ‘nu stacca (puledro) ‘e sanco ‘ncopp’â curzia ‘e dritta  spisso nun truvaje ‘a ghialla  (soluzione) bbona e sciupaje malamente.

Maksimovic 6 – Cu ttutto ca scennette ‘ncampo acciaccatiello,  rispettaje ‘e ccunzegne d’’o Jancone  e nun facette fessarie  sustanziale.

Koulibaly [‘O Ggialante] 6,5 – Sciso ‘ncampo senza ‘o cumpagnone solito, fove isso ll’ardammo  (pilastro) d’’a trasera (difesa) cuana (partenopea); peccato p’’o sfregazzo (sbavatura) ‘ncopp’ô cuntrattacco   (contropiede) tuscano ca ce custaje ‘o mumentaneo doje a uno. P’’o riesto se facette apprezzà magnannose a cchi capitaje.

Hysaj [Meza Cucchiara] 6 – Arrado  (disinvolto) e stiappo  (reattivo) pure ‘ncopp’â curzia mancina  se dimustraje attiento a ll’epata difenziva  (in fase difensiva),ma  poco muttano  (propositivo) a ll’epata ‘e defatta (in fase di spinta) forze pecché da ll’auta bbanna nce fove ‘o Tignuto,ca truttaje cumme a ‘nu dannato. Forze, aspettanno a Gghoulam(me), ce putimmo cuntentà ‘e Meza Cucchiara a mmancina.

Zielinski 5,5 – Miezu zifo (voto) mancante  pecché ajeressera ‘o guaglione facette overo poco: quacche ccusarella a ccampo apierto e nnient’ato!

[Da ll’83’ Milik [Sant’Arcadio] 6,5 – Me sto’ dimannanno si è sserio mannà ‘ncampo ‘nu granne  nassia (attaccante) pe ssulo sette minute; cumminfatte sant’Arcadio appena trasette, ‘a primma palla ca avette ‘a menaje dinto, dànno ‘a risposta soja ô Jancone.]

Diawara 6  – Cu ttutto  ca  spisso se tenette luntano dô juoco, ‘a riggia soja fove urdinata e ppricisa  senza troppi zziarelle (fronzoli).

Rog 5,5 – Me dispiace ‘e nun metterle seje, ma fove, ô ssolito,  casinista e ‘mpriciso e  cce avette ‘a mettere tanta aradda (animosità) pe ss’apparà.

[Dô 63′ Allan [O ‘Ncrifato] 6,5  – Trasette e ffove súbbeto tutta n’ata musica.Ce vulette isso pe ddà ô Ciuccio ‘a zammé (scossa) nicessaria. Isso nchietta cu pPeppe ‘a ‘nguenta urchestrajeno ll’azziona d’’o tre a uno!]

Ruiz [Anema Longa] 6 – Sempe ô posto justo, sempe [o quase] ‘a cosa justa pure quanno ricamaje; se ne scennette ‘e posa a ll’arrancua (ripresa) pavanno forze ll’avé tanto jucato ‘int’a ll’urdemu mese.

[Dô 63′ Callejon [Peppe ‘a ‘nguenta] 6,5 – Appena trasuto appressuraje (spinse) a ccapa sotto; sempe pronto rispunnette: prisente! e ‘ncapo ‘e  pochi siconne sfurnaje n’jusaida(assist) cu ssette parme!]

Insigne [Lorenzigno] 7,5 – Tutto n’ata cosa doppo ‘o miezu passo fauzo cu ‘e pecurare rumanise; signaje e mmannaje ddoje vote ‘mporta a cCiruzzo. Accussí sì!

Mertens [Ciruzzo] 9  – E lle vulite mettere cchiú ppoco a ‘nu jucatore ca ajeressera  fove tafiddo (straripante) e nne facette tre cu ttre attalle (tocchi) affatate uno meglio ‘e nato angappanno, anze superanno a  cCareca ‘int’â crassifiche ‘e ll’artigliere (cannonieri) cuane ‘e sempe?

all. Ancelotti [‘O Jancone] 6 – Forze se mmeretasse pure ‘e cchiú, ma nun ne le perdono d’avé tenuto ‘mpanca a ssant’Arcadio nsi’ a ll’87’; però aggi’’a ricunoscere ca piscaje ‘e ccarte juste ô mumento justo… e nnunn’è ssulo furtuna ‘a soja!

Arb. Pairetto 5 – Enun me facite parlà, crediteme senza ca mme spieco: nun voglio fareme diebbete cu ‘a vocca!

E ffermammoce cca cuntente d’avé ffatto cu ‘e tuscane ‘na fijura assaje cchiú bbella ‘e chella d’’a vecchia zoccola ca, p’’e vvattere s’êtte fà ajutà da Calvarese e mmo tutte cu ‘a panza e ccu ‘o penziere a mmarterí a ssera quanno ô san Paolo scenneno Cavani i ‘a chenca soja e ccercammo ‘e fà meglio d’’o russimmo (pareggio) recuoverto â casa lloro!

Accussí sperammo e ssi ‘o Cielo ‘o vvo’ ve ne parlo miercurí ca vene. Staveti bbe’.