S’è ttirato n’atu capo ‘nterra

Tutto a pposto guagliú, s’è ttirato n’atu capo ‘nterra: ‘o pasiglio (passaggio) ‘ncoppa Itaglia ê quarte ajeressera ô san Paolo , mettennolo a ppitoffio a ll’emigliane d’’o Sassuolo [una d’’e ttre scuatre assineje (satelliti) d’’a vecchia zoccola], ajeressera addirittura ‘mbuttunato cu pparicchi jucature ‘e pruprietà janca e nnera. I ‘o sfizzio fove gruosso assaje dàtose ca ô ssolito ll’emigliane scennetteno a ffà ‘a mubbara (partita) d’’a vita jucanno cu ‘o sanco a ll’uocchie, trasenno, mo uno, mo n’ato  a lla disgrazziata  ‘ncopp’ê feliette d’’e cuane (azzurri) cercanno ‘e romperne quaccuno…, senza ca chillu chiachiello ‘e ll’arbitro [po ve dico…] mettesse lengua!…, ma s’êtteno ‘a fà dint’ê rrecchie pecché nun ce fermajeno,vincettemo pure si sulo pe ddoje a zzero i ô 95’ fovemo nujaute a ppassà ê quarte addó mo ce ll’âmm’’a vedé cu ‘a scuatra ‘e Gattuso. E ttutto chesto pe bbia ‘e ‘nu surteggio [overo streuzo pe nnun ddicere pilutato] ca mentre a nnuje ce à fatto scuntrà cu ‘na scuatra ‘e serie A scamosa e ccarogna a ll’ate à assignato avverzarie cchiú cceniere (morbidi), tiennere e ddellicate… ma meglio accussí. S’è ffaticato ‘e cchiú, ma ‘a suddisfazziona è cchiú ccauzante e sse futtesse chi pilutaje ‘o surteggio!

Passammo ê ppaggelle

OSPINA [Pastacrisciuta] 6,5  Nunn’êtte fà ‘e straurdinarie, però fove sempe attiento e ppriciso ‘e ppochi vvote ch’ êtte sbruglià  ‘a matassa ascenno o fermanno ‘nterra ‘nu paro ‘e tentative ‘e ll’emigliane cu dduje tacculle (interventi)fatte cu ttanto ‘na  sveldezza  ca se futtette ‘na jatta!

HYSAJ [Meza Cucchiara] 5  No, nun me piacette: sbagliaje paricchio e appressuraje (spinse) poco e nniente forze cundizziunato dê cchiacchiere ‘e mercato.

MAKSIMOVIC 5,5 Miezu zifo (voto) mancante pe bbia ca mentre spisso ancercaje (anticipò) a Bboateng(o), po lassaje troppu spazzio a cquacche avverzario ‘int’ô core d’’a trasera  (difesa). Pe ffurtuna jette ‘nu poco meglio a ll’arrancua (nella ripresa).

KOULIBALY [‘O Ggialante] 6,5  Partette a ccapa sotto, po però calaje ‘e pressione cu tre o quatte lanze fora mesura; per po turnaje a ffarese valé cu ‘na granna arrancua (ripresa).   

MARIO RUI 5,5  Miezu zifo (voto) mancante pure a isso  pe bbia ca mentre appressuraje (spinse) cu pperzunalità, arreto a ll’epata difenziva (in fase difensiva) spisso jette ‘int’ê chiavette cu cchillu strunzo a tturtaniello ‘e Berardi! Peccato!

CALLEJON [Peppe ‘a ‘nguenta] 5,5  M’ attocca ‘e mettere miezu zifo (voto) mancante pure a isso  pe bbia ca mentre accumpagnaje a mmestiere ‘a munavara (manovra) uffenziva,facennose vedé pure a ddà ‘na mana arreto, sbagliaje assaje  sotto porta senza riuscí a ppognore pure quanno nn’avette ‘accasione! E cche saciccio! [da ll’ 82′ YOUNES[‘O Mmerecato] s.v. Avette pocu tiempo pe ffarese apprezzà e ffà coccosa pe s’abbuscà ‘nu zifo (voto)].

DIAWARA 6  Tampunaje cca e lla e ffacette pure quacche bbona istiglia (verticalizzazione) dimustranno ‘e stà ‘mpalla cchiú d’ati vvote.

FABIAN RUIZ [Anema Longa] 7  Prumosso dô Jancone a ffà ‘o riggista se facette apprezzà pe ccumme sapette cuvernà ‘e tiempe ‘e juoco,pe ccomme  tenette sotto cuntrollo bbona parte d’’o campo e ppe ccumme se ‘nzerataje; ‘e cchiú se chiammaje ll’applavuse pe ccumme sfruttaje cu ssette parme ‘e saciccio ‘a palla ca sant’Arcadio ô 73’ lle mettette ‘nnant’ê piere p’’o fà signà!

OUNAS [Ll’Arillo] 6,5  ô ssolito suĵo crijaje scumpiglio ‘nfra ‘e llinie mannanno spisso ô manicomio ll’avverzarie; peccato ca sbagliaje quacche urdemu pasiglio (passaggio). (dô 71′ ALLAN[‘O ‘Ncrifato] 6  Trasuto a ‘nu mumento dellicato dètte ‘o nicessario dunamisemo (dinamismo)a ll’ armidanno (centrocampo). Corre voce ca Dela s’’o vo’ vennere, pare pe cciento meliune; si ‘o ffa ‘sta vota lle dongo ‘nu muorzo ‘ncapo ca ll’avveleno!

MILIK [Sant’Arcadio] 8  Dimustraje ‘e stà overo bbuono:signaje sbluccanno ‘a facenna ô 15’, facennose truvà 4 mumento justo, ô posto justo e cunzignaje ô 74’ ‘na palla d’oro a Anema Longa e pp’’o riesto jucaje a ttutto campo dànno ‘na mana cca e lla.Coppola ê ddenocchie! [dô 90′ GAETANO s.v.  ‘O sfizzio ‘e fà trasí ‘o guaglione d’’a  Primmavera, ca, p’’o tiempo jucato nunn’ avette manco ll’aggio ‘e guardarese attuorno].

INSIGNE 6  Ce ‘o mecco pecché da isso partetteno ‘e ddoje azzione d’’e ddoje addaffe (reti), ma nun s’’o mmeretasse;partette largo da mancina accentrantese, ma senza maje pognere o cercà ‘a porta cu ppricisione. Po’ ffà meglio!      

all. ANCELOTTI  6 Ammiscaje ‘e ccarte e avette raggiona isso uttenenno chello ca vuleva, ma êsse tirà ‘e rrecchie a cquacche ghiucatore ca nun vede cchiú ‘a porta.

arb. CHIFFI 4 N’atu criaturo ‘ncopp’â strata d’’o Napule. Sta addivintanno ‘na canzona; chisto d’ajere,  ‘nu ‘ngignere guaglione   se vedette  súbbeto  nun ce capeva quase niente   e de consequenzia o nun vedette o  siscaje a vienetenne e ssenza criterio caputianno ‘e carí (falli) e cchi ne facette ‘e spese  fove naturalmente  ‘o Napule.’Nnaccasione ‘e ll’addaffa (rete) d’’o Sassuolo,  po cassata pecché pusticcia ‘stu  guaglione cu ‘o sisco ‘mmocca, manco se n’addunaje  ca Locatelli êva fatte no unu, ma duje carí (falli) primma ‘e signà, nè sentette ‘a nicissità ‘e addimanà a chilli profuche d’’a Varra, ca però pe ffurtuna, pparta lloro, nun  se facetteno ‘e fatte lloro e ll’alluccajeno ‘int’ê recchie: “Viene a vvedé che puttanata staje facenno! E menu male ca ce jette e ccapette!

E ccu cchesto ve saluto e si dDi’ vo’ ce sentimmo llunnerí ca vene  doppo ca dummeneca  a ssera  ‘o Napule se scontra  ‘ncampiunato cu ‘a scuatra d’’o pappavallo ‘e Lotito e ll’âmm’a fà vrognele vrognole  accussí spero ca  pozzo cuntareve cose bbone. Staveti bbe’.