Senza Insigne

Finalmente guagliú Accuussí sí! Chillo visto ajere a lll’ora d’’e ppastarelle ô Tardini ‘e Parma êsse ‘a essere ‘o Napule ca vulesse vedé: ‘na scuatra artàrica (scintillante), cuncreta, taddirra(determinata), sustanziosa  i auaddeffeja ( implacabile) ca sapeva chello ca vuleva i ‘o ffacette  nichematanno (vincendo) paddirittura sbrasanno pe quatto a zzero ‘o sibbacco (match) contr’ô Parma al termine di una partita dominata dal primo all’ultimo minuto. Un Napoli scintillante, concreto,determinato, sostanzioso  ed implacabile vinse 4-0 a Parma ô tauillo (al termine) ‘e  ‘na mubbara (partita) duminata dô primmo a ll’urdemu minuto senza ca naje ‘e ducale putesseno metterla ‘ndiscussione.

Pe ffurtuna ca ‘a scuatra d’’o Jancone êtte fà a mmeno ‘e Lorenzigno estebbaddo (squalificato), i’ nun mm’êtte magnà ‘o fecato vedennolo aizà porvere [cumme spisso ll’era succieso pe ll’urdimi mubbare (partite)], mentre ‘o Ciuccio metteva ‘e ccose ‘nchiaro ggià dê primme minute sbaglianno ‘na bbona accasione ô 6’ cu Ppeppe ‘a ‘nguenta, ma jenno ‘mmeizu (in vantaggio)  cu  Zzielinski [mannato ‘mporta cu ‘na granna jucata ‘e Meza Cucchiara] ô 18’ e mutaffaje (raddoppió) cu sant’Arcadio ô 36’ ca ‘mmezziato dê cumpagne edô Jancone ce ‘o mettette a ppitoffio a Ssepe tiranno cu ccazzimma ‘na timmuria dô lemmeto cu ‘nu tiro sistimato passato sott’â trancara (barriera) d’’e ducale ca cumme a ttanti frellocche zumpajeno ‘mparanza.

I accussí ‘o primmo ajone (tempo) se nchiudette ‘ncopp’ô doje a zzero pe nnuje justo chello ca ‘ntribbuna –divano se vuleva:arrepusarse ‘mmeizu zaffío (in vantaggio netto); po quanno  turnajeno ‘ncampo ‘e nuoste cumpletajeno ll’opera sbrasanno e  nne facetteno n’ati dduje: uno ancòra cu ‘nu scatenato sant’Arcadio ô 72’ e ll’urdemu  a ll’81’ cu ll’arillo Ounas(se) trasuto da duje minute e ppronto a ffarese truvà ô posto justo pe mmetterla dinto! I ‘o Parma? Niente ‘e niente! ‘Ncrisa nera ‘e ducale se chiejajeno a llibbretta ‘a quarta uzzimma  (sconfitta) ‘e ll’rdemi cinche mubbare (partite) i ‘a scigna nera Gervigno e ccumpagne nun foveno cacchie ‘e trasí maje ‘nsibbacco (nel match) e ffoveno periculuse ‘na grama vota sulo ô 57’  quanno Bruno Alvès(ce) s’abbuscaje ‘nu ricore, súbbeto cassato dâ Varra pe ‘nu zaffíoarzabbacco carí  (netto precedente fallo) ‘e Gagliolo ‘ncuollo a Ppeppe ‘a ‘nguenta sgamettato e stiso da zaffaja (tergo): carí retissanto (fallo clamoroso) ca sulo chillu cecagnuolo ‘e Chiffi nun êva visto e si nun fósse stato p’’a Varra ca ‘o cazziaje ce avesse danniggiato.

Pe ffurtuna nun succedette e pputettemo mante ‘a porta acrata (inviolata) mettennoce ‘ncopp’ô quatto a zzero pe nnuje tre ‘mpurtanti punte dint’â sacca  raffurzanno ‘o siconno posto ‘ncrassifica e arrassannoce da ll’Inter(re) e dô riesto. Buono accussí!

Passammo ê ppaggelle

MERET[‘O Lungagnone] 6,5. Facette ‘o ‘mmitato nsi’ ô 61’ quanno finalmente facette  ‘na bbella  parata ‘mpignato da  Gervigno tanto pe ffà vedé ca ce steva pur’isso!

MALCUIT[‘O Tignuto] 7. Càtere (diagonali), tesseríe(accelerazioni),mutajaffe(raddoppi),jabbre (cross)… ma ch’ato lle se po’ ddimannà? Fermà a ccampo apierto a Ggervigno nunn’è maje semprice, ma isso ‘o ffacette; spurcaje  ll’atalossa  (prestazione) cu cchella fessaria ‘ncuollo a Bbruno Alvès(ce) ca c’êsse pututo custà ‘o ricore; pe ffurtuna ce penzaje ‘a Varra a ccassà tutto!

MAKSIMOVIC[‘O’Ntontero] 6. Tutto summato tenette bbuono ‘a pusizziona pure si lassaje troppu spazzio a Ggervigno; ‘nu ‘mpiccio all’arcalla (caviglia)’o custrignette a sse n’ascí. [Dô 46’ LUPERTO: 6 ‘O Ggialante ‘o sustenette e isso, senza tanti cumprimente penzaje a ttené? ‘a muntaca (area di rigore) pulita scupanno tutto cosa e ppacienza si ô Jancone nun lle piacette troppo i ‘o cazziaje cchiú ‘e ‘na vota!] 

KOULIBALY[‘O Ggialante] 6,5. Nun sulo mettette ‘a musarola a  Inglese, ma dette ‘na mana addó fove nicessario dimustranno forza, saluta e pruntezza pure quanno venette fora dâ muntaca (area di rigore) soja   superanno ll’avverzarie cumme a ppupazielle!

HYSAJ[Meza Cucchiara] 7 E cchi se ll’aspettava! Ll’arbanese se sta affinanno paricchio; ‘ncopp’a ‘na curzia ca nunn’è ‘a soja se ‘mmentaje ‘na granna jucata  pe Zzielinski, mannannolo ‘mporta; p’’o riesto nun sbagliaje quase niente stibbaccanno (duellando) e nichematanno (vincendo) cu cchi capitaje!

CALLEJON[Peppe ‘a ‘nguenta] 6,5 Peccato ca ô 6’nun centraje ‘a porta sfresanno sulo ‘o sette, pecché, p’’o riesto, fove tecsteccia matàlo (tatticamente perfetto) tenenno ‘ntribbule e ttempesta ‘a trasera (retroguardia) ducale. S’’a ‘ntennette bbuono cu ‘o Tignuto.

ALLAN[‘O ‘Ncrifato] 7 Atalossa (Prova) sustanziosa pe ccegna (grinta) e ccazzía (cattiveria) nicessaria cu ll’avverzarie ca nun ce putetteno; se dette da fà pure a necherrà (distribuire) joco cunzentenno a Anema Longa e saglí assaje. 

FABIAN RUIZ [Anema Longa]: 6,5 Cu ‘opallone ‘mmiezz’ê piere fove sempe priciso, ma me fósse piaciuto vederlo zzarra (velocizzare) ll’azziona e ttirà da luntano: ‘o ppo’ ffà!

ZIELINSKI: 8. Granna atalossa (prova d’’o pulacco ca  finalmente fove  ‘o jucatore ca ce aspettavemo  e ssapevemo: perzunalità,fajaja  (classe) e pprodda (freddezza).Dicette grazzie a Mmeza Cucchiara e ffuttette a Ssepe cu ‘nu tiro ‘e pricisione.

[Dô 75′ VERDI: 6,5 Se sta ripiglianno i ‘o ddimustraje trasenno súbbeto ‘nsibbacco (match) e sservenno a  Ounas(se) ‘ncopp’a ‘na guantiera ‘o pallone d’’o quatto a zzero!]

MERTENS [Ciruzzo]: 6,5 Pur’isso se sta ripiglianno; lla mancaje sulo ll’addaffa (rete), ma se vedetteno  zzaccà (generosità) e bboni auje (serpentine).Meglio ‘e niente!

MILIK[Sant’Arcadio]: 8,5. Facette tutto ‘o duvere suojo,jucanno p’’a scuatra, turnanno a ddà ‘na mana e soprattutto signanno i ‘o ffacette ddoje vote: ô 36’ i ô 71’: p’’o primmo stuco (gol) lle servette ‘na timmurria (punizione) ch’isso stesso se prucuraje e ppo, cumme v’aggiu ditto signaje cu ccazzimma e pricisione. All’arranca po sempe ‘e mancina dô lemetto ce rijalaje ‘a cagliosa d’’a siconna addaffa (rete) doppo ‘nu bbellu cuntrollo ‘e palla. [Dô 79′ OUNAS: 7 Se vedette súbbeto ca ‘o ttène i ‘o vvo’ dà; ‘O Jancone lle dette cunfianza(fiducia) e isso dimusstraje ‘e ‘mmeretarsela signanno ‘o quatto a zzero dduje minute doppo trasuto.

all.ANCELOTTI[‘O Jancone]: 6,5. Andivinaje tutto i ‘o  Napule fove quase matàlo (perfetto) arreto, ‘mmiezo e ‘nnante; isso ‘ncarraje ògne mossa i ‘e jucature lle dètteno chello ca vuleva e cce aspettavemo e ppure ‘e cchiú! 

arbitro CHIFFI  4  N’atu criaturo ‘ncopp’â strata d’’o Napule. Sta addivintanno ‘na canzona; chisto d’ajere,  ‘nu ‘ngignere guaglione   se vedette  súbbeto  nun ce capeva quase niente   e de consequenzia o nun cecaje a vvedé o  siscaje a vienetenne e ssenza criterio caputianno ‘e carí (falli) e cchi ne facette ‘e spese  fove ‘o Napule soprattutto quanno Peppe ‘a ‘nguenta ascenno da dint’â muntaca (area di rigore) e fove stiso ‘nterra da zaffaja (tergo) da Gagliolo cu ‘nu sgammetto! Ma isso,’o guaglione cu ‘o sisco ‘mmocca, manco p’’a capa,facette cuntinuà ell’azziona siscanno ‘nu ricore p’’o Parma e mmenu male ca ‘e profuche d’’a Varra,  ll’alluccajeno dint’ê rrecchie ca êva sbagliato e adderezzajeno ‘a varca.

E ccu cchesto, cuntente d’’a serata d’ajere ve saluto e si dDi’ vo’ ce sentimmo llunnerí ca vene  doppo d’’a mamma ‘e tutte ‘e mmalche(battaglie) ‘e dummeneca a ssera  quanno ‘o Napule se scontra ô san Paolo cu ‘a vecchia zoccola  e s’à dda levà ‘e pacchere da faccia d’’a scunfitta ‘e ll’ addabba (andata) facennola vrògnele vrògnole  accussí pozzo cuntareve cose bbone e bbelle. Staveti bbe’.