Un altro pareggio

E cche saciccio, guagliú! Mannaggio ô demmonio scurnacchiato, accussí nun po’ gghí! Ccca s’à dda vedé che s’à dda fà pecché allimmeno ‘ncasa s’à dda vencere e s’à dda riuscí a ssignarla allimmeno ‘na grama addaffa (rete)! Nun se po’ cuntinuà a pperdere punte russimanno (pareggiando) sibbacche (match) ca s’ànn’’a vencere! Nun putimmo jí annante accussí cumme succedette ajeressera ô san Paolo addó arrivaje chella mmorra ‘e profuche ‘e Mazzarri e rriuscette a ppurtarese â casa ‘nu punto addó, nujaute ‘ntribbuna divano ce penzavemo [doppo d’’e ttre brasciole ‘mbuttunate ca ll’êvemo servuto a tTurino] cca allimmeno ‘nu paro ‘e purpette  ce ll’êssemo date…

E ‘mmece  nun succedette niente ‘e chesto i  ‘o  Napule, ca ggià êva russimato (pareggiato) cu ‘a Fiorentina,ajessera  sbattette ‘nfacci’ô muraglione difenzivo d’’o Turino e tra fessarie sotto porta,  ‘nu  palo cuoveto ‘a Lorenzigno a ll’arrancua (nella ripresa) e quacche ttaccullo (intervento) d’’o purtiere Sirigu nun riuscette a recogliere cchiú  d’’o  terzo zzero a zzero  ‘e ll’urdeme quatto mubbare (gare).’Nnzomma ‘int’a ‘nu  san Paolo addó a stiento se cuntajeno   vintemila masciadde (spettatori)ca se magnajeno ‘o fecato vedenno ca ‘o Ciuccio ca nun fove crestiano ‘e vattere  ‘nu Turino tutt’ato ca iecaummo (irresistibile).

Pesajeno ô primmo ajone (nel primo tempo)  ll’accasione  sciupate da sant’Arcadio  e dda Lorenzigno Insigne, ‘o palo cuoveto dô capitano cu ‘o solitu tiro a ggiro d’’e suoje. All’arrancua (ripresa) piezzo e ppejo: Mazzarri raffurazje ‘a linia difenziva e ffove notte i ‘o Ciuccio nun fove cacchio manco ‘e fà ‘o cellechío a sSirigu, dimustranno ca oramaje cu ccierti scuatre  ‘e nuoste teneno ‘nu prubblema d’ajummo  (attacco) e ca ‘o Jancone à dda truvà nuove remmerie!   Cunchiusione? ‘E cuane  (azzurri) fenetteno a ttririce punte dâ vecchia zoccola e vedetteno ll’Inter(ra) turnà a mmeno sette, n’armasafeja (distanza) ca s’è assuttugliata ‘e quatto pusizzione dinto a ll’urdemi ddoje jurnate! E cche saciccio, guagliú! Mannaggio ô demmonio scurnacchiato, accussí nun po’ gghí! 

Passammo ê ppaggelle

OSPINA[Pastacrisciuta] 6 Nunn’êtte ‘a fà quase niente:‘e nassie (attaccanti) cranata nun ‘o ‘mpignajeno maje seriamente.

MALCUIT[‘O Tignuto] 7 Se facette valé assaje:tenette piede bbuone e arruvaja (visione) ‘e juoco, mettenno ‘ndifficultà ll’avverzarie scennenno ‘e carrera e cupulianno cu ‘e  cumpagne. Mumazzo (ottimo) pure arreto, cu ‘nu paro ‘e catare (diagonali) matale (perfette) levaje palle periculose dê piere d’’e cranate!

MAKSIMOVIC [‘O ‘Ntontero] 6

Tutto summato, atalossa (prova) pusitiva p’’o Serbo.Attiento e ssicuro dètte ‘na mana a mmettere ‘a musarola a Bbelotti.

KOULIBALY[‘O Ggialante] 6,5

Ô  ssolitu suojo sfurnaje n’atalossa  (prestazione)assaje pusitiva aizanno ‘nu muro ‘nnante ê nassie (attaccanti) d’’o Toro ca nun ll’arcarcajeno  (preoccuparono) cchiú ‘e tanto e isso spisso jette ‘nnante pe ccercà ‘e dà ‘na mana ê cumpagne nassie (attaccanti). più di tanto e lui si proietta in avanti per dare una soluzione in più ai suoi compagni.

HYSAJ[Meza Cucchiara] 5,5 Miezu zifo (voto) mancante pecché si nun tenette prubbleme a ddifennere, a ll’epata uffenziva (nella fase offensiva), jucanno a mmancina mustraje ‘e nun tené qualità ‘int’ê piere e nnun riesce nè a zzumpà ll’ommo, nè a mmettere ‘na palla decente ‘mmiezo.

ALLAN[‘O ‘Ncrifato] 7 Certamente ‘o meglio d’’e suoje!  Arivuejo (vitale)p’’a sistimazziona tattica d’’o Jancone difennette cumme a  n’armassarío (gladiatore)ricuperanno ‘na cifra ‘e pallunne  e attaccanno a ccapa sotto pe nnuvanta minute. Granne, ô niajo (al finale) ‘a  tachettía (copertura) ‘ncopp’a  Meite. Benturnato ‘ncrifatone nuosto ca cu Anema Longa fa ‘na cocchia ‘e mediana ‘e qualità e cquantità. Sempe ô niajo (al finale) secutaje e disarmaje a Ola Aina ca puteva càtelo (letale).

RUIZ [Anema Longa] 6 Pure si ‘o vedette ‘nu poco artabbo affaticato dimustraje ‘e tené tanta qualità ‘int’ê piere e bbona arruvaja (visione) ‘e juoco; peccato ca  ll’epata ( fase) ‘e riggia è ancòra troppo bbatiejo (lento); ce pruvaje ‘a luntano, ma pure a issi Sirigu dicette no!

[ Dô70′ VERDI 5 ‘Nu zifo (voto) mancante pecché fove poco zincatejo (incisivo) e nnun pugnette cumm’êsse avut’’a fà.]

ZIELINSKI 6 Meglio cumme centrale ca cumme cariggino (esterno); cumplessivamente facette quacche ccosa bbona e cquacche fessaria scema; accumminciaje a ccapa sotta, po se ne scennette ‘e posa   e ppassanno ‘e mnute sparette

sbaglianno pasiglie (passaggi) facile.

CALLEJON[Peppe ‘a ‘nguenta] 6 ‘O cariggino (esterno) spagnuolo appressuraje (spinse) cchiú ppoco d’’o ssolitu pe ddà ‘na mana ô Tignuto a ffermà a dduje brutt’accunte: Ola Aina e Ansaldi. Cumplessivamente cercaje d’essere ‘a colla tra ll’armidanno  (centrocampo) e ll’ ajummo (attacco).Peccato ca nun cercaje maje ‘a porta!

[Dô70′ MERTENS [Ciruzzo] 5,5 Miezu zifo (voto) mancante pecché ggiraje a vvacante senz’essere crestiano ‘e gatà (incidere) né ‘ e  truvà  chesema (varco) ‘int’ô  muro cranato.]

INSIGNE[Lorenzigno] 5 ‘Nu zifo (voto) mancante pecché fove troppo ‘mpriciso e ccerti vvote troppo cazzu-mio. Cugliette a ll’arrancua (ripresa) ‘nu palo cu ‘o solitu tiro a ggiro  e ffósse ora ca se ‘mmentasse n’atu tipo ‘e tiro!Sbagliaje assaje quanno lle capitaje ll’accasione ‘e truvarese tre contro a uno e nnun sapette truvà ‘o cumpagno ‘mpusizziona adatta pe ssignà. Oramaje nunn ne tene cchiú!

MILIK[Sant’Arcadio] 5,5 è ‘a curona d’’a capa mia, me dispiace, ma ‘sta vota ll’aggi’’a mettere miezu zifo (voto) mancante pecché chella d’ajere nun fove ‘a serata soja: fove cuntrullato spisso da Nkoulou e Mmoretti  e nnafajattaje (sprecò) tre accasione capitatele ‘int’â primma mez’ora i ‘o ffacette, partenno tarde e  arrivanno vicino â palla  senza coglierla a ‘nu passo dâ porta. Sinamparco ce pruvaje cchiú ‘e ‘na vota, ma sempe senza  cazzía (cattiveria) i ‘a  pricisione nicessarie  e ppure ‘e bbona sciorta; sparaje a vvrenna i a ll’arrancua (nella ripresa) ce se mettette pure Sirigu ca, a mmazzo,  riuscette a smanaccià ‘nu tiro d’’e suoje da diciotto metre.  Che peccato!

All. Ancelotti[‘O Jancone ] 5 Nun se vincette e ll’itimma (colpa) fove pure d’’a soja ca nun riuscette a ttruvà ‘nu remmerio lla ppe lla, cumme a cchillo ‘e cagnà  primma  quacche pedina, ammiscanno ‘e ccarte.

E ffermammoce cca. Jette cumme jette; dàmmoce n’atu pizzeco ‘ncopp’â panza e gghiammo ‘nnante.

Mo ggiovedí a ll’ora d’’e ppastarelle se torna a gghiucà p’’a cuppetta aiurupea e se fa ô san Paolo addó arriva ‘o Zzurigo.Doppo d’’e ttre purpette ca lle dettemo lla nun c’êssen’’a stà prubbleme. Accussí spero e ssi ‘o Cielo ‘o vvo’ v’’o cconto viernarí ca vène.

Staveti bbe’!