‘A vedette accussì

E i’ mo che v’aggi’’a dicere guagliú? Si so’ surisfatto ‘e ll’arnassa (vittoria) d’’o Ciuccio ajere a ll’ora e rrusolio e ppastarelle a Fferrara ‘ncasa d’’e lucale? E nno, no e nno datose ca a nnujeaute ‘ntribbuna-divano nce piacesse ca ‘o Napule arfussazze (vincesse) sempe largo e ssenza sufferí soprattutto cu ‘e ppiccerelle, e nno afferranno ll’arnassa (vittoria) p’’e capille e ppe scagno addirittura a ll’88’ e ddicenno grazzie ô purtiere nuosto ca, ‘na vota misece ‘ncopp’ô doje a uno,  difennette ll’arnassa (vittoria) cu ll’ógne e ccu ‘e diente  cu cchiú ‘e ‘nu taccullo (intervento) ‘mpurtante…

Certo ll’itimma (colpa) ‘e tutta ‘a sufferenzia nosta nun ‘a pozzo dà ô Jancone ca… pur’isso, poveru crestiano,  à dda frijere ‘o pesce cu ll’acqua e ccu ‘o llignammo ca tene chelle so’ ‘e strommole ca se ponno fà: ajere, prassempio fove custretto [nun saccio pe cqua’ mutivo ‘e saluta] a ffà a mmeno annante ‘e Lorenzigno e dde Ciruzzo e ss’êtte arrangià primma cu ‘o Mmerecato e ppo cu Vverdi e nnisciuno d’’e duje[po ve dico] s’ammeretaje ‘o seje; arreto po[forze pecché ‘o guaglione tirava cauce pe gghiucà] accuntentaje  a Lluperto [5 e ppo ve dico ] facennolo scennere ‘ncampo ô posto d’’o Masto…, ma ‘o liccese nn’à dda magnà furne ‘e pane primma ca se po’ ppermette ‘e metterse ô posto ‘e chillu mastanguanguero!

Cumminfatte a ll’83’ Luperto fove propr’issi ca  facette ‘na granna fessaria, trasenno fora tiempo ‘ncuollo a Floccari, menannolo ‘nterra  dànno accussí ll’aggio all’arbitro Abbattista [5 e ppo ve dico, ca nsi’ a cchillu mumento grossi fetenzie nun ce n’aveva fatte..] ‘e sircarce contro ‘nu ricore ca ce steva e ca Petagna mettette dinto… Quanno se dice ‘a sciorta d’’o piecuro: nascette curnuto e mmurette scannato!

‘Nzomma strignenno ‘o zuco ajere doppo ‘nu primmo ajone(tempo) senza d’essere sate capace ‘e mettere ‘mpericulo ‘a porta ‘e Viviano [‘a fora ‘e ‘na grama vota cu Ssant’Arcadio  ca avutannose ‘mpruvvisamente dint’â muntaca  [area di rigore] cunchiudette ‘mporta, ma ‘o  pallone apprimma jette a sbattere ‘nfacci’ô palo ‘e mancina e ppo, turnato ‘ncopp’ê piere d’’o marcazzo (centravanti) nuosto cafacette n’atutentativo, ma ’sta vota  fove  attiento Viviano ca abbattaje  (sventò) ll’artadidda (minaccia.)]

Da lla a gghí ‘nnante poco ato facetteno ‘e nuoste pe ttentà d’arfuzzà (vincere) cusicché ‘ntribbuna-divano ce abbiaje a ffà male ‘a panza ‘nnante ô spettaculo d’’e nuoste ca nunn’ erano cacchie ‘e risolvere ‘a facenna e mazzecanno amaro êttem’’aspettà ll’arrancua (ripresa) speranno ‘e tirà ‘o capo ‘nterra. Nun ve dico pirciò che suddisfazziona quanno ô 48’finalmente ‘o ‘Ncrifato[forze ‘mmezziato dô Jancone] se decidette a ffarese vedé cchiú annte e avuto ‘o pallone dô Mmerecato dint’â muntaca (area di rigore) lucale ‘a mettette cu ‘nu tiro a ggiro lla addó Viviano nun putette arrivà truvanno ‘o capo d’’a matassa e ppurtannoce ‘ncopp’a ll’uno a zzero; n’ata accasione p’’o   Napule arrivaje sulo ô 70’ ‘ncopp’a ‘nu tiro ‘e squina (corner) ‘e Peppe ‘a ‘nguenta ca ll’Anema longa tavvillaje (deviò) truvanno però Viviano ca spedette ‘ncopp’a ll’afachia e ssubbeto doppo facette ll’istesso ‘ncopp’a ‘nu tentativo d’’o Tignuto.

‘Nzomma perdettemo ‘o cunto d’’e tire ‘e squina cullezziunate, ma atu frutto nun ne recugliettemo e cce cadette ‘o munno ‘ncuollo quanno, cumme v’aggiu ditto,a ll’83’Luperto facette chella granna fessaria cu ‘o ricore ca Petagna mettette dinto; quanno po proprio êvemo quase perza ògne speranza, fove ‘o Cielo ca se muvette a ppietà accurdannoce d’arfuzzà e        succedette a ll’ 88′ quanno  Mario Rui, trasuto dint’â muntaca (area di rigore) d’’e lucale, dppo avé cupuliato (dialogato cu Ppppe  ‘a ‘nguenta tiraje ‘na cagliosa ‘nzuspettabbile e ffravecaje ‘a palla ‘mporta! Alleluja, Alleluja!

Ma nun fenette lla pecché ‘a scuatra ‘e casa se menaje annante cu ‘o sanco a ll’uocchie cercanno ‘o russimmo (pareggio), ma truvanno, cumme v’aggio cuntato   ‘nu granne Lungagnone ca nnun le dètte ‘sta suddisfazziona e doppo nuvatatre mminute ‘a tarra (sfida) se cunchiudette e cce mettettemo tre ppunte dint’â sacca adducennoce ‘a vocca pure pecché ‘nserata ‘a vecchia zoccola fove mazziata dâ Roma, i è ccosa    ca nce piace!

Passammo ê ppaggelle

MERET [‘O Lungagnone] 7,5  Granna atalossa (prestazione d’’o guaglione ca dimustraje ‘e saperece fà  e ssi ‘o Ciuccio se purtaje ‘e tre ppunte â casa fove annà (merito) suĵo ca a ll’arrancua facette cchiú ‘e ‘nu granne taccullon (intervento) pe ssalvà ‘a porta e ss’arrennette sulo ‘nnante ô ricore.

MALCUIT [‘o Tignuto] 6  Durante ô primmo ajone repuzaje  (spinse) poco ma po a ll’arrancua (ripresa) sfuderaje tante e ttante narre (accelerazioni)’ncopp’â ferza ‘e dritta facennose apprezzà.

KOULIBALY [‘O Ggialante ]  6,5 Orfano d’’o Masto cullezziunaje n’ata atalossa (prestazione) aillaa (superiore) cu ttacculle (interventi pulite e sistimate senza nisciuno sfregazzo (sbavatura)

LUPERTO 5 Me dispiace, ma nun pozzo metterle ‘e cchiú e nnun le perdono chella fessaria ca ce puteva custà cara, fatta a ll’83’.

 MARIO RUI 7   E ss’’o mmereta pecché spustato a ffà ‘o carigginno  (esterno) auto doppo ca Ghoulam era trasuto ô posto ‘e Zielinski,’ncapo ‘e quatto minute truvaje ll’addaffa (rete) ca ce rijalaje ll’arnassa(vittoria) E nnun’è ppoca cosa!

FABIAN RUIZ [Anema Longa] 5,5 Ll’attocca miezu zifo (voto) mancante p’’e troppe prane (errori) fatte quann’êtt’’a tajennà  (impostare).

ALLAN [‘O ‘Ncrifato] 7 ‘O Carioca s’’o mmereta pecché doppo d’avé jucato troppo arreto, a ll’arrancua (ripresa) se decidette a ffarese vedé dint’â muntaca (area di rigore) d’’e lucale e ttruvaje ‘a primma addaffa (rete) soja ‘ncampiunato cu ‘o siconno tiro fatto ‘mporta. Bravo!

ZIELINSKI 5,5  Ll’attocca pure a sso  miezu zifo (voto) mancante pe bbia ca ajere fove poco marrajo  (pimpante) e mmiso ê spalle ‘e Sant’Arcadio nun fove crestiano ‘e darele ‘na mana jucanno ‘nu sibbacco (match) senza zuco nè ccunnimma. [Da ll’84′ GHOULAM sv Trasuto troppo tarde nun tenette ‘o tiempo ‘e dà ‘na bbona mana]

MILIK [Sant’Arcadio] 5,5 Me chiagne ‘o core ma  ll’attocca miezu zifo (voto) mancante pure a isso, ma no p’itimma (colpa) soja, pecché nun tenette niasciuno ca ll’assecundaje a mmestiere e rriuscette sulo a ttruvà ddoje bbelli cunchiusione pe ffà paura a Vviviano. Troppo poco!

CALLEJON [Peppe ‘a ‘nguenta] 6  Facette ‘o ssuĵo e ffove taminno (prezioso) ‘int’ê ddoje epate (fasi).[Dô 91′ GAETANO sv  ‘na presa p’’e funnielle farelo trasí ‘mpratteca a mmubbara (partita) fenuta!]

YOUNES [‘O Mmerecato] 5,5  Miezu zifo (voto) mancante pecché ‘o terisco aizaje troppa porvere  e nne facette tutte rumanze sciniggiate e pellicule pure quanno trasuto dint’â muntaca (area di rigore) nescartaje tre o quatto senza maje cumchiurere ‘mporta e cquanno ‘o ffacette tiraje fora sciupanno malamente tutto. [Dô 65′ VERDI 5  ‘Nu  zifo sano(voto) mancante pecché piezzo e ppejo d’’o terisco nun ne ‘ncarraje meza: tre ppalle sole mettette ‘mmizo pe Ssant’Arcadio, ma ‘e mmannaje tutte ê spalle d’’o marcazzo (centravanti) senza ca ‘o pulaccone, ca nun tene ll’uocchie arreto.., ‘e putesse sfruttà. Che ddelusiona! Penzo proprio ca a ggiugno à dda fà ‘e bbalice e gghí a ffelicità a cquacche ata suggità!]

All. Ancelotti [‘O Jancone ] 6 Nce ‘o mecco pecche s’ ,arfuzzaje (vinse), ma nun s’’o mmeretasse: ll’aggiu ggià scusato p’’o llignammo ca tene i ‘e strommole ca po’ ffà,ma ll’êsse fà jucà meglio e ajere nunn’ ‘o facette!

Arb. ABBATTISTA 5  N’ata meza cazetta ‘ncopp’â stata d’’o Napule  grossi fetenzie nun ce Ne facette, ma siscaje a ccapa ‘e saciccio, nun capette che faceva e ll’êtte ‘a sap da chille d’’a Varra d’’o zio prevete ca n’addaffa (rete) d’’e lucale) nunn’era reculare!

E ccu cchesto ve saluto e si ’o Cielo ‘o vvo’ ce sentimmo llunnerí ca vene  doppo ca dummeneca diciannove , ‘nserata     ‘o Napule se scontra  ‘ncampiunato,ô san Paolo    cu ‘e jucature d’‘a scuatra ‘e chella faccia ‘e cestunia ‘e Spalletti ; pe ccerto nunn’è ccosa ‘e pochi mumente riuscí a vvatterle, ma i’  spero ca  pozzo cuntareve cose bbone. Staveti bbe’. R.Bracale Brak