Le pagelle in napoletano di Liverpool-Napoli
‘A vedette accussì
Eccuce cca guagliú, bbona jurnata a ttutte quante. Ajere ‘o Ciuccio scennette ‘ncopp’ô campo d’’e meglie d’’a Ciampionsa pe ffà ‘a primma annestosa (amchevole) seria ‘e ‘sta tempurata vedennosela cu chilli figlie ‘e coperativa ca ll’anno primma ll’avevano mazziato pe ccinche a zzero; è overo ca ajere ‘e ‘ngrese mancajeno ‘e duje o tre d’’a primma linia, ma è ppure overo ca ‘o Napule êtte fà ammeno ‘e Kalidú Kulibalý, d’Allan(e) e d’ Anema Longa e s’êtte arrangià cu ‘o ‘Ntontero ‘nchietta cu ‘o creco ‘e trinca Chitelassa, cagnanomme ‘e Manolas(se) [ca pe ffurtuna nosta nun facette passsà a nnisciuno] e ‘nzomma cumme jette e ccumme venette ‘o Ciucciio se levaje ‘e pacchere da faccia arfuzzanno ( vincendo) ‘a tarra (sfida) pe ttre a zzero accussí cumme maje nce fossemo aspettato ‘ntribbuna-divano! Ora mo v’êsse ‘a cuntà tutta ‘a mubbara (partita), ma trattannose ‘e n’ ammestosa (amchevole) e ssenza storia ne faccio a mmeno e mmecco sulo ‘e zife (voti) ca s’ammeretajeno chille ca scennetteno ‘ncampo, dicenno ‘mprimmose ca ll’arbitro i ‘a chenca soja partiggiajeno chiaramente p’’o Liverpullo senza mettersene scuorno! Lassammo stà e pparlammo d’’e nuoste:
MERET [‘O Lungagnone] 7 – Baddarra adío (pomeriggio tranquillo), allimmeno nsi’ a ppochi minute dô mustalà (fine) quanno êtte ‘a fà ‘na parata pe scanzà ‘nu pussibbile daffimarma (autogol) ‘e chella capa ‘e lignammo ‘e Meza Cucchiara. Se ripetette po cchiú ttarde ‘ncopp’a ‘nu tiro da luntano ch’isso sventaje cu ‘nu zumpo a ddritta overo bbello!
DI LORENZO 6,5 Arbadanía tuosto(Fisico roccioso)accumminciaje a mmacenà chilometre ‘ncopp’â ferza soja difennenno ‘a pusizziona e sse facette vedé nsi’ ‘ncopp’â linia ‘e funno campo. [dô 60′ HYSAJ [Meza Cucchiara] 5,5 –Ggiustraje assaje cchiú arreto d’’o cumpagno e ccumme v’aggiu ditto cu ‘na fessaria steva ‘ntussecanno ô Lungagnone ca ce mettette ‘na pezza.]
MAKSIMOVIC [‘O ‘Ntontero] 5,5 Nun s’’o mmereta ‘o seje: guaje gruosse nun ne facette ma arresecaje troppo perdenno palla quanno ascette o ‘int’ô ggiro ‘e palla.[dô 60′ LUPERTO 6 Urdinato difennette a mmestiere risultanno arfuzzatore(vincitore) ‘inte a ‘nu paro ‘e stibbacche (duelli)]
MANOLAS [Chitelassa] 6,5 Dê pparte soje nun se passaje: priciso ‘e capa i ‘e tacatammo (anticipo),capace a gghí lesto ‘ncupertura ê spalle ‘e ll’ude (terzino)[dô 45′ CHIRICHES [‘O Vampiro] 6,5 – Nun se facette ‘mpressiunà dâ pressione d’’o Liverpul(lo),mettenno fora tutt’’e cqualità soje, senza sbaglià quase niente.]
MARIO RUI 6,5 Nun ce ll’aspettavemo, ma jucaje overo bbello senza farese maje surprennere a mmancina addó riuscette sempe a ffrenà ll’avanzate d’’e lucale sustentanno pure ll’azziona d’’e suoje. [dô 45′ GHOULAM 6 Quanno ‘o Liverpul(lo) nun ‘o custrignette a rrummané vascio cercaje ‘e ‘mpurrà (spingere) allarganno ‘o cumpasso.]
CALLEJON [Peppe ‘a ‘nguenta] 7 Me facette maraviglia visto cas jucaje cumme si avesse ‘a sempe fatto ll’arvasatto (centrocampista )centrale ‘ncabbina ‘e riggia . Sempe pusizziunato a mmestiere nun se facette maje ‘nfilà, dettanno ‘e tiempe d’’a pressiona e lanzanno ‘mprufunno. È chiaro ca ‘o Jancone pote cuntà’ncopp’a isso p’’o posto d’arvasatto (centrocampista )centrale.
ZIELINSKI 6 Me dètte ‘a ‘mpressiona ch’à dda ancòra faticà pe ttruvà putenza quanno avanza palla ô pere e pperò assicuraje sinamparco bboni ntapèche (trame)’e juoco e cqualità pe scanzà ‘a pressione soprattutto ‘int’ô primmo ajone. Trasenno Gaetano è fove isso a piazzarese cchiú vvascio quase ‘nnant’â trasera (difesa).
VERDI 6 Accumminciaje bbuono zumpanno ll’ommo e ffacennose vedé ‘mmiezo; passanno ‘o tiempo se ne scennette3 ‘e posa e nnun fove cchiú isso. [dô 60′ GAETANO 6 – Si piazzaje a ffà ll’arvasatto (centrocampista), facennno turnà a Ppeppe ‘a ‘nguenta ô pizzo suĵo naturale a ddritta,mustranno bboni ghiucate’int’ô stritto.]
MERTENS [Ciruzzo] 6,5 Purtaje ‘o pisemo ‘nnante a ccentro d’’e tre arret’ ô nassaio (punta) mustranno tanta qualità u ‘nu bbellu missiddo (assist) ‘e primma pe sbluccà ‘a facenna. [dô 45′ YOUNES[‘O Mmerecato] 6,5 Se facette truvà pronto (51’) pe ssignà ‘o tre a zzero e pp’’o riesto sbluccaje quacche repartita (ripartenza) mantenennose sempe ‘int’ô vvivo d’’o juoco.]
INSIGNE [Lorenzigno] 8 E cchi se ll’aspettava? Fove ‘o meglio, ‘nu spettaculo ggià dê pprimme palle jucate quanno dimustrajer ‘e starece e vvulé fà ‘o ssuĵo; accumparette da mancina e (17’) ppiscaje ll’angulo luntano cu ‘na meza cagliosa deritta pe dderitta; po ô 28’ servette ‘na bbona palla a ssant’Arcadio ca ‘a mettette dinto ‘e putenza menannose ‘nterra p’’a cogliere; ancòra fove isso ca prupizziaje ‘o tre a zzero d’’o Mmerecato e ddette quacch’ata palla bbona però sciupata! Rummanette ‘ncampo 90 minute cu ttutto ca aveva fatto tanti ghiucate.
MILIK [Sant’Arcadio] 7 è overo ca participaje cchiú poco ô juoco ma dimustraje cchiú cunsistenza sotto porta comme ô 28’ ‘nnaccasione d’’o doje a zzero e ssulo Mignolet(te) cun ‘nu miezu miraculo lle necaje ‘a pareglio a ll’arrancua (ripresa) [dô 73′ TUTINO nun le pozzo mettere zife (voti) e mme spio pecché ‘o Jancone ‘o facette jucà ô posto ‘e sant’Arcadio
All. ANCELOTTI [‘o Jancone] 6 ‘E stima, ma nun le perdono de nunn’ apprezzà a sant’Arcadio.
E ccu cchesto ve saluto e cce sentimmo, si ‘o Cielo ‘o vvo’, nun saccio comme, nè cquanno. Staveti bbe’.