Nzomma guagliú ajeressera ‘o Napule ce piacette, ce divertette e sse pigliaje chello ca vulette: tre ppunte!
Arnassa(vittoria) [ca se chiamma panca] larga e mmeretata chella d’ajeressera d’’o Ciuccio ca sott’â lanterna scummaje ‘e sanco a cchilli quatto profuche ‘e Raniere pe ddoje a cquatto e ffoveno quatto fugliatelle chelle d’’o Napule del Napoli ca se mettette ‘e tre ppunte dint’â sacca doppo ‘nu primmo ajone (primo tempo) duminato e nchiuso ‘ncopp’ô doje a uno signanno ‘na vota [3’] cu Sant’Arcadio e ‘na vota [16’] cu ‘o Turco, memntre, pe pparta lloro ô 26’ accurtaje Mmerdarella dopppo ‘nu sciuliamazzo ‘e Mezacucchiara ca lle lassaje ll’aggio ‘e tirà forte.
A ll’arrancua (nella ripresa) po’, arrivaje ‘o russimmo (pareggio) ‘e Gabbiadini cu ‘nu ricore ca nun ce steva pe bbia ca sempe ‘o solito Mmerdarella se lassaje cadé ‘nterra sulo pecché Chitelassa ll’êva guardato stuorto. Però steva scritto ca ‘o Napule êva purtarese ‘e tre ppunte â casa e ccumminfatte a ll’83’ ‘o Napule turnaje annante cu Ddemme e ccu Cciruzzo ce mettette ‘a jonta ô 98’.’
Nzomma guagliú ajeressera ‘o Napule ce piacette, ce divertette e sse pigliaje chello ca vulette: tre ppunte!
Passammo ê ppaggelle:
MERET[‘O Lungagnone] 6 Priciso i attiento nun êtt’’a fà tanto e nnun tenette nisciuna itimma (colpa) ‘ncopp’a ll’addaffa (rete) ‘e Mmerdarella, nè ‘ncopp’ô ricore ‘e Gabbiadini, ca riuscette a ttuccà, ma no a ffermà. Peccato.
HYSAJ[Mezacucchiara] 6,5 ‘O miezu zifo (voto) mancante pe bbia ca, ô 26’ sciuliaje lassanno via libbera a Mmerdarella ca signaje, ma p’’o riesto facette ‘na bbella mubbara (partita) e ffove uno d’’e meglie tanto ca cchiú ca mezacucchiara ce parette, ‘ntribbuna-divano, ‘nu masto fenuto.
DI LORENZO 6 Custretto ancòra a ffà ‘o centrale ‘nchietta cu Chitelassa facette tutt’’o duvere suĵo facennoase vedé pure annante cumme ‘nnaccasione d’’o doje a zzero d’’o Turco favurito da ‘na jabbirata (spizzata) soja.
MANOLAS[Chitelassa] 6 Cumannaje a mmestiere ‘a trasera (difesa) senza sfregazze (sbavature)i ‘o ricore fove ‘nu rijalo fatto ê duriane da ll’ucummo (arbitro) La Penna, no ‘nu catto (errore) suĵo.
MARIO RUI 6 Bbona atalossa (prova) d’’o purtuchese ca daffaje (spinse) assaje e ss’’a vedette cu Ggabbiadini.
ELMAS[‘O Turco] 6,5 Facette vedé tanti ccose bbone miso ‘ncampo dô primmo minuto ô posto d’’o ‘Ncrifato ca nun fove dispunibbile; sfruttaje a mmestiere ‘o spazzio cuncesso dê lucale ‘mmiez’ô campo recuglienno ‘a priezza ‘e signà ‘o doje a zzero cu ‘a primma addaffa (rete) soja ‘nserie A. Sfucaje chiagnenno cumme a ‘nu criaturo.[dô 78′ POLITANO s.v.]
LOBOTKA 6,5 Granna perzunalità d’’o sluvacco ca se piazzaje ‘ncabbina ‘e riggia manuvranno ‘a palla cu pricisione e aracammo (giudizio). Se chiammaje ll’applavuse cu ttre magarie pe ppigliarse tre vvote e ppurtà ‘a palla ‘mmiezo a ttre dduriane. Gattuso s’’o chiammaje ‘mpanca doppo n’ora pe ffarele piglià sciato. [dô 61′ DEMME 7 – Nun partette titulare, ma trasuto nun sulo se pigliaje ‘mmano ‘e rrétene ‘e ll’armidanno(centrocampo), ma mettette a ll’83’ ‘a firma soja sotto ll’addaffa (rete) ‘e ll’arnassa (vittoria)cu ‘nu tiro a vvolo.Applavuse]
ZIELINSKI 6,5 Bbona atalossa (prova) p’’o pulacco; da poco s’era partute ca isso dette a Ssant’Arcadio ‘nu missiddo (assist) a zzuco ‘e caramella e ffove ll’uno a zzero pe nnuje. Calaje durante ô primmo ajone (tempo), ma po sagliette a ll’arrancua (nella ripresa)
CALLEJON[Peppe ‘a ‘nguenta] 5,5 Se vedette poco; êsse pututo e avuto fà ‘e cchiú! [dô 72′ MERTENS[Ciruzzo] 6,5 Doppo quase dduje mise turnaje ‘ncampo e ssignaje cu ggranna cazzimma.
MILIK[Sant’Arcadio] 7,5 Sape fà ‘o mestiere suĵo e sse vedette ‘ncapo ‘e tre mminute.P’’o riesto jucaje p’’a scuatra turnanno arreto pe ddifennere e ccupulià (dialogare).Nun saccio si mme spieco.
INSIGNE [Lorenzigno] 6,5 Miezu zifo (voto)mancante pecché accumminciaje a gghiucà troppo tarde, però ‘o ffacette da veru capitano e ppo a ll’83’ da ‘nu tiro suojo nascette ll’azziona d’’o tre a ddoje.
all. GATTUSO 7 – ‘Na bbella scuatra chella presentata ajeressera; ‘na scuatra ca finalmente sapette chello ca vulette e arrivaje addó vuleva arrivà; ‘ncarraje ‘e duje cagne facenno trasí Demme e Cciruzzo ca lle detteno ‘e tre ppunte. Applavuse.
arb. LA PENNA 4,5 Seh, seh penna! Qua’ penna e ppenna ‘stu rumanese fove ‘nu lappese scugnato ca lassaje correre cchiú ‘e ‘nu carí (fallo) d’’e lucale,lle rijalaje ‘nu ricore ‘mmece ‘e nutizzià (ammonire) a Mmerdarella pe mmuacca(simulazione).
E ffermammoce cca fistiggianno pe st’arnassa (vittoria) ca ce purtaje a ttrenta punte ‘ncrassifica speranno ‘e saglí ancòra.Mo dummeneca ca vene ô san Paolo arriva ‘o Lecce. Nun c’êssen’’a essere prubbleme… E ssi ‘o Cielo ‘o vvo’ ve ne parlo llunnerí. Staveti bbe’.