Politano cce dètte ‘e tre ppunte cu ‘na cagliosa dô lemmeto

‘Assa fa ô Cielo guagliú! Ajeressera ô san Paolo ‘o Ciuccio affuzzaje (vinse) riuscenno a sse levà da cuollo ‘a jastemma d’’o russimmo (pareggio) ca ggià pe ddoje vote [‘na vota ‘ncasa e ‘na vota fora] nun ce aveva permiso ‘e metterce tre ppunte dint’â sacca… P’’a verità pure ajeressera ‘e ccose steveno piglianno ‘a chieja storta d’’o russimmo e ‘ntribbuna-divano êttem’’a fa ‘o cuollo luongo nsi’ô 94’ quanno, finalmente!, Politano [trasuto ô 70’ ô posto ‘e Peppe ‘a ‘nguenta] truvaje ‘a jucata bbona e ttiranno dô lemmeto mannaje ‘a palla primma ‘ncopp’ô paolo e dda lla ‘nfunno ô sacco ‘e Musso rijalannoce tre ppunte ‘mpurtante, ma ca p’’a verità nunn’ êvemo fatto assaje pe ppigliarece…anze v’aggi’’a dicere ca nun partettemo cu ‘o pere bbuono datose ca p’’e primme vinte minute d’’o sibbacco (match) aizajemo porvera senza maje essere periculuse e ssenza cunchiurere ‘nu saciccio tant’è overo ca ô 22’ De Pól(le), apprufittanno ‘e ‘na meza pisciata ‘e Mario Rui a ccentro ‘e muntaca (area di rigore)piazzaje, cu ‘na bbotta ferma, ‘a palla addó Pastacrisciuta nun putette arrivà e ghiettemo ‘nsotto e ffovemo custrette a ccercà ‘e russimà (pareggiare) senza però esserne capace. “‘A vi’ lloco ‘a jastemma!” penzajemo ‘ntribbuna-divano… Però ô 32’ Gattuso fove custretto a llevà a Cciruzzo ca s’era fatto male, mannanno ‘ncampo a Ssant’Arcadio. Fove n’acqua ‘e maggio: nun passajeno trintotto siconne ca ‘o pulaccone cu ‘na zampata mancina ce rijalaje ll’uno a uno e ppo cuntinuaje a gghiucà cu ‘o sanco a ll’uocchie dànnose da fà cu ccegna (grinta) e azzaja (rabbia) tanto ca mmisemo (addirittura) fove nutizziato (ammonito) cosa ca nun lle permette ‘e jucà a Pparma. Peccato. Doppo ll’uno a uno ‘o Ciuccio cercaje ‘e fa coccosa p’affuzzà (vincere) e cce jette vicino ô 56′ quanno Zielinski cugliette ll’afachia (traversa)cu ‘na cagliosa da fora ca Musso tuccaje appena.Ati tentative ‘mpurtante nun se ne vedetteno cusicché êttemo aspettà ll’ antijsso (recupero) quanno ô 94’ Politano truvaje ‘o tiro bbuono e cce metteteno ‘e tre ppunte dint’â sacca. Menu male!

Passammo ê ppaggelle:

OSPINA[Pastacrisciuta] 7,5 Nun ce putette fa niente ‘ncopp’â bbotta ‘e De Pol(le), ma ce salvaje cu ‘nu taccullo taffo(intervento capolavoro) ‘ncopp’ô mancino s a bbotta sicura ‘e Lasagna

HYSAJ[Mezacucchiara] 6,5 Jucaje bbuono cuvernanno a mmestiere ‘a camma (zona) soja e accumpagnanna ll’azziona e ffove isso ca dette ‘a palla bbona a Ppolitano.

MANOLAS[Chitelassa] 5,5 Miezu zifo (voto mancante pe bbia ‘e ‘nu sfregazzo (sbavatura) ca puteva custarce cara.

KOULIBALY[‘O Ggialante] 6,5 Nun sulo se facette rispettà da chi capitaje, ma fove prutacunista salvanno n’addaffa (rete) quase fatta.

Mario RUI 5 ‘Nu zifo (voto) mancante pecché si è overo ca tentaje cchiú ‘e ‘na vota ‘e signà, nun le pozzo perdunà ‘a pisciata ca ce custaje ll’addaffa (rete).

RUIZ[Anemalonga] 6 Bbona atalossa (prestazione) d’’o spagnuolo cunnita dô missiddo (assist) pe ll’addaffa (rete) ‘e Sant’Arcadio.

LOBOTKA 6 Se piazzaje a ccentro ‘e ll’armidanno (centrocampo) rispettanno ‘e ccunzegne avute.[Dô 70’ DEMME 6 Trasette a ffà ‘o cane ‘e presa e cchello facette.]

ZIELINSKI 7 Finalmente turnaje a essere isso mettennoce cegna (grinta) e cqualità; se fósse mmeretato ‘e signà. [Da ll’80’ ALLAN sv]

CALLEJON[Peppe ‘a ‘nguenta] 5,5 Miezu zifo (voto) mancante pecché jucaje senza ggenio e ssenza farese nutà. [Dô70’ POLITANO 8 Trasette e ffinalmente ce facette ved che ssape fà e cce dètte ‘e tre ppunte cu ‘na cagliosa dô lemmeto.]

MERTENS [Ciruzzo] 5,5 Me dispiace ma ll’attocca miezu zifo (voto) mancante pecché jucaje’na mez’ora senza zuco né ccunnimma, po se facette male e avette ascí. [Dô 31’ MILIK [Sant’Arcadio] 7,5 Ma ch’ato se po’ vvulé da ‘nu jucatore? Cumme v’aggiu ditto trasette, signaje quase súbbeto e ppo se dètte da fa jucanno cu ccegna e azzaja.Me dispiace ca se ne va!]

INSIGNE 6 Nun truvaje maje ‘na cunchiusione decente meglio quanno cercaje ‘e cumpagne.

all. GATTUSO 6 Pecché ‘e rippe o ‘e rappe s’affuzzaje, ma ajere ‘o Napule fove poco sustanziuso e cce parette ca ggià steva cu ‘a capa â Ciampionsa…. Troppo ambressa!
Arb. CHIFFI 6 Tutto summato facette ‘o duvere suojo.
E bbasta accussí Mo si ‘O Cielo ‘o vvo’ ce sentimmo ggioverí ca vene pe ccuntareve che facimmo miercurí a Pparma e sperammo ca ce pigliammo n’ati tre ppunte. Staveti bbe’.