Le pagelle in lingua. Che scialo guagliú. ‘A punizione ‘e Lorenzo Insigne fove ‘na pennellata cumme a cchelle ‘e Diego Armando
Che scialo guagliú e cche cuntentezza ajeressera ô san Paolo addó ‘nu Ciuccio sciarmante rijalaje ê pecurare rumanise quatto sacicce a pponta ‘e curtielle, n’arbucarro (poker) p’’arricurdà a Mmaradona i ‘o ffacette cu ‘na muntazzimma (divisa) streveza e nnova ‘e trinca ca peteccaje (scimmiottò) chella ‘e ll’Argentina ‘e Diego Armando. Cumplessivamente ‘o Napule doppo ‘na dicina ‘e minute passate a sturià ll’avverzario, ‘ncasaje ‘o pere a ttavuletta i ‘e rumanise foveno mise sotto dô gulío (voglia) e dâ frischezza d’’e nuoste, nun vedetteno cchiú ppalla pe ttutt’’o sibbacco (match) tanto ca all’urdemo se cuntaje, si purtaje bbuono ‘e cunte, ‘na duzzina ‘e tire ‘e squina (corner) pe nnujeaute, mentre ‘a Roma restava a gguardà a ffarese maraviglia a rrecogliere sacicce e ccu ttutto ca era scesa ô san Paolo a ffà ‘nu miezu catenaccio nun se spiecava cumm’era ca ‘o Napule trasesse quanno vuleva ‘nfra ê llinie purtanno palla e ffacenno chello ca vulevano. ‘Nzomma tutto troppo bbello pe nnujeate d’’a tribbuna divano i ‘o quatto a zzero ce stette tutto senza discussione.
Venimmo ê ppaggelle:
MERET[‘O Lungagnone] s.v. Facette atto’e presenza: durante ô primmo ajone se guardaje ‘o sibbacco (match) e a ll’arrancua… pure spurcannose ‘e guante sulo pe rrisponnere, senza prubbleme, a ddoje o tre ttelefonate.
DI LORENZO 6,5 N’ata cosa a ppietto d’’o jucatore visto contr’ô Milàn(ne); confermaje ‘e prucresse visti cu ‘o Rijeka, tenenno ‘a pusizione e ffacennose vedé annante. r
MANOLAS[Chitelassa] 7 Atalossa (prestazione) matàla (perfetta)’ncopp’a cchi capitaje e arcabbirra (maiuscola) ‘nsuccorso ’e ll’udí (terzino) pe srtuppà ògne attacco.
Koulibaly[‘O Ggialante ] 6,5 Meglio d’ati vvote cu mmanco ‘nu sfregazzo (sbavatura) e dint’a ll’urdema mez’ora se facette rispettà pure ‘e capa facenno cuncurrenza ô cumpagno ‘e sezziona (reoparto).
MARIO RUI 6,5 Facette vedé ‘o mmeglio quanno êtt’’a nchiudere e asasa (soprattutto) a ll’arrancua (nella ripresa) cupuliaje (dialogò) a mmestiere cu Insigne, mettenno ‘o pere dint’a ll’azziona d’’o doje a zzero.
FABIAN RUIZ [Anemalonga] 7 – Doppo d’avé sbagliato ‘nu paro ‘e pallune ascenno, cosa ca facette ‘ncazzà a Ggattuso, se repigliaje, criscette, pigliaje pussesso d’’o juoco e ffove finalmente isso truvanno pure [64’] ll’addaffa (rete) d’’o doje a zzero e sbluccanno tant’azzione’e primma pe ppiscà ll’ommo ‘nfr’ê llinie. Cumplimente.
DEMME 7,5 Nun ne sbagliaje una riuscenno a essere ‘mpurtante mo cumme aculla (muraglia) mo ascenno tanto ca a ‘nu certo punto accumparette a ttutt’ê pizze a piglià palla i a ddarela! [da ll’ 83′ LOBOTKA sv]
LOZANO 6,5 – ‘Na spina ‘int’ô scianco d’’a Roma, custrignette a Spinazzola a starese vascio perdenno ògne minaccia uffenziva. Jette dinto cuntinuamente e ppeccato ca nun sempe pigliaje ‘a decisiona justa. [dô 67’ POLITANO 7,5 Trasette pigliannose súbbeto ‘o campo mannanno ô manicomio ll’avverzarie e spaventanno e zumpanno tre o quatto ‘e lloro centralmente truvaje ‘nu granne quatto a zzero mannanno a bbevere pure ‘o purtiere!]
ZIELINSKI 7 – Prumosso! Cunfermaje d’essere ‘ncundizziona dimustranno granna qualità, cegna (grinta) e fficra (progetto) mo zzallabbanno (palleggiando), mo danno ‘na mano ‘ncupertura. [dô 77′ ELMAS[‘O Turco] 6 ‘Mpattaje súbbeto ‘int’ô sibbacco ( entrò subito nel match) dannose da fà e cercanno ‘a porta cosa ca servette a Cciruzzo p’’o tre a zzero!]
INSIGNE 7,5 Ô 30’ sbluccaje ‘a facenna e ssagliette ‘ntusiello cu ‘na timmuria (punizione) ca fove ‘na pennellata cumme a cchelle ‘e Diego Armando chiammannose ll’applavuso d’’a tribbuna divano i ‘e ghiastemme ‘e Mirante; a ll’arrancua (nella ripresa) trasette ‘int’ô vvivo d’’o juoco dànno pallune ‘e qualità cumme a cchillo d’’o doje a zzero p’Anemalonga.
MERTENS[Ciruzzo] 6,5 Custretto a gghiucà a ttrenta metre dâ porta faticaje cchiú ‘e ll’ati cumpagne cu quacche sfregazzo (sbavatura) ‘e troppo, cu ttantu sacrifiggio, ma pure cu ll’addaffa (rete) d’’o tre a zzero ca migliuraje l’atalossa (prestazione) soja. [da ll’ 83′ PETAGNA sv]
all. GATTUSO 7 Ajere andivinaje tutto cosa accummincianno dâ furmazziona; vattette ‘a Roma e ncarraje pure ‘e cagne.
arb. DI BELLO 5,5 Grossi fetenzie nun ce ne facette, ma lassaje correre cchiú’e ‘nu carí (fallo) d’’e pecurare ca spisso jucajeno a ffà male.
E bbasta accussí. Nun putimmo ca essere cuntente ‘e chello fatto ajere dô Ciuccio e mmo, si ‘o Cielo ‘o vvo’ ce sentimmo viernarí ca vene pe ccuntareve che succede ggioverí a ssera ‘ncasa ‘e ll’ulandese ‘e ll’AZ(ze) addó êssem’ ‘a jí a llevarece ‘e pacchere ‘a faccia. Accussí sperammo. Staveti bbe’!