Che fetenzia guagliú vedé ‘nu Napule stutato, muollo, bbatejo (lento) e ssenza ficre (idee)!
Che fetenzia guagliú, che fetenzia! I’ ancora nun ce pozzo credere, ma assaffa (purtroppo) ‘e fatte accussí stanno: ajeressera, doppo d’’a serata sconceca contro â Bbisciona, ‘o Ciuccio ce ne ‘ntussecaje n’ata jenno a Rroma contro â scuatra d’’o pappavallo ‘e Lotito e tturnaje â casa cu n’ata vranca ‘e mosche ‘mmano! Ma pefforza, pe fforza; nun sulo Gattuso êtte fa a mmeno ‘e Ciruzzo, ‘E Lorenzigno ‘e Caromecosta, ma se ‘nfessette a ffà jucà cumme matustejo (mediano) a Anemalonga e nno a Ddemme, ma peggio ancora mannaje ‘ncampo ô ‘Ntontero, ‘mmece ‘e Chitelassa e ggià ‘ncapo ‘e nove minute fove notte i ‘o Napule jette cu ‘a capa ‘int’â cascetta e ttutt’’o sibbacco (match) fove ‘nsagliuta però nun sulo nun se riuscette a rrussimà (pareggiare) ma jucanno ‘a peggia mubbara ‘e ll’urdemi tiempe ce dicette bbuono si ‘ncassajemo sulo n’ata addaffa (rete), chella ‘e Luis Alberto ô 56’! Che fetenzia guagliú vedé ‘nu Napule stutato, muollo, bbatejo (lento) e ssenza ficre (idee)!
Passammo ê ppaggelle:
OSPINA [Pastacrisciuta] 6 Nun êtte ‘a fà straurdinarie gestiunanno bbuono ‘o primmo pussesso, ma nun putette fa niente nè tenette itimme (responsabilità) ‘ncopp’ô stuco (gol) d’Immobile e ‘ncopp’a cchillo ‘e Luis Alberto.
DI LORENZO 4,5 Cumplessivamente sbagliaje cchiú ‘e ‘na vota e sse vedette ca sta stracquo e nnunn’è isso; smarrunaje assaje quanno ô 9’ lassaje troppu campo libbero a Marusic(cio) facennolo jabbrà (crossare) senza cuntrasto; nun migliuraje a ll’arrancua (nella ripresa).
MAKSIMOVIC [‘O ‘Ntontero] 4,5 Se facette magnà ‘ncapa da Immobile ‘ncopp’a ll’uno a zzero e pp’o riesto fove sempe poco attiento e ttroppo mujccaddo (macchinoso)…
KOULIBALY [‘O Ggialante ] 5 Sfurtunato, ggià dê primme minute êtt’ astregnere ‘e diente pe bbià ‘e ‘nu prubblema adilaro (muscolare) â coscia mancina, cumbattette, ma ‘o chiàieto (fastidio) se sentette i ‘o ‘mpicciaje ‘int’ê muviment; arresecaje d’essere nutizziato (ammonito). Peccato [dô 55′ MANOLAS [Chitelassa] 6 Trasette facenno quacche bbona chiusura.]
MARIO RUI 4.5 Cumme ô culleca ‘e ll’auta curzia nun fove ‘nserata e sse vedette, sufferenno paricchio quanno dê pparte soje spuntava Milinkovic(cio).Tenette ‘ncopp’â cuscienza ‘o doje a zzero quanno smarrunanno n’attallo (tocco) assaje semprice schianaje ‘a via a Lluis Alberto. Bucciato![dô 64′ GHOULAM 6 Nun facette cape d’angiulo, ma distraje ‘e mmeretarse ‘na maglia ‘e titulare miercurí ca vene.]
FABIAN RUIZ [Anemalonga] 3 ‘Nu fantasema; doppo pochi minuti Gattuso se pentette capenno d’avé sbagliato i ‘o spustaje cchiú annante, ma ll’atalossa (prestazione d’’o spagnuolo rummanette zailla (evanescente), quase mazzaja (irritante)!
BAKAYOKO 5 Êsse avuto ‘a fa assaje ‘e cchiú, ‘mmece nun furzaje maje ‘a chiusura e ss’accuntentaje ‘e quacche bbuonu muvimento difenzivo. Troppo poco! [dô 64′ LOBOTKA 5 Faticaje pe s’abbuscà ‘a pagnotta, ma ne cacciaje sulo ‘nu cartellino jalizzo (giallo)]
ZIELINSKI 5 Fove ‘o parlà’nfaccia d’’a mubbara cuana (partita azzura) bbateja (lenta) e ssenza zuco. Che peccato!
POLITANO 4 Serata no.Nun riuscette maje a ddà manní (significato) a ll’atalossa (prova) soja, facenno poco e nniente. [dô 55′ ELMAS [‘O Turco] 5 – Nun se vedette cuntentannose ‘e bbluccà quacche surtita lazziale…]
PETAGNA 5.5 Se ‘mpignaje assaje, ma tene poca qualità e ce n’addunajemo.
LOZANO 6.5 Fove ‘o meglio d’’e suoje: currette, scattaje, pruvannoce dannannose ll’anema e mmettenno ‘ndifficurtà ll’avverzarie, ma prerecaje dint’ô ssulagno (deserto). Po ‘o vattetteno, se facette male i avette d’ascí cu ll’arcalla (caviglia ) mancina ‘ncartata cu ‘a bborza ‘e jaccio. Mo, cu st’atu diciassette, voglio proprio vedé cumme ‘a mette Gattuso! (dal 75′ Malcuit sv)
all. GATTUSO 4.5 ‘O Napule ca presentaje a ll’Ulimpico fove troppo bbatejo (lento) e ‘mpacciato; se facette sgamà subbeto e s’arrennette tropp’ampressa! È overo ca lle mancajeno Ciruzzo e Llorenzigno, ma isso nce mette ‘a jonta facenno a mmeno ‘e Demme e ffacenno jucà ô ‘Ntontero ‘mmece ‘e Chitelassa: cu cchella d’ajere stammo già â quarta sciaccata ca pigliammo ‘ncopp’ô campo. Troppe. Nun parlammo cchiú ‘e scutetto e vvedimmo si è ppussibbile mettere ‘nzieme ‘e ccrastule ‘e ‘na scuatra ‘nceruttata ca, parlanno d’’o juoco, à fatto tanti, troppi passe arreto.
arb. ORSATO 6.5 Tutto summato, facette ‘o mestiere suojo gestiunanno ‘o sibbacco (match )cu perzonalità facenno jucà quanno fove justo e dispenzanno cartelline quanno servette.
E fermammoce cca; pacienza agliuttimmoce ‘o ttuosseco e gghiammo annante, se joca miercurí ô Maradona addó scenne ‘o Turino. Sperammo ca ggioverí ve pozzo cuntà ca, nun saccio cu cchi, né ccomme nce simmo repigliate e nun ce ‘ntussecammo capitune, ‘nzalata ‘e rinforzo, mussillo ‘e bbaccalà, scioccele, raffiuole e struffole!