Le pagelle in lingua di Torino-Napoli: Osimhen 7, periculuso e ‘nforma a ccampo apierto sfruttaje’a corza soja
Sí guagliú chisto me pare ‘o mumento bbuono pe ffà ‘na cacciata ‘e sfugliatelle, pignulate e vermutta e fistiggià ca ajeressera ‘o Ciuccio juto a Tturino contro ê granate lucale ‘e scardaje ‘a zella pe ddoje a zzero, angappaje, cu sissantasei punte ‘ncrassifica, ‘a vecchia zoccola janca e nnera e ppure ‘a scuatra ‘e Pioli ca ajeressera fove mazziata dô pappavallo ‘e Lotito e pp’’o mumento ‘o Ciuccio apprufittanno d’’e dicisivi stuche (gol) d’’o Mammone [10’] e dde Caromecosta [12’] s’è cunquistato ‘nu posto ‘nCiampionsa. Pirciò putimmo dicere ca chillo d’ajeressera fove n’àrnaco (successo) funnamentale!
Passammo ê ppaggelle
MERET [‘O Lungagnone] 6,5 Bravo e ffurtunato: Unu accullo (intervento), ma ‘mpurtante e ddicisivo; n’ati ddoje vote ce penzajeno Caremecosta i ‘o Ggialante a llevarele ‘e ccastagne dô ffuoco ‘ncopp’â linia ‘e porta. Sinamparco (comunque) mantenette ‘a porta acrata (inviolata). E mmenu male!
DI LORENZO 6,5 A ddritta se prupunette, racabbaje (si sovrappose), attaccaje e difennette furnenno ‘na bbona atalossa (prova).
RRAHMANI 7 Se facette apprezzà asasa (soprattutto) ‘ncopp’ê pallune aute e ccumbattenno senza paura cu Belotti.
KOULIBALY [‘O Ggialante] 6,5 Duminaje ‘a muntaca (area di rigore) nosta facennose valé cu cchi capitaje; sulo ‘nu paro ‘e sfregazze (sbavature), ma senza cunsequenzie.
HYSAJ [Mezacucchiara] 6,5 A mmancina, sino a cquanno nun lle pigliaje ‘e mmesure sufferette ‘o juoco i ‘o passo ‘e Singo; chesto p’’e primme quarantacinche minute,ma fove tutt’ata museca e gghiette meglio a ll’arrancua (nella ripresa)!
DEMME 7 Riggia attienta e pricisa. Ajutaje a Bbakayoko e appilaje ogne pertuso facennose ‘nu mazzo tanto.
BAKAYOKO [‘O Mammone] 7,5 Fove ‘a surpresa d’’a serata; ‘mmiez’ô campo duminaje senza smarrunà maje e ccupuliaje (dialogò) a mmestiere cu Ddemme; ‘o stuco (gol) po fove ‘na perna pe ccumme ‘o priparaje e ppe ccumme ‘o cunchiudette. [Da ll’ 85′ RUIZ s.z.]
POLITANO 6 Tentaje ‘e fà male ê lucale cu ‘o mancino suojo e ccu ‘na granna azziona perzunale sfresaje (sfiorò) ‘o stuco. Peccato ca po Ansaldi lle pigliaje ‘e mmesure…[Dô 59′ LOZANO 6 Trasette e ssubbeto se dette da fà a dritta ‘mpignanno a Ssirigu.]
ZIELINSKI 6,5 Bbella atalossa (prova) d’’o pulacco ca cugliette ‘nu palo e ffurnette ‘e ssolite accellerazzione, jucate ‘e primma,tammisse (guizzi) e ttant’ato dimustranno ‘e stà ‘nforma. [ Dô 59′ MERTENS [Ciruzzo] 5,5 Me dispiace, ma nun fove isso e nun ce facette spassà; tiraje ‘mporta sulo ‘nu paro ‘e vote, ma ffove assaje ‘mpriciso. Peccato.]
INSIGNE 6,5 P’’e primme quarantacinche minute se vedette poco, però a ll’arrancua (nella ripresa) se mettette ‘ntusiello, jucaje p’’a scuatra, sfresaje (sfiorò) ‘o stuco (gol) e ccugliette ‘nu palo. [Da ll’ 85′ ELMAS [‘O Turco]s.z.]
OSIMHEN [Caromecosta] 7 Periculuso e ‘nforma, a ccampo apierto sfruttaje’a corza soja, signanno quase subbeto. [Da ll’80’ PETAGNA s.z. ]
all. GATTUSO 7 Andivinaje ‘a furmazziona e mmannaje ‘ncampo ‘nu Napule overo bbello da vedé ca duminaje cu pperzunalità, cegna (grinta) urganizzazziona ‘e juoco e ggenio d’affuzzà (vincere).E gghiette a ffenì ca ‘o doje a zzero fove busciardo; ‘o Ciuccio se mmeretava d’affuzzà cchiù llargo!
arb. VALERI 5,5 ‘E rippe o rappe facette quase tutto ‘o duvere suojo.
E bbasta accussí… Speranmmo ca mo a mmaggio ‘o Ciuccio cuntinua a ddarece ‘sti suddisfazzione e cce sentimmo si ‘o Cielo ‘o ccuncede llunnerì ca vene pe ccuntareve che succere dummeneca ô Maradona, a ll’ora d’’a tiella, contr’ô Cagliari. Ciuccio fa’ tu!